അഴികളില്ലാത്ത ജനലിലൂടെ രക്ഷപെട്ടത് ആര്? വണ്ടിപ്പെരിയാർ കേസിൽ അന്വേഷണത്തെ കോടതി വിമർശിച്ചത് എന്തുകൊണ്ട് ?

അഞ്ചരവയസ്സുകാരിയുടേത് കൊലപാതകം തന്നെയാണെന്ന് പറയുന്ന വിധിയുടെ പകർപ്പിൽ അന്വേഷണ ഉദ്യോഗസ്ഥൻ (PW 43-പ്രോസിക്യൂഷൻ സാക്ഷി ) അന്നത്തെ വണ്ടിപ്പെരിയാർ സ്റ്റേഷൻ ഹൗസ് ഓഫീസർ ടി. ഡി. സുനിൽ കുമാറിന് എതിരെ രൂക്ഷമായ പരാമർശങ്ങളാണ് ഉള്ളത്.കുട്ടിയുടെ ലൈംഗിക ചൂഷണം നടന്നെന്നുള്ള വാദവും കോടതി അംഗീകരിക്കുന്നുണ്ട്. എന്നാൽ നിർദാക്ഷിണ്യം നീതി നടപ്പാക്കുന്ന കോടതിക്ക് മുമ്പിൽ സംശയാതീതമായി തെളിവുകൾ ഹാജരാകുന്നതിൽ പ്രോസിക്യൂഷനും പരാജയപ്പെട്ടു.

വണ്ടിപ്പെരിയാർ പോലീസ് സ്റ്റേഷനിൽ നിന്ന് അധികം അകലെയല്ല ചുരക്കുളം എസ്റ്റേറ്റ്. അവിടത്തെ രണ്ടു തൊഴിലാളികളുടെ മകളായ പെൺകുഞ്ഞിന്റെ ജഡം ലയത്തിലെ (തൊഴിലാളികളുടെ വാസസ്ഥലം ) മുറിയിൽ കണ്ടെത്തിയത് 2021 ജൂൺ 30നാണ്.ഇതേ ലയത്തിലെ താമസക്കാരനാണ് പ്രതിയും.കുടുംബം പൂജാമുറിയായി ഉപയോഗിക്കുന്ന മുറിയിലാണ് കെട്ടിത്തൂക്കിയ നിലയിൽ ജഡം കണ്ടെത്തിയത്. .

"അന്വേഷണത്തിലുടനീളം അലസമായ നിലപാട് എടുത്തതും ഒരു അന്വേഷണ ഉദ്യോഗസ്‌ഥനിൽ നിന്ന് പ്രതീക്ഷിക്കുന്ന കൗശലവും ബുദ്ധിവൈഭവവും ഇല്ലാതെ തെളിവു ശേഖരണത്തിന് അശാസ്ത്രീയവുമായ മാർഗങ്ങൾ സ്വീകരിച്ചതും കേസിലെ കണിശതയോടെയും കൃത്യതയോടെയും ഉള്ള തെളിവുശേഖരണത്തെ ഗുരുതരമായി ബാധിച്ചിട്ടുണ്ട് എന്ന് കോടതി കണ്ടെത്തുന്നു."

മിഠായിയും ഭക്ഷണസാധനങ്ങളും മറ്റും നൽകി സ്നേഹത്തോടെ പെരുമാറിയ പ്രതി പെൺകുട്ടിക്കു 3 വയസ്സുള്ളപ്പോൾ മുതൽ ലൈംഗികമായി ചൂഷണം ചെയ്തിരുന്നതായി പൊലീസ് കണ്ടെത്തി. ഇതിനെ സാധൂകരിക്കുന്ന സാക്ഷിമൊഴികളും ലഭിച്ചു.

പ്രതി കുറ്റം സമ്മതിച്ചതാണെന്നും പിന്നെയെങ്ങനെ രക്ഷപ്പെട്ടെന്നും ഇടുക്കി എംപി ഡീൻ കുര്യാക്കോസ്. ചോദിച്ചു. ഡിവൈഎഫ്ഐക്കാരനായ പ്രതിയെ രക്ഷിക്കാൻ സിപിഎം ഇടപെട്ടുവെന്ന് ആരോപിച്ച അദ്ദേഹം വധശിക്ഷയ്ക്കു വിധിക്കുന്ന തരത്തിൽ ശിക്ഷാനടപടികൾ പോകണമെന്നും ആ തരത്തിലേക്കു ജനമനസ്സാക്ഷി ഉണരണമെന്നും ആവശ്യപ്പെട്ടു.

'അവൻ ഡി വൈ എഫ് ഐ നേതാവാണ് എന്നല്ലാതെ എന്ത് തെളിവാ പോലീസിന്റെ കയ്യിൽ ഉണ്ടായിരുന്നത് ?' വിധിക്കു ശേഷം പ്രതിഭാഗം അഭിഭാഷകനായ എസ് കെ ആദിത്യൻ മാധ്യമങ്ങളോട് ചോദിച്ചു.വളരെ വ്യക്തമായി കോടതി നീതി നടപ്പാക്കി. കോടതി വളരെ ക്ലിയറായി നീതി നടപ്പാക്കി. സാമ്പത്തികമായും സാമൂഹികമായും പിന്നോക്കം നിൽക്കുന്നയൊരാളെ പ്രതിയാക്കുകയാണ് ചെയ്തത്. പൊലീസ് സ്റ്റേഷൻ ഹൗസ് ഓഫീസറും മറ്റും ചേർന്ന് കൃത്രിമ തെളിവുണ്ടാക്കുകയും കള്ള സാക്ഷികളെ ഒരുക്കുകയുമായിരുന്നു. എല്ലാ തെളിവുകളും ഇഴകീറി പരിശോധിച്ചാണ് കോടതി ഇത്തരമൊരു ഉത്തരവിലേക്ക് എത്തിയിരിക്കുന്നത്. കൃത്രിമ തെളിവുകളാണ് പൊലീസ് ഉണ്ടാക്കിയത്. എന്തു തെളിവാണ് പൊലീസിന്റെ കൈയിലുള്ളത്? യാതൊരുവിധി ശാസ്ത്രീയ തെളിവുകളും പൊലീസിന്റെ പക്കലുണ്ടായിരുന്നില്ല’’- അഭിഭാഷകൻ പറഞ്ഞു.

വിധി വന്നപ്പോൾ നട്ടുച്ചയായി. കോടതിക്ക് പുറത്ത് പൊള്ളുന്ന വെയിലിൽ അതിനേക്കാൾ കത്തുന്ന മനസുമായി കാത്തു നിൽക്കുകയായിരിന്നു ജനം. രണ്ടാം നിലയിലെ കോടതി മുറിയിൽ നിന്ന് പോലീസ് ആ 23 കാരനെ രോഷാകുലമായ ജനക്കൂട്ടത്തിൽ നിന്നും അത്യന്തം സുരക്ഷിതമായി വാഹനത്തിലേക്ക് എത്തിക്കുന്ന ദൃശ്യം ഏറെ ചിന്തനീയമാണ്. ഈ കരുതലിന്റെ ഒരംശമെങ്കിലും അന്വേഷണ ഉദ്യോഗസ്ഥ നായ പോലീസ് ഓഫിസർ രണ്ട് പാവപ്പെട്ട തോട്ടം തൊഴിലാളികളുടെ ദത്തുപുത്രിയായ അഞ്ചര വയസുകാരിയോട് മരണശേഷം കാണിച്ചിരുന്നുവെങ്കിൽ ഡിസംബർ 14 ലെ വിധി മറ്റൊന്നാവുമായിരുന്നു എന്നതിന് കോടതിയുടെ വിധി പകർപ്പ് തന്നെ തെളിവ്.