കോഴിക്കോട് സ്കൂൾ കുട്ടികളെ ലക്ഷ്യമിട്ട് ലഹരിവിൽപന; 26 ഗ്രാം എംഡിഎംഎയുമായി നാലുപേർ പിടിയിൽ
- Published by:Sarika N
- news18-malayalam
Last Updated:
സ്വകാര്യ ലോഡ്ജിൽ ലഹരിമരുന്ന് പാക്കറ്റുകളിലാക്കുന്നതിനിടെയാണ് 26 ഗ്രാം എംഡിഎംഎയുമായി പ്രതികൾ പിടിയിലായത്
കോഴിക്കോട്: സ്കൂൾ വിദ്യാർത്ഥികളെയും യുവാക്കളെയും ലക്ഷ്യമിട്ട് ലഹരിവിൽപന നടത്തിവന്ന നാലംഗ സംഘത്തെ പോലീസ് പിടികൂടി. എരഞ്ഞിപ്പാലം മിനി ബൈപ്പാസിന് സമീപത്തെ സ്വകാര്യ ലോഡ്ജിൽ ലഹരിമരുന്ന് പാക്കറ്റുകളിലാക്കുന്നതിനിടെയാണ് 26 ഗ്രാം എംഡിഎംഎയുമായി പ്രതികൾ പിടിയിലായത്. ഭട്ട്റോഡ് സ്വദേശിയായ റോബർട്ട് ജയിംസ്, നടുവണ്ണൂർ സ്വദേശി മുഹമ്മദ് റിസ്വാൻ, കല്ലായി സ്വദേശി ഷഹറീഷ്, പയ്യാനക്കൽ സ്വദേശി ഫിനാൻ നാസിം എന്നിവരാണ് പിടിയിലായത്. ഇതിൽ റോബർട്ട് ജയിംസ് നിരവധി മോഷണ-ലഹരിമരുന്ന് കേസുകളിൽ പ്രതിയാണ്. മുഹമ്മദ് റിസ്വാൻ 2025-ൽ 70 ഗ്രാം എംഡിഎംഎയുമായി പേരാമ്പ്രയിൽ പിടിയിലായ ശേഷം ജാമ്യത്തിൽ ഇറങ്ങിയ ആളാണ്. ഷഹറീഷ് ലഹരിക്കേസിൽ ദുബായിൽ 17 മാസം ജയിൽവാസം അനുഭവിച്ചിട്ടുണ്ട്.
സിറ്റി നർകോട്ടിക് സെൽ അസിസ്റ്റന്റ് കമ്മിഷണർ കെ.എ. ബോസിന്റെ നേതൃത്വത്തിലുള്ള ഡാൻസാഫ് സംഘവും നടക്കാവ് പൊലീസും സംയുക്തമായാണ് ഈ നാടകീയമായ അറസ്റ്റ് നടത്തിയത്. പോലീസ് എത്തുമ്പോൾ പ്രതികൾ ലഹരിമരുന്ന് ചെറിയ പാക്കറ്റുകളിൽ നിറയ്ക്കുന്ന തിരക്കിലായിരുന്നു. റോബർട്ടും റിസ്വാനുമാണ് നഗരത്തിലെ ലഹരി ശൃംഖലയിലെ പ്രധാനികളെന്നും ഇവർ ഏറെ നാളായി പോലീസിന്റെ നിരീക്ഷണത്തിലായിരുന്നുവെന്നും അധികൃതർ വ്യക്തമാക്കി.
കഴിഞ്ഞ ദിവസം 42 കിലോ കഞ്ചാവുമായി ജംഷീർ എന്ന യുവാവിനെ പിടികൂടിയതിന് പിന്നാലെയാണ് ഈ എംഡിഎംഎ സംഘവും പിടിയിലാകുന്നത്. സ്കൂളുകൾ കേന്ദ്രീകരിച്ച് ലഹരിമരുന്ന് എത്തുന്നുണ്ടെന്ന രഹസ്യവിവരത്തെത്തുടർന്ന് നഗരത്തിൽ പരിശോധന പോലീസ് ശക്തമാക്കിയിട്ടുണ്ട്.
Location :
Kozhikode [Calicut],Kozhikode,Kerala
First Published :
Feb 08, 2026 2:05 PM IST
മലയാളം വാർത്തകൾ/ വാർത്ത/Crime/
കോഴിക്കോട് സ്കൂൾ കുട്ടികളെ ലക്ഷ്യമിട്ട് ലഹരിവിൽപന; 26 ഗ്രാം എംഡിഎംഎയുമായി നാലുപേർ പിടിയിൽ
