ലോക്ക് ഡൗൺ അടുത്ത ഘട്ടം എന്ത്? പ്രധാനമന്ത്രി ഇന്ന് മുഖ്യമന്ത്രിമാരുമായി ചര്‍ച്ച നടത്തും

മുഖ്യമന്ത്രിമാരുമായി ചർച്ച നടത്തുന്ന വിവരം കഴിഞ്ഞ ദിവസമാണ് പ്രധാനമന്ത്രിയുടെ ഓഫീസിൽ നിന്ന് അറിയിച്ചത്. കോവിഡ് 19 നിയന്ത്രണങ്ങളുമായി ബന്ധപ്പെട്ട് കാബിനറ്റ് സെക്രട്ടറി രാജീവ് ഗൗബ കഴിഞ്ഞ ദിവസം എല്ലാ സംസ്ഥാനങ്ങളിലെയും കേന്ദ്രഭരണ പ്രദേശങ്ങളിലെയും ചീഫ് സെക്രട്ടറിമാരും ഹെല്‍ത്ത് സെക്രട്ടറിമാരുമായി ചർച്ച നടത്തിയിരുന്നു. വിവിധ സംസ്ഥാനങ്ങളിലെ നിലവിലെ സാഹചര്യം യോഗത്തിൽ വിലയിരുത്തി. വൈറസിൽ നിന്ന് സംരക്ഷണം എന്നത് അത്യാവശ്യമാണെങ്കിലും സാമ്പത്തിക പ്രവർത്തനങ്ങളും ഊർജിതമാക്കേണ്ട ആവശ്യത്തെക്കുറിച്ച് യോഗത്തിൽ നിർദേശം ഉയര്‍ന്നിരുന്നു. ആ സാഹചര്യത്തിൽ കൂടിയാണ് പ്രധാനമന്ത്രി ഇന്ന് മുഖ്യമന്ത്രിമാരുമായി ചർച്ച നടത്തുന്നത്.

വൈകിട്ട് മൂന്ന് മണിക്കാണ് വീഡിയോ കോൺഫറൻസ്. ലോക്ക് ഡൗണുമായി ബന്ധപ്പെട്ട് ഇത് അഞ്ചാം തവണയാണ് പ്രധാനമന്ത്രി മുഖ്യമന്ത്രിമാരുമാരെ ചർച്ചയ്ക്കായി വിളിച്ചിരിക്കുന്നത്.

ആരോഗ്യമന്ത്രാലയത്തിന്റെ കണക്കുകള്‍ പ്രകാരം രാജ്യത്തെ രോഗ ബാധിതരുടെ എണ്ണത്തിൽ വൻ വർധനവാണുണ്ടായിരിക്കുന്നത്. മൂന്നാം ഘട്ട ലോക്ക് ഡൗൺ ആരംഭിച്ച മെയ് 3ന് 39980 ആയിരുന്നു രോഗബാധിതരെങ്കിൽ ഒരാഴ്ച കൊണ്ട് അത് 62939 ആയി ഉയർന്നു. മരണസംഖ്യയും 1301 ൽ നിന്ന് 2109 ൽ എത്തി നിൽക്കുകയാണ്. ലോക്ക് ഡൗൺ ഏർപ്പെടുത്തിയതിനാൽ രോഗികളുടെ എണ്ണത്തിൽ ദിനംതോറും വൻ കുതിച്ചു ചാട്ടം ഉണ്ടാകുന്നില്ലെങ്കിലും ലോക്ക് ഡൗൺ നടപ്പാക്കിയ മറ്റ് രാജ്യങ്ങളെ അപേക്ഷിച്ച് നോക്കുമ്പോൾ രോഗികളുടെ ഗ്രാഫ് നിരപ്പിലെത്തിക്കാൻ രാജ്യത്തിന് സാധിക്കാത്തത് ആശങ്ക ഉയർത്തുന്നുണ്ട്.

മെയ് 17 ന് ലോക്ക് ഡൗൺ പിൻവലിച്ചാലും കോവിഡ് ഹോട്ട് സ്പോട്ടുകളിലെയും വൈറസ് വ്യാപന മേഖലകളിലെയും നിയന്ത്രണങ്ങൾ കർശനമായി തന്നെ തുടരുമെന്നാണ് സൂചന. കോവിഡ് വ്യാപനത്തിന്റെ പശ്ചാത്തലത്തിൽ മാര്‍ച്ച് 25നാണ് രാജ്യത്ത് സമ്പൂർണ്ണ ലോക്ക് ഡൗൺ പ്രഖ്യാപിച്ചത്. ഏപ്രിൽ 14 ന് അവസാനിക്കേണ്ടിയിരുന്ന ലോക്ക് ഡൗൺ ഇളവുകളോടെ ആദ്യം മെയ് 3വരെയും പിന്നീട് മെയ് 17 വരെയും നീട്ടുകയായിരുന്നു.