#AskSRK | സൽമാൻ ഖാൻ എപ്പോഴും ഭായ് തന്നെയാണെന്ന് ഷാരുഖ് ഖാൻ

സൽമാൻ ഖാനെ കുറിച്ച് ഒരു ആരാധകന്റെ ചോദ്യത്തിന് ഇങ്ങനെയായിരുന്നു ഷാരൂഖ് ഖാന്റെ മറുപടി, 'ഭായ് (സൽമാൻ) എപ്പോഴും ഭായ് തന്നെയാണ്!' രണ്ട് സൂപ്പർ താരങ്ങളും ദിവസങ്ങൾക്ക് മുമ്പ് ഷാരൂഖിന്റെ അടുത്ത ചിത്രമായ പഠാന് വേണ്ടി ഒരുമിച്ച് ഷൂട്ട് ചെയ്തിരുന്നു.

ബോളിവുഡിലെ സുഹൃത്തുക്കളെക്കുറിച്ച് ചോദിച്ചപ്പോൾ വളരെ രസകരമായ മറുപടിയാണ് എസ് ആർകെയ്ക്ക് ഉണ്ടായിരുന്നത്. ആദ്യം ചോദ്യം വായിക്കാം 'സാർ, താങ്കൾ ഒരിക്കൽ കോഫീ വിത്ത് കരൺ പരിപാടിയിൽ വെച്ച് സൗഹൃദം സൂക്ഷിക്കാൻ അറിയാത്ത വ്യക്തിയാണ് താങ്കൾ എന്നു പറഞ്ഞിരുന്നു, താങ്കൾ ഇപ്പോഴും അങ്ങനെ തന്നെയാണോ?' ഇതിന് താരം കൊടുത്ത മറുപടി ഇങ്ങനെ, 'ഇപ്പോൾ എന്റെ കുട്ടികൾ എനിക്ക് സുഹൃത്തുക്കളായുണ്ട്.'

ഖയാമത് സേ ഖയാമത് തക, ദങ്കൽ, ലഗാൻ, ത്രീ ഇഡിയറ്റ്സ് എന്നിവയാണ് ഷാറൂഖ് ഖാന്റെ ഏറ്റവും പ്രിയപ്പെട്ട ആമിർ ഖാൻ ചിത്രങ്ങൾ.

23 വയസ്സുകാരനായ ഒരു യുവാവ് താരത്തോട് ഏത് കരിയർ തെരെഞ്ഞെടുക്കണം എന്നതിനെക്കുറിച്ച് ആശയകുഴപ്പത്തിലാണെന്ന് പറഞ്ഞപ്പോൾ അതിനും താരത്തിന്റെ പക്കൽ മറുപടിയുണ്ടായിരുന്നു. 'പ്രായം ഒരു സംഖ്യ മാത്രമാണ്… നന്നായി പ്രയത്നിക്കുക.. എല്ലാം ശരിയാകും. ഞാൻ സിനിമയിൽ അഭിനയിക്കാൻ തുടങ്ങിയത് ഇരുപത്തിയാറാമത്തെ വയസ്സിലാണ്. വർഷങ്ങൾ വെറുതെ പാഴാക്കാതിരുന്നാൽ മാത്രം മതി.'

ജബ് ഹാരി മെറ്റ് സേജൽ എന്ന സിനിമയുടെ രണ്ടാം ഭാഗം എന്തിനാണ് നിർമിക്കുന്നത് എന്നായിരുന്നു ഒരു ആരാധകന്റെ സംശയം. 'ഹഹാ. എന്തു കൊണ്ടാണ് പരാജയപ്പെട്ട ഒരു സിനിമയുടെ രണ്ടാം ഭാഗം വേണമെന്ന് ആളുകൾ റ്റ്വിറ്ററിൽ ആവശ്യപ്പെട്ടു കൊണ്ടിരിക്കുന്നത്?'.