'വ്യാജപ്രചരണങ്ങളിൽ വഞ്ചിതരായി മികച്ച സിനിമാനുഭവം നഷ്ടപ്പെടുത്തരുത്': ചാവേറിന് പിന്തുണയുമായി ഷിബു ബേബി ജോൺ
- Published by:user_57
- news18-malayalam
Last Updated:
'കാണുക പോലും ചെയ്യാതെ ഒരു നല്ല സിനിമയ്ക്കെതിരെ ഡിഗ്രേഡിങ് നടത്തുന്നത് ഈ സിനിമ തുറന്നു പിടിക്കുന്ന കണ്ണാടിയിൽ സ്വന്തം വൈകൃതം ദർശിക്കുന്നവരാണ്'
കാലിക പ്രസക്തിയുള്ള രാഷ്ട്രീയ സാമൂഹിക പ്രശ്‌നങ്ങളുടെ ചില നേർക്കാഴ്ചകളുമായി പ്രേക്ഷകരിലേക്ക് എത്തിയ ടിനു പാപ്പച്ചൻ ചിത്രം ‘ചാവേർ’ (Chaver) വിജയകരമായി പ്രദർശനം തുടരുകയാണ്. കുഞ്ചാക്കോ ബോബന്റെ വേറിട്ട ഗെറ്റപ്പും മികവാർന്ന അഭിനയവും കൂടെ ആന്റണി വർഗീസ്, അർജുൻ അശോകൻ എന്നിവരും ഒന്നിച്ചപ്പോൾ മികച്ചൊരു ചലച്ചിത്രാനുഭവമാണ് ചിത്രം പ്രേക്ഷകർക്ക് സമ്മാനിച്ചത്.
തന്റെ മുൻചിത്രങ്ങളെ അപേക്ഷിച്ച് ഒരു ഇമോഷണൽ ത്രില്ലറായിട്ടാണ് ടിനു പാപ്പച്ചൻ ചിത്രം ഒരുക്കിയിരിക്കുന്നത്. നടനും സംവിധായകനുമായ ജോയ് മാത്യുവാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. ഇപ്പോഴിതാ ചിത്രത്തെ പിന്തുണച്ച് മോഹൻലാൽ – ലിജോ ജോസ് പെല്ലിശ്ശേരി ചിത്രം മലൈക്കോട്ടൈ വാലിബൻ എന്ന ചിത്രത്തിന്റെ നിർമ്മാതാവും രാഷ്ട്രീയ പ്രവർത്തകനുമായ ഷിബു ബേബി ജോൺ കുറിച്ച വാക്കുകൾ ശ്രദ്ധേയമാവുകയാണ്. ചിത്രത്തിന് മേൽ വിവിധ കോണുകളിൽ നിന്നും സൈബർ സ്‌പെയ്‌സിൽ ആക്രമണം കടുത്തിരുന്നു:
ഞാനിന്ന് ചാവേർ കണ്ടു. ചിത്രം മുന്നോട്ടുവയ്ക്കുന്ന പ്രമേയത്തിൻ്റെ സമകാലിക പ്രസക്തി കൊണ്ടും പ്രേക്ഷകരെ പിടിച്ചിരുത്തുന്ന മേക്കിങ് സ്റ്റൈൽ കൊണ്ടും അഭിനേതാക്കളുടെ പ്രകടനം കൊണ്ടും മികച്ചൊരു ചിത്രമാണ് ചാവേർ. സിനിമ കണ്ടിറങ്ങിയവരുടെയെല്ലാം മനസ് നിറയ്ക്കാൻ ഈ ചിത്രത്തിന് കഴിയുന്നുവെന്നത് നിസാരമല്ല. ഈ ചിത്രത്തിലെ കഥാപാത്രങ്ങളെ നമുക്ക് ചുറ്റും കാണാം. നമ്മൾ ജീവിക്കുന്ന സമൂഹത്തിലെ രാഷ്ട്രീയ അപചയവും രാഷ്ട്രീയത്തിനുള്ളിലെ ജാതിയതയുമെല്ലാം തുറന്നുകാട്ടാൻ ഈ ചിത്രത്തിന് സാധിച്ചിട്ടുണ്ടെന്നത് അഭിനന്ദനാർഹമാണ്. എന്നാൽ, ഈ ചിത്രത്തെ തകർക്കാൻ ആദ്യദിനം മുതൽ തന്നെ ബോധപൂർവ്വമായ ശ്രമങ്ങൾ പല കോണുകളിൽ നിന്നും ഉയർന്നുവരുന്നുണ്ട്. കാണുക പോലും ചെയ്യാതെ ഒരു നല്ല സിനിമയ്ക്കെതിരെ ഡിഗ്രേഡിങ് നടത്തുന്നത് ഈ സിനിമ തുറന്നു പിടിക്കുന്ന കണ്ണാടിയിൽ സ്വന്തം വൈകൃതം ദർശിക്കുന്നവരാണ്, ഈ സിനിമ പറയുന്ന വസ്തുതകൾ ജനങ്ങളിലേക്ക് എത്തരുതെന്ന് ആഗ്രഹിക്കുന്നവരാണ്. ആ കുഴിയിൽ നാം വീഴരുത്. ചാവേർ നാമോരോരുത്തരും തിയേറ്ററിൽ തന്നെ പോയി കാണേണ്ട സിനിമയാണ്. വ്യാജപ്രചരണങ്ങളിൽ വഞ്ചിതരായി മികച്ച സിനിമാനുഭവം നാം നഷ്ടപ്പെടുത്തരുത്. മനോഹരമായ ഒരു തീയേറ്റർ അനുഭവം സമ്മാനിച്ചതിന് സംവിധായകൻ ടിനു പാപ്പച്ചനും തിരക്കഥാകൃത്ത് ജോയ് മാത്യുവിനും അഭിനന്ദനങ്ങൾ.
advertisement
Summary: Shibu Baby John in favour of Chaver movie amid full on purposeful degrading attempts
സിനിമാ, ടെലിവിഷൻ, OTT ലോകത്തു നിന്നും ഏറ്റവും പുതിയ എന്റർടൈൻമെന്റ് വാർത്തകൾക്കായി News18 മലയാളത്തിനൊപ്പം വരൂ
Location :
Thiruvananthapuram,Kerala
First Published :
October 12, 2023 1:07 PM IST
മലയാളം വാർത്തകൾ/ വാർത്ത/Film/
'വ്യാജപ്രചരണങ്ങളിൽ വഞ്ചിതരായി മികച്ച സിനിമാനുഭവം നഷ്ടപ്പെടുത്തരുത്': ചാവേറിന് പിന്തുണയുമായി ഷിബു ബേബി ജോൺ
