ലോക്‌സഭയിലെ സുരക്ഷാവീഴ്ച: സന്ദര്‍ശക പാസ് ലഭിക്കുന്നതെങ്ങനെ? പാര്‍ലമെന്റിലെ സുരക്ഷാ പരിശോധനകൾ എന്തെല്ലാം?

എന്നാല്‍, കളര്‍ സ്‌പ്രേകളുമായി രണ്ട് സന്ദര്‍ശകര്‍ പാര്‍ലമെന്റിനുള്ളിൽ പ്രവേശിച്ചു. സന്ദര്‍ശക ഗാലറിയിലിരുന്ന ഇവര്‍ രണ്ടുപേരും ഷൂവിനുള്ളില്‍ ഒളിപ്പിച്ച കളര്‍ സ്‌പ്രേയെടുത്ത് എംപിമാർ ഇരിക്കുന്ന മേശയുടെ മുകളിലേക്ക് ചാടിക്കയറുകയായിരുന്നു.

ഈ സംഭവം പാര്‍ലമെന്റിലെ സുരക്ഷാ സംവിധാനത്തിന്റെ അടിത്തറയെ തന്നെ ഇളക്കിമറിച്ചിരിക്കുകയാണ്. പാര്‍ലമെന്റില്‍ ഭീകരാക്രമണം നടന്ന അതേദിവസം തന്നെയാണ് ഈ സംഭവവും അരങ്ങേറിയതെന്ന് ശ്രദ്ധേയമാണ്.

അതേസമയം, ഇന്നലെ നടന്ന സംഭവത്തിന് ഭീകരാക്രമണവുമായി ബന്ധമുണ്ടെന്നതിന് യാതൊരു സൂചനയും ലഭിച്ചിട്ടില്ല. പിടികൂടിയ രണ്ട് പേരും സാധാരണ പൗരന്മാരാണെന്നും അവര്‍ തങ്ങളുടെ പ്രതിഷേധം രേഖപ്പെടുത്തുകയായിരുന്നുവെന്നും ഏജന്‍സികള്‍ പറയുന്നു.

പാര്‍ലമെന്റ് സെക്യൂരിറ്റി സര്‍വീസസ്, ഡല്‍ഹി പോലീസ്, പാര്‍ലമെന്റ് ഡ്യൂട്ടി ഗ്രൂപ്പ് തുടങ്ങി വിവിധ സുരക്ഷാ ഏജന്‍സികള്‍ ഉള്‍പ്പെടുന്ന പ്രവര്‍ത്തനങ്ങള്‍ക്ക് മേല്‍നോട്ടം വഹിക്കാനുള്ള ഉത്തരവാദിത്വം ജോയിന്റ് സെക്രട്ടറിയ്ക്കാണ് (സുരക്ഷ) നല്‍കിയിരിക്കുന്നത്. പല തട്ടുകളായാണ് സുരക്ഷാ സംവിധാനം ഒരുക്കിയിരിക്കുന്നത്. ഏറ്റവും പുതിയ സാങ്കേതികവിദ്യകളും പരമ്പരാഗത സുരക്ഷാ സംവിധാനങ്ങളും ഉപയോഗിച്ചുള്ള സംവിധാനമാണ് ഇതില്‍ ഉള്‍പ്പെടുന്നത്.

എല്ലാ മാനദണ്ഡങ്ങളും നിയന്ത്രണങ്ങളും യാതൊരുവിധ വീഴ്ചയും കൂടാതെ ശരിയായി നടപ്പിലാക്കുന്നുണ്ടെന്നും ജീവനക്കാര്‍ അക്കാര്യം ശരിയായി വിശദീകരിക്കുന്നുണ്ടെന്നും ഏരിയ ഇന്‍-ചാര്‍ജ് ഉറപ്പാക്കുന്നു. സംശയാസ്പദമായ രീതിയില്‍ ആരെങ്കിലും പാര്‍ലമെന്റിന് ഉള്ളില്‍ പ്രവേശിക്കുന്നുണ്ടോയെന്ന് കണ്ടെത്തുന്നതിനും തടയുന്നതിനുമായി എല്ലാ സൂപ്പര്‍വൈസറി ഓഫീസര്‍മാരും തങ്ങളുടെ ഉത്തരവാദിത്വപ്പെട്ട മേഖലയിലൂടെ ചുറ്റിനടക്കും.

ഓരോ പാസിനും ഒരോ ഐഡി ഉണ്ടായിരിക്കും. മെറ്റല്‍ ഡിറ്റക്ടേഴ്‌സ്, ആധുനിക ഉപകരണങ്ങള്‍, വാഹനങ്ങളുടെ പ്രവേശനം നിയന്ത്രിക്കുന്നതിന് റേഡിയോ ഫ്രീക്വന്‍സ് ടാഗുകള്‍ എന്നിവ ഉപയോഗിച്ചാണ് സുരക്ഷാ പരിശോധനകള്‍. പാര്‍ലമെന്റ് സന്ദര്‍ശിക്കുന്നവരുടെ ബാഗുകളും സാധനസാമഗ്രഹികളും മൂന്ന് തവണയെങ്കിലും പരിശോധിക്കപ്പെടും. പാർലമെന്റിന്റെ പ്രവേശനകവാടത്തില്‍ തന്നെ സുരക്ഷാ പരിശോധന തുടങ്ങും.

ഡല്‍ഹി പോലീസ്, പാര്‍ലമെന്റ് ഡ്യൂട്ടി ഗ്രൂപ്പ്, ഇന്റലിജന്‍സ് ബ്യൂറോ, സ്പെഷ്യല്‍ പ്രൊട്ടക്ഷന്‍ ഗ്രൂപ്പ്, നാഷണല്‍ സെക്യൂരിറ്റി ഗാര്‍ഡ് എന്നിവയുമായി ചേർന്നാണ് പാര്‍ലമെന്റ് സുരക്ഷാ സംവിധാനം പ്രവർത്തിക്കുന്നത്.