ഭാര്യയ്ക്ക് ഏഴ് വർഷത്തെ പ്രണയം; ഭർത്താവിനെ ഹണിമൂണിനിടക്ക് കൊലപ്പെടുത്താൻ പദ്ധതിയിട്ടത് രണ്ടാഴ്ച മുൻപ്

രാജസ്ഥാനിലെ ശ്രീഗംഗാനഗറിൽ കാമുകന്റെ സഹായത്തോടെ ഭർത്താവിനെ ഹണിമൂണിനിടക്ക് കൊലപ്പെടുത്തിയ കേസിൽ പ്രതിയായ യുവതിക്ക് ഏഴ് വർഷമായി പ്രണയമുണ്ടായിരുന്നതായും, വീട്ടുകാർക്ക് ഈ ബന്ധത്തെക്കുറിച്ച് അറിവുണ്ടായിരുന്നതായും റിപ്പോർട്ട്. തന്റെ കാമുകനായ സഞ്ജുവിന്റെ സഹായത്തോടെയാണ് 23-കാരിയായ അഞ്ജു ഭർത്താവ് ആശിഷിനെ (27) വധിക്കാൻ ഗൂഢാലോചന നടത്തിയത്. കൊലപാതകത്തിന് ശേഷം അപകടമാണെന്ന് വരുത്തിത്തീർക്കാനും ഇവർ ശ്രമിച്ചു. വൈകുന്നേരം നടക്കാൻ പോയ സമയത്ത് തങ്ങളെ ഒരു വാഹനം ഇടിച്ചുവെന്നാണ് അഞ്ജു പോലീസിനോട് പറഞ്ഞിരുന്നത്. എന്നാൽ ആശിഷിന്റെ ശരീരത്തിലെ പരിക്കുകൾ പരിശോധിച്ചപ്പോൾ ശ്വാസം മുട്ടിച്ചാണ് കൊലപ്പെടുത്തിയതെന്ന് വ്യക്തമായി.