COVID 19 | മഹാരാഷ്ട്രയിൽ കോവിഡ് ആശുപത്രിയിൽ തീപിടുത്തം; 13 രോഗികൾ വെന്തു മരിച്ചു

പുലർച്ചെ മൂന്നു മണിയോടു കൂടിയാണ് ആശുപത്രി ഐ സി യുവിൽ തീപിടുത്തം ഉണ്ടായത്. അതേസമയം, തീപിടുത്തത്തെ തുടർന്ന് അവശനിലയിലായ മറ്റ് രോഗികളെ സമീപത്തെ ആശുപത്രികളിലേക്ക് മാറ്റി.

ഐ സി യുവിലെ എ സി യൂണിറ്റിലെ ഷോർട് സർക്യൂട് ആണ് തീ പിടുത്തത്തിന് കാരണമായത് എന്നാണ് കരുതുന്നത്. ചികിത്സയിലുള്ള മറ്റ് രോഗികളെ സമീപത്തെ ആശുപത്രികളിലേക്ക് മാറ്റി. 17 കോവിഡ് രോഗികളാണ് ഐ സി യുവിൽ ഉണ്ടായിരുന്നത്.

അതേസമയം, മഹാരാഷ്ട്രയിൽ കോവിഡ് വ്യാപനം അതിരൂക്ഷമായി തുടരുകയാണ്. കഴിഞ്ഞദിവസം പ്രതിദിന രോഗികളുടെ എണ്ണം 67, 000 ത്തിന് മുകളിൽ ആയിരുന്നു മഹാരാഷ്ട്രയിൽ.

തീ പിടുത്തം ഉണ്ടായ ആശുപത്രി ഐ സി യുവിൽ 17 കോവിഡ് രോഗികൾ ആയിരുന്നു ഉണ്ടായിരുന്നത്. ചികിത്സയിലുള്ള മറ്റ് രോഗികളെ സമീപത്തെ ആശുപത്രിയിലേക്ക് മാറ്റി. സ്ഥിതിഗതികൾ ഇപ്പോൾ നിയന്ത്രണ വിധേയമാണ്.

നാസികിലെ ഡോ സാകിർ ഹുസൈൻ ആശുപത്രിയിൽ ഓക്സിജൻ ലഭിക്കാതെ 22 രോഗികൾ മരിച്ചതിനു പിന്നാലെയാണ് പുതിയ സംഭവം ഉണ്ടായിരിക്കുന്നത്. ഓക്സിജൻ ടാങ്കറിൽ ലീക്ക് ഉണ്ടായതിനെ തുടർന്ന് ആയിരുന്നു നാസികിലെ ആശുപത്രിയിൽ കൂട്ടമരണം സംഭവിച്ചത്.

ആശുപത്രിയിൽ ഓക്സിജൻ സൂക്ഷിക്കുന്ന ടാങ്കറിൽ ലീക്ക് ഉണ്ടായതിനെ തുടർന്നാണ് ഓക്സിജൻ വിതരണം തടസ്സപ്പെട്ടതെന്നും മരണങ്ങൾ സംഭവിച്ചതെന്നും നാസിക് ജില്ല കളക്ടർ സുരാജ് മാന്ധരേ പറഞ്ഞു. ഓക്സിജൻ ലീക്കിനെ തുടർന്ന് ഓക്സിജൻ വിതരണം 30 മിനിറ്റ് തടസപ്പെട്ടു. ഓക്സിജൻ വിതരണം തടസപ്പെട്ടത് കാരണം മരിച്ച രോഗികളെല്ലാം വെന്റിലേറ്ററിൽ ചികിത്സയിൽ കഴിയുന്നവർ ആയിരുന്നു.

അതേസമയം, കഴിഞ്ഞദിവസം ഇതുവരെയുള്ളതിൽ വെച്ച് ഏറ്റവും കൂടുതൽ കോവിഡ് കേസുകളാണ് ഇന്ത്യയിൽ റിപ്പോർട്ട് ചെയ്തത്. 3.14 ലക്ഷം. ലോകത്തിൽ ഇത്രയധികം രോഗികൾ ഒരു രാജ്യത്ത് റിപ്പോർട്ട് ചെയ്യപ്പെടുന്നത് ഇത് ആദ്യമായാണ്.