Gold Smuggling | കുടുക്കിയത് ഫോൺ വിളി; NIA എഫ്.ഐ.ആർ രജിസ്റ്റർ ചെയ്ത് 24 മണിക്കൂറിനുള്ളിൽ സ്വപ്നയും സന്ദീപും പിടിയിലായി

ബെംഗളുരൂ: തിരുവനന്തപുരം വിമാനത്താവളത്തിലൂടെ നയതന്ത്ര ബാഗേജിൽ സ്വർണം കടത്താൻ ശ്രമിച്ച കേസിലെ പ്രതികളായ സ്വപ്ന സുരേഷിനെയും സന്ദീപ് നായരെയും എൻ.ഐ.എ ബെംഗളൂരുവിൽ നിന്നും പിടികൂടി. കേസിൽ എഫ്.ഐ.ആർ രജിസ്റ്റർ ചെയ്ത് 24 മണിക്കൂറിനുള്ളിലാണ്, ഓരാഴ്ചയായി ഒളിവിലായിരുന്ന പ്രതികളെ എൻ.ഐ.എ വലയിലാക്കിയത്. ഫോൺ കോൾ കേന്ദ്രീകരിച്ച് നടത്തിയ അന്വേഷണമാണ‌് പ്രതികളെ കുടുക്കിയതെന്നാണ് വിവരം.

സന്ദീപിനൊപ്പം കുടുംബസമേതമാണ് സ്വപ്ന ബെംഗളൂരുവിലേക്ക് ‌മുങ്ങിയത്. ഇതിനിടെ സ്വപ്നയുടെ മകൾ സഹപാഠിയെ  ഫോണിൽ വിളിച്ചു. ഇതാണ് അന്വേഷണത്തിന് സഹായകമായതെന്നാണ് സൂചന. ഈ നമ്പർ പിന്തുടർന്നാണ് എൻ.ഐ.എ സംഘം പ്രതികളെ പിടികൂടിയത്. ഇതിനായി ബെംഗളുരൂ പൊലീസിന്റെ സഹായം തേടിയതായും വിവരമുണ്ട്.

പ്രതികളെ ഞായറാഴ്ച കൊച്ചിയിലെ എൻ.ഐ.എ ഓഫീസിലെത്തിക്കും. നിലവിൽ നാലു പ്രതികൾക്കെതിരെയാണ് എൻ.ഐ.എ എഫ്.ഐ.ആർ രജിസ്റ്റർ ചെയ്തിരിക്കുന്നത്. പ്രതികൾക്കെതിരെ യുഎപിഎ വകുപ്പുകളും ഉൾപ്പെടുത്തിയിട്ടുണ്ട്.