കോവിഡ് വാക്സിൻ പാഴ്ച്ചിലവെന്ന് ലോക്സഭാ എംപി; 'ബിജെപി വാക്സിന്‍'വേണ്ടെന്ന് അഖിലേഷ് യാദവ്; വിചിത്രമായ ചില പ്രസ്താവനകൾ അറിയാം

കോവിഡ് വാക്സിൻ താൻ സ്വീകരിക്കില്ലെന്ന സമാജ് വാദി നേതാവ് അഖിലേഷ് യാദവിന്‍റെ പ്രസ്താവന ഏറെ വിവാദം ഉയർത്തിയിരുന്നു. ബിജെപിയുടെ കോവിഡ് വാക്സിനിൽ തനിക്ക് വിശ്വാസമില്ലെന്ന് അറിയിച്ചു കൊണ്ടായിരുന്നു പ്രതികരണം. എന്നാൽ വാക്സിനേഷൻ ഡ്രൈവ് രാഷ്ട്രീയവത്കരിക്കുന്നു എന്നാരോപിച്ച് അഖിലേഷിനെതിരെ വിമർശനം ഉയരുകയായിരുന്നു.

ഇന്ത്യയിലെ മാത്രമല്ല വിദേശ രാജ്യങ്ങളിലെ പ്രമുഖ നേതാക്കൾ പോലും കോവിഡ് വാക്സിനെതിരെ രംഗത്തെത്തിയിരുന്നു. അംഗീകരിക്കപ്പെട്ട വാക്സിനുകൾ പലതും അപകടകാരികള്‍ ആണെന്നും നല്ല ഉദ്ദേശ്യങ്ങളോട് കൂടിയതല്ലെന്നുമായിരുന്നു ടാൻസാനിയ പ്രസിഡന്‍റ് മഗുഫുളി അറിയിച്ചത്. ഇതിന് പിന്നാലെ തന്നെ വാക്സിനുകളുമായി ബന്ധപ്പെട്ട് രാജ്യങ്ങളുടെ വിശ്വാസം ഊട്ടിയുറപ്പിക്കണമെന്നാവശ്യവുമായി ലോകാരോഗ്യ സംഘടന പ്രസ്താവനയും പുറത്തിറക്കിയിരുന്നു.

കോവിഡ് വാക്സിൻ ഹലാൽ ആണോയെന്ന ആശങ്ക പങ്കുവച്ച് ആദ്യമെത്തിയത് ഇന്തോനേഷ്യൻ അധികൃതരാണ്. വാക്സിനിൽ പന്നിയുടെ കൊഴുപ്പ് അടങ്ങിയിട്ടുണ്ടെന്നും ഇസ്ലാമിക നിയമ പ്രകാരം ഇത് അനുവദനീയമാണോയെന്നുമായിരുന്നു ആശങ്ക.

താൻ കോവിഡ് പോസിറ്റീവായാൽ പശ്ചിമ ബംഗാൾ മുഖ്യമന്ത്രി മമത ബാനർജിയെ ആലിംഗനം ചെയ്യുമെന്ന ബിജെപി ദേശീയ സെക്രട്ടറി ആയ അനുപം ഹസ്രയുടെ പ്രസ്താവന ഏറെ വിവാദം ഉയർത്തിയിരുന്നു. ഏതാനും ദിവസങ്ങൾക്കകം തന്നെ കോവിഡ് പോസിറ്റീവായി അദ്ദേഹത്തെ ആശുപത്രിയിൽ പ്രവേശിപ്പിക്കുകയും ചെയ്തു.

കോവിഡ് വാക്സിൻ വന്ധ്യതയ്ക്ക് കാരണമാകുമെന്ന പ്രസ്താവന നടത്തിയത് സമാജ് വാദി നേതാവ് അശുതോഷ് സിൻഹയാണ്. കോവിഡ് വാക്സിൻ സ്വീകരിക്കില്ലെന്ന് അഖിലേഷ് യാദവിന്‍റെ നിലപാടിനെ പിന്തുണച്ച്, താനും വാക്സിന്‍ സ്വീകരിക്കില്ലെന്ന് വ്യക്തമാക്കിയായിരുന്നു പ്രതികരണം. 'വാക്സിന്‍ സ്വീകരിക്കില്ലെന്ന് അഖിലേഷ് യാദവ് പറഞ്ഞിട്ടുണ്ടെങ്കിൽ ഗുരുതരമായ എന്തെങ്കിലും പ്രശ്നം കാണും.വസ്തുതകളുടെ അടിസ്ഥാനത്തിലാണ് അദ്ദേഹം ഇത് പറഞ്ഞത്. സർക്കാർ സംവിധാനങ്ങളിൽ ഞങ്ങൾ വിശ്വസിക്കുന്നില്ല. കോവിഡ് വാക്സിൻ അദ്ദേഹം സ്വീകരിക്കുന്നില്ലെങ്കിൽ വാക്സിനിൽ എന്തെങ്കിലും അടങ്ങിയിരിക്കാമെന്ന് ഞാൻ കരുതുന്നു, അത് ദോഷം ചെയ്യും. ജനസംഖ്യ ഇല്ലാതാക്കുന്നതിനോ കുറയ്ക്കുന്നതിനോ ആണ് വാക്സിൻ നൽകിയതെന്ന് നാളെ ആളുകൾ പറയും. നിങ്ങൾക്ക് വന്ധ്യതയടക്കം എന്തും സംഭവിക്കാം എന്നായിരുന്നു പ്രസ്താവന.

ഫൈസര്‍-ബയോ ടെക് വികസിപ്പിച്ചെടുത്ത കോവിഡ് വാക്സിൻ ആളുകളെ മുതലകളോ താടിയുള്ള സ്ത്രീകളോ ആക്കി മാറ്റാമെന്നായിരുന്നു ബോൾസൊനാരോയുടെ പ്രസ്താവന.'ഏതെങ്കിലും പാർശ്വഫലങ്ങൾക്ക് ഞങ്ങൾ ഉത്തരവാദികളല്ല' എന്ന് ഫൈസർ കരാറിൽ വളരെ വ്യക്തമാണ്' അതുകൊണ്ട് തന്നെ നിങ്ങൾ ഒരു മുതലയായി മാറുകയാണെങ്കിൽ, അത് നിങ്ങളുടെ പ്രശ്‌നമാണ്' എന്നായിരുന്നു വിവാദ പ്രസ്താവന.

സ്വവർഗ്ഗ വിവാവങ്ങളാണ് കോവിഡ് മഹാമാരിക്ക് കാരണമെന്ന ചർച്ച് മേധാവിയുടെ പ്രസ്താവനയ ഏറെ വിവാദങ്ങൾക്കാണ് വഴിവച്ചത്. ഉക്രെയ്ൻ ഓർത്തഡോക്സ് ചർച്ച് നേതാവ് ക്വീവ് പാത്രിയാർക്കത്തെയാണ് ഇത്തരമൊരു പ്രസ്താവന നടത്തിയത്. കുറച്ചു നാളുകൾക്കുള്ളിൽ ഇദ്ദേഹത്തിനും കോവിഡ് സ്ഥിരീകരിച്ചിരുന്നു.