രാജീവ് ഗാന്ധിയുടെ ചരമദിനം തീവ്രവാദ വിരുദ്ധ ദിനമായി ആചരിക്കുന്നത് എന്തുകൊണ്ട്?

ഇന്ത്യാ ചരിത്രത്തിൽ ഒരു കറുത്ത അദ്ധ്യായം എഴുതിചേർത്തുകൊണ്ട് 1991 മെയ് 21 കടന്നു പോയത്. 1991 മെയ് 21-ലെ പൊതു തെരഞ്ഞെടുപ്പു പ്രചാരണ വേളയിൽ, തമിഴ് നാട്ടിലെ ശ്രീപെരുംപുത്തൂരിൽ വച്ച് എൽ ടി ടി ഇ തീവ്രവാദികളാലാണ് ഇന്ത്യയുടെ ആറാമത്തെ പ്രധാനമന്ത്രിയായിരുന്ന രാജീവ് ഗാന്ധി വധിക്കപ്പെട്ടത്. രാജീവ് ഗാന്ധിയെ പൂമാല അണിയിക്കാൻ എന്ന രീതിയിലാണ് ബെൽറ്റ് ബോംബ് ധരിച്ച ഒരു സ്ത്രീ ജനക്കൂട്ടത്തിലൂടെ മുൻ പ്രധാനമന്ത്രിയുടെ അടുക്കലേക്കെത്തിയത്. ചാവേറായി കൊല്ലപ്പെടാനായി എത്തിയ ആ സ്ത്രീ അന്ന് കവ‍‍ർന്നത്, രാജീവ് ഗാന്ധിയുടെയും മറ്റ് 16 പേരുടെയും ജീവനായിരുന്നു. ആ ഇരുണ്ട ദിനം കഴിഞ്ഞ് ഇന്നേക്ക് 30 കൊല്ലങ്ങൾ പിന്നിട്ടിരിക്കുന്നു. തുടർന്ന് വന്ന സർക്കാരാണ്  മെയ് 21 'തീവ്രവാദ വിരുദ്ധ ദിനം' ആയി പ്രഖ്യാപിച്ചത്.

ഇന്നത്തെ ഈ ദിനത്തിൽ രാജ്യത്തുടനീളമുള്ള എല്ലാ സർക്കാർ ഉദ്യോഗസ്ഥരോടും ഭീകരതയ്‌ക്കെതിരെ പ്രതിജ്ഞയെടുക്കാൻ ആഭ്യന്തര മന്ത്രാലയം ആവശ്യപ്പെടുന്നു. ഓരോ വർഷവും, ഇന്ത്യയിലെ എല്ലാ സർക്കാർ ഓഫീസുകളിലും ഈ പ്രവർത്തനം നടക്കുന്നുണ്ട്. ഏതെങ്കിലും തരത്തിലുള്ള യുദ്ധം ജയിക്കാനായുള്ള ശരിയായ മാർഗ്ഗം തീവ്രവാദ പ്രവർത്തനങ്ങളിലൂടെ ഒരിക്കലും ഉണ്ടാകില്ലെന്ന് ഈ ദിവസം നമ്മെ ഓർമ്മിപ്പിക്കുന്നു. ഭീകരവാദ പ്രവ‍‍ർത്തനങ്ങൾ മാരകമായ അക്രമണത്തിന് കാരണമാകുമെന്ന് മാത്രമല്ല, ലോകത്തിൻ്റെ സുരക്ഷയ്ക്കും സ്ഥിരതയ്ക്കും തന്നെ ഭീഷണിയുമുയ‍ർത്തുന്നു.