സ്ക്രീൻ സമയം ഒരു മണിക്കൂർ; 7 മണിക്ക് ശേഷം ഇന്റർനെറ്റ് വേണ്ട; വിദ്യാർത്ഥികൾക്ക് കർണാടക സർക്കാരിന്റെ ഡിജിറ്റൽ ഡീറ്റോക്സ് പോളിസി

ചെറിയ കുട്ടികൾ ഈ ഉപകരണങ്ങൾ കൂടുതൽ ഉത്തരവാദിത്തത്തോടെ ഉപയോഗിക്കുന്നതിലേക്ക് വളരുക എന്നതാണ് ഡിജിറ്റൽ ഡീടോക്സ് നയത്തിന്റെ ലക്ഷ്യം. സ്കൂളുകളും അധ്യാപകരും വിദ്യാർത്ഥികളെ ഡിജിറ്റൽ പെരുമാറ്റം സജീവമായി പഠിപ്പിക്കണമെന്നും, അവരുടെ സ്ക്രീൻ സമയം നിരീക്ഷിക്കണമെന്നും, അമിത ഉപയോഗത്തിന്റെ പ്രത്യാഘാതങ്ങൾ ചൂണ്ടിക്കാട്ടണമെന്നും കരട് നയം അനുശാസിക്കുന്നു.

വിദ്യാർത്ഥികൾക്കിടയിൽ അമിതമായ സ്‌ക്രീൻ ഉപഭോഗം ഉണ്ടാകുന്നതിനെക്കുറിച്ചും അത് അവരുടെ വൈകാരികവും ശാരീരികവുമായ ആരോഗ്യത്തെ എങ്ങനെ ബാധിക്കുന്നു എന്നതിനെക്കുറിച്ചും വർദ്ധിച്ചുവരുന്ന ആശങ്കകൾക്കിടയിലാണ് കരട് നയം പുറത്തിറക്കിയിരിക്കുന്നത്.

ആരോഗ്യ-കുടുംബക്ഷേമ വകുപ്പ് കർണാടക സംസ്ഥാന മാനസികാരോഗ്യ അതോറിറ്റിയും നാഷണൽ ഇൻസ്റ്റിറ്റ്യൂട്ട് ഓഫ് മെന്റൽ ഹെൽത്ത് ആൻഡ് ന്യൂറോ സയൻസസും ചേർന്ന് തയ്യാറാക്കിയ ഈ നയം സ്‌ക്രീൻ, മൊബൈൽ ആസക്തിയെ ശീലവുമായി ബന്ധപ്പെട്ട പ്രശ്‌നമായി മാത്രമല്ല, സ്‌കൂളുകളും രക്ഷിതാക്കളും സംസ്ഥാനവും ഒരുമിച്ച് കൈകാര്യം ചെയ്യേണ്ട ഒരു പൊതുജനാരോഗ്യ പ്രശ്‌നമായി കണക്കാക്കുന്നു.

തിങ്കളാഴ്ച മാധ്യമങ്ങളുമായി പങ്കിട്ട കരട് നയം പൊതുജനാഭിപ്രായത്തിനായി പുറത്തുവിട്ടു. 16 വയസ്സിന് താഴെയുള്ള കുട്ടികൾക്ക് സോഷ്യൽ മീഡിയ ഉപയോഗം നിരോധിക്കണമെന്ന് മുഖ്യമന്ത്രി സിദ്ധരാമയ്യ നേരത്തെ തന്റെ ബജറ്റ് പ്രസംഗത്തിൽ നിർദ്ദേശിച്ചിരുന്നു.

സ്കൂളുകളിൽ ഡിജിറ്റൽ ക്ഷേമം, വൈകാരിക നിയന്ത്രണം, സ്ക്രീൻ-ടൈം അവബോധം എന്നിവ വളർത്തുക എന്നതാണ് കരട് നയത്തിന്റെ ലക്ഷ്യമെന്ന് ഉദ്യോഗസ്ഥർ പറയുന്നു. 9-12 ക്ലാസുകളിലെ വിദ്യാർത്ഥികൾ, അധ്യാപകർ, രക്ഷിതാക്കൾ എന്നിവർ ലക്ഷ്യ ഗ്രൂപ്പിൽ ഉൾപ്പെടുന്നു.