സഖ്യം വേണ്ട: ആപ്പിന് മുന്നിൽ വാതിൽ കൊട്ടിയ‍ടച്ച് രാഹുൽ ഗാന്ധി

ഡൽഹിയിൽ ഏഴ് സീറ്റുകളിലും കോൺഗ്രസ് വിജയിച്ചിരിക്കണം.. ഇക്കാര്യം ബൂത്ത്തലത്തിൽ പ്രവര്‍ത്തകർ ഉറപ്പാക്കണമെന്നാണ് അദ്ദേഹം അറിയിച്ചിരിക്കുന്നത്. 2014 ൽ ഡൽഹിയിൽ ഒരു സീറ്റ് പോലും കോൺഗ്രസിന് നേടാനായിരുന്നില്ല. കോണ്‍ഗ്രസിനെ തകർത്തെറിഞ്ഞ് എല്ലാ സീറ്റുകളും ബിജെപി തന്നെയാണ് വിജയിച്ചത്. തെരഞ്ഞെടുപ്പിൽ ആം ആദ്മിയും കോൺഗ്രസും പ്രത്യേകം മത്സരിച്ചാൽ ബിജെപി തന്നെ എല്ലാ സീറ്റുകളിലും വിജയം ഉറപ്പാക്കുമെന്ന സർവെ ഫലങ്ങളും പോളുകളും പ്രവചിച്ചിരുന്നു. എന്നാൽ ഇതെല്ലാം അവഗണിച്ച പാർട്ടി ഡൽ‌ഹി നേതൃത്വം അന്നും സഖ്യം വേണ്ടെന്ന നിലപാടിൽ ഉറച്ചു നിന്നിരുന്നു.

ഇത്തതവണയും ദേശീയ സാഹചര്യം കണക്കിലെടുത്ത് സഖ്യം ഉണ്ടാക്കുന്നതിനെപ്പറ്റി ഒന്നുകൂടി ആലോചിച്ച് തീരുമാനമെടുക്കാന്‍ ആപ് കോണ്‍ഗ്രസിനോട് ആവശ്യപ്പെട്ടിരുന്നു. ഇതിന് പിന്നാലെ ഇതുവരെ സഖ്യം ആയിട്ടില്ല എന്ന കോൺഗ്രസ് ഡൽഹി ചീഫ് ഷീലാ ദീക്ഷിത് പ്രതികരിച്ചത് ആപ്പുമായുള്ള സഖ്യസാധ്യത സംബന്ധിച്ച് പാർട്ടി തലത്തിൽ ഒരു പുനർചിന്തനം നടക്കാന്‍ സാധ്യതയുണ്ടെന്ന് അഭ്യൂഹമാണ് ഉയർത്തിയത്. എന്നാൽ അഭ്യൂഹങ്ങൾക്കെല്ലാം വിരാമമിട്ടുകൊണ്ടാണ് ഇപ്പോൾ കോണ്‍ഗ്രസ് അധ്യക്ഷന്റെ ഉറച്ച തീരുമാനം എത്തുന്നത്.