Explained | ആശങ്ക ഉയർത്തി കൊറോണ വൈറസിന്റെ കാപ്പ വകഭേദം; പുതിയ വകഭേദത്തെക്കുറിച്ച് അറിയേണ്ടതെല്ലാം

കൊറോണ വൈറസിന് ഇരട്ട ജനിതകമാറ്റം സംഭവിച്ച് രൂപപ്പെട്ട വകഭേദമാണ് കാപ്പ. B.1.617 എന്ന വിഭാഗത്തിൽപ്പെടുന്ന വകഭേദങ്ങളുമായി ബന്ധമുള്ള വകഭേദമാണ് കാപ്പ. മെയ് അവസാനമാണ് ലോകാരോഗ്യ സംഘടന ഈ വകഭേദത്തിന് കാപ്പ എന്ന പേര് നൽകിയത്. ഇന്ത്യയിൽ ആദ്യം കണ്ടെത്തിയ B.1.617 എന്ന വകഭേദം വീണ്ടും ജനിതമാറ്റങ്ങൾക്ക് വിധേയമായാണ് B.1.617.1, B.1.617.2, B.1.617.3 എന്നീ വകഭേദങ്ങൾ രൂപപ്പെട്ടത്. ഇവയിൽ B.1.617.1 എന്ന വകഭേദത്തിനാണ് കാപ്പ എന്ന പേര് നൽകിയത്. B.1.617.2 ആണ് ഡെൽറ്റ എന്നറിയപ്പെടുന്നത്. മൂന്നാമത്തെ വകഭേദം കൂടുതലായി വ്യാപിച്ചിട്ടില്ലാത്തതിനാൽ പേരൊന്നും നൽകിയിട്ടില്ല,

കാപ്പ വകഭേദം കൊറോണ വൈറസിന്റെ ഏറ്റവും പുതിയ വകഭേദമല്ല. ലോകാരോഗ്യസംഘടന നൽകുന്ന വിവരങ്ങൾ പ്രകാരം, കാപ്പ വകഭേദം 2020 ഒക്ടോബറിൽ ഇന്ത്യയിലാണ് ആദ്യമായി കണ്ടെത്തുന്നത്. കാപ്പയ്ക്ക് പുറമെ ഡെൽറ്റ വകഭേദത്തിന്റെ സാന്നിധ്യവും ആദ്യം കണ്ടെത്തിയത് ഇന്ത്യയിലാണ്.

ലോകാരോഗ്യ സംഘടന 'വേരിയന്റ് ഓഫ് ഇൻറ്റ്രസ്റ്റ്' എന്ന വിഭാഗത്തിൽ ഉൾക്കൊള്ളിച്ചിട്ടുള്ള വകഭേദമാണ് കാപ്പ. ഇത് ഏതെങ്കിലും തരത്തിൽ ആശങ്ക ഉയർത്തുന്ന വകഭേദമല്ല എന്ന് സാരം. ജനിതകമാറ്റത്തിന്റെ സ്വഭാവം മുൻകൂട്ടി പ്രവചിച്ചിട്ടുള്ള വകഭേദങ്ങളെയാണ് ലോകാരോഗ്യ സംഘടന 'വേരിയന്റ് ഓഫ് ഇൻറ്റ്രസ്റ്റ്' എന്ന പട്ടികയിൽ ഉൾപ്പെടുത്തുന്നത്. അവയ്ക്കുണ്ടായിട്ടുള്ള ജനിതകമാറ്റം വളരെ സ്വാഭാവികമായി ഉണ്ടാകുന്നതാണ് എന്നാണ് ഇതിലൂടെ അർത്ഥമാക്കുന്നത്. അതിനാൽ ഈ വകഭേദത്തിന്റെ വ്യാപനം, അത് ഉണ്ടാക്കുന്ന രോഗബാധയുടെ തീവ്രത, മനുഷ്യരിലെ രോഗപ്രതിരോധശേഷിയിൽ അതുണ്ടാക്കുന്ന പ്രതികരണം, മരുന്നുകളെ അതിജീവിക്കാനുള്ള അതിന്റെ ശേഷി എന്നിവയെക്കുറിച്ചെല്ലാം നമുക്ക് മുന്നറിവ് ഉണ്ട്.

കാപ്പ വകഭേദത്തിന് L453R എന്ന ജനിതകമാറ്റം സംഭവിച്ചിട്ടുണ്ട്. ഈ ജനിതകമാറ്റം മൂലം കാപ്പയെ നമ്മുടെ രോഗപ്രതിരോധ സംവിധാനത്തിന് പ്രതിരോധിക്കാൻ കഴിയില്ലെന്ന ആശങ്ക ഉയർന്നിരുന്നു. എന്നാൽ, ഇത് സംബന്ധിച്ച കൂടുതൽ ഗവേഷണങ്ങൾ നടക്കുന്നതേയുള്ളൂ. ഈ വാദത്തെ സാധൂകരിക്കാനോ തള്ളിക്കളയാനോ കഴിയുന്ന വിധത്തിലുള്ള ആധികാരിക വിവരങ്ങളൊന്നും ഇപ്പോൾ ലഭ്യമല്ല.

കൊറോണയുടെ മറ്റെല്ലാ വകഭേദങ്ങളെയും എന്ന പോലെ കാപ്പയെയും പ്രതിരോധിക്കാൻ മാസ്ക് ധരിക്കൽ, സാമൂഹ്യ അകലം പാലിക്കൽ, കൈകൾ സോപ്പും സാനിറ്റൈസറും ഉപയോഗിച്ച് നിരന്തരം വൃത്തിയാക്കൽ മുതലായ ശീലങ്ങൾ നമ്മൾ കർശനമായി പാലിച്ചേ മതിയാകൂ. അത്യാവശ്യങ്ങൾക്കല്ലാതെ വീട്ടിൽ നിന്ന് പുറത്തിറങ്ങരുത്. ആൾക്കൂട്ടങ്ങൾ പൂർണമായും ഒഴിവാക്കണം. മാത്രമല്ല, എത്രയും വേഗം കോവിഡ് വാക്സിനുകളുടെ രണ്ട് ഡോസുകളും സ്വീകരിക്കാൻ ശ്രമിക്കുക.

ഫ്രാൻസിലെ പാസ്ചർ ഇൻസ്റ്റിറ്റ്യൂട്ട് നടത്തിയ പഠനത്തിൽ കണ്ടെത്തിയ വിവരങ്ങൾ പ്രകാരം, കോവിഡ് വാക്സിന്റെ ഒരു ഡോസ് മാത്രം സ്വീകരിച്ചവർക്ക് കൊറോണ വൈറസിന്റെ ആൽഫ, ഡെൽറ്റ വകഭേദങ്ങളെ പൂർണമായും പ്രതിരോധിക്കാൻ കഴിയില്ല. നേച്ചർ മാഗസിനിൽ പ്രസിദ്ധീകരിച്ച റിപ്പോർട്ടിന് ആസ്പദമായ പഠനം ആസ്‌ട്രാസെനെക്ക, ഫൈസർ ബയോഎൻടെക് എന്നീ വാക്സിനുകൾ സ്വീകരിച്ചവരിലാണ് സംഘടിപ്പിച്ചത്. ഇന്ത്യയിൽ ആസ്‌ട്രാസെനെക്ക വാക്സിനാണ് കോവിഷീൽഡ്‌ എന്ന പേരിൽ സെറം ഇൻസ്റ്റിറ്റ്യൂട്ട് ഓഫ് ഇന്ത്യ ഉത്പാദിപ്പിച്ച് വിതരണം ചെയ്യുന്നത്. വാക്സിന്റെ ആദ്യ ഡോസ് സ്വീകരിച്ചവരിൽ 10 ശതമാനം പേർക്ക് മാത്രമാണ് ആൽഫ, ഡെൽറ്റ വകഭേദങ്ങളെ പ്രതിരോധിക്കാൻ കഴിഞ്ഞത്. എന്നാൽ, രണ്ട് ഡോസുകളും സ്വീകരിച്ചവരിൽ ഈ വകഭേദങ്ങൾക്കതിരെയുള്ള ഫലപ്രാപ്തി 95 ശതമാനമാണെന്നും പഠനം ചൂണ്ടിക്കാട്ടുന്നു. അതിനാൽ, കാപ്പ വകഭേദത്തിനെതിരെ വാക്സിന്റെ ഒരു ഡോസ് പൂർണമായും ഫലപ്രദമാകില്ല എന്ന് നമുക്ക് അനുമാനിക്കാം. എത്രയും വേഗം എല്ലാവരും രണ്ട് ഡോസ് വാക്സിൻ സ്വീകരിക്കുകയാണ് ഏറ്റവും ഉത്തമം.