ചെങ്കോൽ കൈമാറ്റം; വേദമന്ത്രോച്ചാരണം, സർവധർമ പ്രാർത്ഥന: പാർലമെന്റ് മന്ദിരം പ്രധാനമന്ത്രി ഉദ്ഘാടനം ചെയ്തതിങ്ങനെ

അതിരാവിലെ നടന്ന ഹവനത്തോടെയാണ് ഉദ്ഘാടനച്ചടങ്ങുകൾക്ക് തുടക്കമായത്. ശേഷം സർവമതപ്രാർത്ഥനയും, തുടർന്ന് ലോക്‌സഭാ ചേംബറിൽ പ്രത്യേകമായി നിർമിച്ച ഭാഗത്ത് ചെങ്കോൽ സ്ഥാപിക്കുന്ന ചടങ്ങും നടന്നു. മതപരമായ ചടങ്ങുകളിൽ സംബന്ധിക്കാൻ ധോത്തിയും കുർത്തയും അണിഞ്ഞാണ് പ്രധാനമന്ത്രി എത്തിയത്. വാസ്തുപൂജാ ചടങ്ങുകളുടെ ഭാഗമായി ഗണപതി ഹോമവും നടത്തി. സർവമതപ്രാർത്ഥനയും, അതിനൊപ്പം തേവാരം പ്രാർത്ഥനകളിൽ നിന്നുമുള്ള ശൈവ സ്‌തോത്രങ്ങളും ചടങ്ങിന് പശ്ചാത്തലമായിരുന്നു.

മുൻ രാഷ്ട്രപതി രാം നാഥ് കോവിന്ദ്, ഉത്തർപ്രദേശ് മുഖ്യമന്ത്രി യോഗി ആദിത്യനാഥ് എന്നിവർ ഔപചാരിക ഉദ്ഘാടനച്ചടങ്ങുകളിൽ പങ്കെടുത്തിരുന്നു. ആന്ധ്രപ്രദേശ് മുഖ്യമന്ത്രി വൈ എസ് ജഗൻമോഹൻ റെഡ്ഡി മാത്രമായിരുന്നു ചടങ്ങിൽ പങ്കെടുത്ത എൻഡിഎ ഇതര രാഷ്ട്രീയ കക്ഷികളിൽ നിന്നുള്ള ഏക നേതാവ്. മഹാരാഷ്ട്ര മുഖ്യമന്ത്രി ഏക്‌നാഥ് ഷിൻഡെ, മേഖാലയ മുഖ്യമന്ത്രി കോൺറാഡ് സാങ്മ, മിസോറാം മുഖ്യമന്ത്രി സോറംതാങ്ഗ, നാഗാലാൻഡ് മുഖ്യമന്ത്രി നെയ്ഫു റിയോ, സിക്കിം മുഖ്യമന്ത്രി പ്രേം സിംഗ് തമാംഗ് എന്നിവരും ചടങ്ങിൽ സംബന്ധിച്ചു. ചില വിദേശരാജ്യങ്ങളുടെ അംബാസഡർമാരും സന്നിഹിതരായിരുന്നു. പാർലമെൻ്റംഗങ്ങളും ചടങ്ങിൽ പങ്കെടുത്തു.

പഴയ പാർലമെൻ്റ് മന്ദിരം പണികഴിപ്പിക്കാൻ എടുത്തത് ആറു വർഷമാണെങ്കിൽ, പുതിയ കെട്ടിടത്തിന്റെ നിർമാണം വെറും രണ്ടര വർഷത്തിലാണ് പൂർത്തീകരിച്ചത്. 64,500 ചതുരശ്ര മീറ്ററിലാണ് കെട്ടിടം നിർമിച്ചിരിക്കുന്നത്. ആകെ ചെലവായ തുക ഏകദേശം 1,200 കോടിയാണ്. 888 ഇരിപ്പിടങ്ങളാണ് ലോക്‌സഭ ചേംബറിലുള്ളത്. ഇരു സഭകളുടെയും ഒന്നിച്ചുള്ള യോഗത്തിൽ 1,272 അംഗങ്ങളെ ഉൾക്കൊള്ളാൻ പുതിയ കെട്ടിടത്തിന് കഴിയും. അപ്പർ ഹൗസ് ചേംബറിൽ 384 സീറ്റുകളുണ്ട്. ടാറ്റ പ്രോജക്ടസ് ലിമിറ്റഡാണ് നിർമാണപ്രവർത്തനങ്ങൾക്ക് ചുക്കാൻ പിടിച്ചത്. രാജ്യത്തിന്റെ ജനാധിപത്യ പാരമ്പര്യം പ്രദർശിപ്പിക്കാനുള്ള കോൺസ്റ്റിറ്റ്യൂഷൻ ഹാൾ, എംപിമാർക്കായുള്ള വിശ്രമമുറി, ലൈബ്രറി, വിവിധ കമ്മറ്റി റൂമുകൾ, ഡൈനിംഗ് ഏരിയ, പാർക്കിംഗ് സ്‌പേസ് എന്നിവയും കെട്ടിടത്തിന്റെ ഭാഗമായുണ്ട്. ഗ്യാൻ ദ്വാർ, ശക്തി ദ്വാർ, കർമ ദ്വാർ എന്നീ പേരുകളിൽ മൂന്ന് പ്രധാന ഗേറ്റുകളാണ് കെട്ടിടത്തിനുള്ളത്.