പവിഴപ്പുറ്റുകളുടെ കലവറ; 2004ൽ എൻഡിഎയെ വിജയിപ്പിച്ച സീറ്റ്; ലക്ഷദ്വീപിനെക്കുറിച്ച് കൂടുതൽ അറിയാം

അറബിക്കടലിലെ 36 ദ്വീപുകളാണ് ലക്ഷദ്വീപ് എന്ന പേരിൽ അറിയപ്പെടുന്നത്.  പവിഴപ്പുറ്റുകളുടെ ഒരു ദ്വീപസമൂഹം കൂടിയാണിത്. കവരത്തിയാണ് ദ്വീപിന്‍റെ തലസ്ഥാനം. ആകെ ദ്വീപുകളിൽ അഗത്തി, അമിനി, ആന്ത്രോത്ത്, ബംഗാരം, ബിത്ര, ചെത്ലാത്, കടമത്ത്, കവരത്തി, കൽപേനി, കിൽത്താൻ, മിനിക്കോയ് എന്നീ 11 ദ്വീപുകളിലാണ് ജനവാസമുള്ളത്. എഴുപതിനായിരത്തിൽ താഴെ മാത്രമാണ് ഇവിടെ ജനസംഖ്യ.

ലക്ഷദ്വീപിലെ പല ദ്വീപുകളും അറിയപ്പെടുന്ന വിനോദ സഞ്ചാര കേന്ദ്രങ്ങളാണ്. ഇതിൽ ടൂറിസ്റ്റ് ശ്രദ്ധ ആകർഷിക്കുന്ന പ്രധാന സ്ഥലം ബങ്കാരം ആണ്. 120 കിലോമീറ്ററോളം വിസ്തൃതിയിൽ പരന്നു കിടക്കുന്ന ഈ ദ്വീപ് പവിഴപ്പുറ്റുകളുടെ കലവറയാണ്. ഇവിടെ ആൾത്താമസം ഇല്ല എന്നതാണ് മറ്റൊരു പ്രത്യേകത.

നാളികേരവും മത്സ്യ സമ്പത്തുമാണ് ലക്ഷദ്വീപുകാരുടെ പ്രധാന വരുമാന മാർഗം. വിനോദസഞ്ചാര മേഖലയും ഒരു പ്രധാന സാമ്പത്തിക സ്രോതസ്സ് ആണെങ്കിലും സാധാരണ ജനങ്ങളുടെ ജീവിതം കൂടുതലും മത്സ്യബന്ധനത്തെ ആശ്രയിച്ചാണ്. ബേപ്പൂരും കൊച്ചിയുമാണ് ലക്ഷദ്വീപിന് ഏറ്റവും അടുത്തുള്ള വിപണന കേന്ദ്രങ്ങൾ. ചൂരമത്സ്യം ഉണക്കി (മാസ്) എടുത്താണ് വാണിജ്യാവശ്യങ്ങൾക്കായി എത്തിക്കുന്നത്. ഇത് കൂടാതെ വിവിധ മത്സ്യങ്ങളും കയറ്റുമതി ചെയ്യാറുണ്ട്.

തീയറ്ററുകളില്ല എന്നതാണ് ലക്ഷദ്വീപിലെ മറ്റൊരു പ്രത്യേകത. ആകർഷണീയമായ പ്രകൃതിഭംഗി കൊണ്ട് തന്നെ സിനിമാക്കാരെ ഒരുപാട് ആകർഷിക്കുന്ന ഒരു പ്രദേശം കൂടിയാണിത്. രാമു കാര്യാട്ട് ചിത്രമായ 'ദ്വീപ്' ആണ് ലക്ഷദ്വീപിൽ ചിത്രീകരിച്ച ആദ്യചിത്രം. പൃഥ്വിരാജ് ചിത്രമായ അനാർക്കലിയുടെ ഭൂരിഭാഗവും ചിത്രീകരിച്ചത് ലക്ഷദ്വീപിൽ വച്ചാണ്.

നാഷണൽ ക്രൈം റെക്കോഡ്സ് ബ്യൂറോയുടെ 2019-ലെ കണക്കുകൾ അനുസരിച്ച് കുറ്റകൃത്യനിരക്ക് ഏറ്റവും കുറഞ്ഞ പ്രദേശങ്ങളിൽ ഒന്നാണ് ലക്ഷദ്വീപ്. ഐ.പി.സിയും പ്രാദേശിക നിയമങ്ങളും അനുസരിച്ച് ലക്ഷദ്വീപിൽ ആകെ 182 കുറ്റകൃത്യങ്ങളാണ് 2019ൽ റിപ്പോർട്ട് ചെയ്തിരിക്കുന്നത്.

കേരളത്തില്‍ നിന്ന് അധികം ദൂരമില്ലാത്ത കേരളത്തിന് പുറത്ത് മലയാളം സംസാരിക്കുന്ന ഏക ഭൂപ്രദേശമായ ലക്ഷദ്വീപിന്റെ രാഷ്ട്രീയ പാരമ്പര്യം പക്ഷെ കേരളത്തില്‍ നിന്നും തീര്‍ത്തും വ്യത്യസ്തമാണ്. കേന്ദ്ര ഭരണപ്രദേശമായ ലക്ഷദ്വീപ് മുസ്ലീം ഭൂരിപക്ഷ മേഖലയാണ്. ഒരൊറ്റ ലോക്‌സഭാ സീറ്റ് മാത്രമുള്ള രാജ്യത്തെ ഏറ്റവും ചെറിയ ലോക്സഭാ മണ്ഡലമായ ഇവിടം പട്ടികവര്‍ഗ സംവരണ മണ്ഡലമാണ്.  കേന്ദ്ര ഭരണപ്രദേശമായതു കൊണ്ട് തന്നെ ദേശീയ രാഷ്ട്രീയ കക്ഷികളുടെ ഭാഗമാകുന്നതിനാണ് ഇവിടുത്തുകാര്‍ക്ക് താത്പ്പര്യമെന്നതും ശ്രദ്ധേയമാണ്.