Explained | ചൈനീസ് ഫണ്ടിങ്ങ്, ഇന്ത്യക്കെതിരെ ഗൂഢാലോചന; ന്യൂസ് ക്ലിക്കിനെതിരെ ഡൽഹി പൊലീസ് കണ്ടെത്തിയ വിവരങ്ങൾ

കശ്മീരും അരുണാചൽപ്രദേശും ഇന്ത്യയുടെ ഭാഗമല്ലെന്നും ഇവ തർക്കഭൂമിയാണെന്ന് പ്രചരിപ്പിക്കാനും വാർത്താ പോർട്ടലായ ന്യൂസ്ക്ലിക്ക് ശ്രമിച്ചെന്ന് ഡൽഹി പോലീസ് പറയുന്നു. ന്യൂസ്‌ക്ലിക്ക് സ്ഥാപകനും ചീഫ് എഡിറ്ററുമായ പ്രബീർ പുർകയസ്ത, അമേരിക്കൻ കോടീശ്വരൻ നെവിൽ റോയ് സിംഘം, നെവിൽ റോയ് സിംഘത്തിന്റെ ഉടമസ്ഥതയിലുള്ള ഷാങ്ഹായ് ആസ്ഥാനമായുള്ള സ്റ്റാർസ്ട്രീം കമ്പനിയിലെ മറ്റ് ചില ചൈനീസ് ജീവനക്കാർ എന്നിവർ തമ്മിൽ ഇതു സംബന്ധിച്ച് ഇമെയിലുകൾ കൈമാറിയതായും ഡൽഹി പോലീസിന്റെ പ്രത്യേക സെൽ ആരോപിച്ചു.

ഇന്ത്യയുടെ പരമാധികാരവും അഖണ്ഡതയും തകർക്കുക എന്ന ഉദ്ദേശത്തോടെ ഇവർ ഗൂഢാലോചന നടത്തിയെന്നും ഇതിന്റെ ഭാഗമായി ഇന്ത്യയിലെ ചിലരും ചില വിദേശ സ്ഥാപനങ്ങളും ഇതിനായി കോടികളുടെ വിദേശ ഫണ്ട് നിക്ഷേപിച്ചതായും ഡൽഹി പോലീസിന്റെ റിമാൻഡ് കോപ്പിയിൽ പറയുന്നു. ”2018 ഏപ്രിൽ മുതൽ അഞ്ച് വർഷത്തിനുള്ളിൽ ഇത്തരം കോടിക്കണക്കിന് രൂപയുടെ ഫണ്ടുകൾ നിയമവിരുദ്ധമായി ന്യൂസ് ക്ലിക്കിന് ലഭിച്ചു. പ്രബീർ പുർകയസ്ത, അമിത് സെൻഗുപ്ത, ദൊരൈസ്വാമി രഘുനന്ദൻ, ബപ്പാടിത്യ സിൻഹ, ഗൗതം നവ്‌ലഖ, ഗീത ഹരിഹരൻ, അമിത് ചക്രവർത്തി, എം/എസ് വേൾഡ് വൈഡ് മീഡിയ ഹോൾഡിംഗ് എൽഎൽസി എന്നിവർക്കെല്ലാം പിപികെ ന്യൂസ് ക്ലിക്ക് സ്റ്റുഡിയോയിൽ ഓഹരിയുണ്ട്”, ഡൽഹി പോലീസ് പറഞ്ഞു.

ഡൽഹി പോലീസ് പറയുന്നതനുസരിച്ച്, ഭീമാ കൊറേഗാവ് കേസിൽ 2020 ൽ ജയിൽ വാസം അനുഭവിക്കുകയും ഇപ്പോൾ വീട്ടുതടങ്കലിൽ കഴിയുകയും ചെയ്യുന്ന ആക്ടിവിസ്റ്റ് ഗൗതം നവ്‌ലാഖ ന്യൂസ്‌ക്ലിക്കിന്റെ ഓഹരിയുടമയാണ്. ഇയാൾ ഇന്ത്യ വിരുദ്ധവും നിയമവിരുദ്ധവുമായ പ്രവർത്തനങ്ങളിൽ ഏർപ്പെട്ടിരുന്നതായും പോലീസ് പറയുന്നു.

ന്യൂസ്‌ക്ലിക്കിനെതിരായ കള്ളപ്പണം വെളുപ്പിക്കൽ ആരോപണവുമായി ബന്ധപ്പെട്ട്, കൂടുതൽ വിവരങ്ങൾ ശേഖരിക്കുന്നതിനായി 2021 ഫെബ്രുവരി 9-ന് എൻഫോഴ്‌സ്‌മെന്റ് ഡയറക്ടറേറ്റിലെ ഉദ്യോഗസ്ഥർ കമ്പനിയിൽ എത്തിയിരുന്നു. അഞ്ച് ദിവസം നീണ്ടുനിന്ന തിരച്ചിലിൽ കമ്പനിയുടെ പ്രൊമോട്ടറായ പ്രബിർ പുർക്കയസ്തയുടെ വസതി ഉൾപ്പെടെ പത്തോളം സ്ഥലങ്ങൾ റെയ്ഡ് ചെയ്യുകയുമുണ്ടായി. സംശയാസ്പദമായി നടത്തിയ വിദേശ പണമിടപാടുകളിലൂടെ പിപികെക്ക് 38 കോടി രൂപ ലഭിച്ചതായും ഇഡി പറഞ്ഞിരുന്നു.

തങ്ങൾ ഏതെങ്കിലും പ്രൊപ്പ​ഗാന്തയുടെ ഭാ​ഗമായി പ്രചാരണങ്ങൾ നടത്തിയിട്ടില്ലെന്നും അനധികൃത രീതിയിൽ ഫണ്ട് ശേഖരിച്ചിട്ടില്ലെന്നും ന്യൂസ്ക്ലിക്ക് പ്രതികരിച്ചു. ”ന്യൂസ്‌ക്ലിക്കിന് ലഭിച്ച എല്ലാ ഫണ്ടിംഗും നിയമപരമായ രീതിയിലൂടെയാണ്. നിയമം അനുശാസിക്കുന്നതനുസരിച്ച്, ബന്ധപ്പെട്ട അധികൃതരെ ഇക്കാര്യം അറിയിച്ചിട്ടുണ്ട്”, ന്യൂസ്ക്ലിക്ക് ഒക്‌ടോബർ 4 ന് പുറത്തിറക്കിയ പ്രസ്താവനയിൽ പറഞ്ഞു.