'അന്ന് ഉപയോഗിച്ച വാക്കുകൾ ശരിയായില്ല'; 15 കൊല്ലം മുമ്പ് ഋത്വിക് റോഷനെ കുറിച്ച് നടത്തിയ പരാമർശത്തിൽ രാജമൗലി

പ്രഭാസിന്റെ മുന്നിൽ ഋത്വിക് റോഷൻ ഒന്നുമല്ലെന്നായിരുന്നു രാജമൗലിയുടെ പരാമർശം. ഏത് സാഹചര്യത്തിലാണ് സംവിധായകൻ ഇത് പറഞ്ഞതെന്നും വ്യക്തമല്ലായിരുന്നു. ഇപ്പോൾ താൻ അന്ന് നടത്തിയ പരാമർശത്തെ കുറിച്ച് രാജമൗലി തന്നെ വിശദീകരണവും നൽകിയിരിക്കുകയാണ്.

തന്റെ ഉദ്ദേശം ഋത്വിക് റോഷനെ അപമാനിക്കുക എന്നതായിരുന്നില്ലെന്നും എന്നാൽ താൻ ഉപയോഗിച്ച വാക്കുകൾ തെറ്റായിപ്പോയെന്നും രാജമൗലി ഇന്ന് തുറന്നു സമ്മതിച്ചു.

Also Read- ‘ഞാന്‍ ദൈവത്തെ കണ്ടു’ സ്റ്റീവന്‍ സ്പില്‍ബെര്‍ഗിനൊപ്പം എസ്എസ് രാജമൗലി

ഗോൾഡൻ ഗ്ലോബ് വേദിയിലായിരുന്നു സംവിധായകന്റെ ഇക്കാര്യം വ്യക്തമാക്കിയത്. “ഇത് വളരെ വർഷങ്ങൾക്കു മുമ്പുള്ളതാണ്. ഒരു 15-16 വർഷമെങ്കിലും പഴക്കമുണ്ടാകും. പക്ഷേ, ഞാൻ ഉപയോഗിച്ച വാക്കുകൾ തെറ്റായിപ്പോയി. അത് തുറന്നു സമ്മതിക്കുന്നു. ഋത്വിക് റോഷനെ അപമാനിക്കുക എന്നതായിരുന്നില്ല തന്റെ ഉദ്ദേശം. അദ്ദേഹത്തെ ഒരുപാട് ബഹുമാനിക്കുന്നു.”-

Also Read- RRR ബോളിവുഡ് ചിത്രമല്ല, അതൊരു തെലുങ്കു ചിത്രം: സംവിധായകന്‍ എസ്.എസ് രാജമൗലി

വർഷങ്ങൾക്ക് ശേഷം വിജയത്തിന്റെ അത്യുന്നതങ്ങളിൽ നിൽക്കുമ്പോഴും മുമ്പ് ചെയ്തത് ശരിയായില്ലെന്ന് തുറന്നു പറഞ്ഞ രാജമൗലിയെ അഭിനന്ദിക്കുകയാണ് സോഷ്യൽമീഡിയ.

റെഡ്ഡിറ്റിലാണ് രാജമൗലിയുടെ പഴയ വീഡിയോ പ്രചരിച്ചത്. വീഡിയോയിൽ രാജമൗലി പറയുന്നത് ഇങ്ങനെ, “രണ്ട് വർഷം മുമ്പ് ധൂം 2 ഇറങ്ങിയപ്പോൾ എന്തുകൊണ്ടാണ് ബോളിവുഡിൽ മാത്രം ഇത്രയും ഗംഭീരമായ സിനിമകൾ വരുന്നു എന്ന് ഞാൻ അത്ഭുതപ്പെട്ടിരുന്നു. ഋത്വിക് റോഷനെ പോലുള്ള നായകർ തെലുങ്കിൽ ഇല്ലേ? അപ്പോഴാണ് ബില്ലയിലെ പാട്ടുകളും പോസ്റ്ററുകളും കണ്ടത്. പ്രഭാസിന് മുന്നിൽ ഋത്വിക് റോഷൻ ഒന്നുമല്ല. ഹോളിവുഡ് ലെവലിൽ തെലുങ്ക് സിനിമയെ എത്തിച്ചതിന് സംവിധായകൻ മെഹെർ രമേശിനോട് നന്ദി പറയുകയാണ്”.