IPL 2021 | ജയം തുടരാൻ ബാംഗ്ലൂർ; തിരിച്ചുവരാൻ രാജസ്ഥാൻ; ഐപിഎല്ലിൽ ഇന്ന് സഞ്ജു - കോഹ്ലി പോരാട്ടം

ഐപിഎല്ലിൽ ഇന്ന് വിരാട് കോഹ്ലിയുടെ റോയല്‍ ചലഞ്ചേഴ്‌സ് ബാംഗ്ലൂരും സഞ്ജു സാംസൻ്റെ രാജസ്ഥാന്‍ റോയല്‍സും നേര്‍ക്കുനേര്‍. കളിച്ച മൂന്ന് മത്സരവും ജയിച്ചാണ് ബാംഗ്ലൂർ മത്സരത്തിന് എത്തുന്നതെങ്കിൽ ഒരു ജയവും രണ്ട് തോല്‍വിയും ഏറ്റുവാങ്ങിയ ക്ഷീണത്തിലാണ് രാജസ്ഥാന്റെ വരവ്. ഇരു ടീമിനും മികച്ച താരനിരയുണ്ടെങ്കിലും പ്രകടനത്തിൽ ഒരടി മുന്നിൽ നിൽക്കുന്നത് ബാംഗ്ലൂരിൻ്റെ താരങ്ങളാണ്. കൂടുതല്‍ സ്ഥിരതയോടെ കളിക്കാൻ അവർക്ക് കഴിയുന്നു എന്നത് തന്നെയാണ് അവരുടെ മികവിന് ആധാരം. മറുവശത്ത് സ്ഥിരതയില്ലായ്മയാണ് രാജസ്ഥാനെ പിന്നോട്ട് വലിക്കുന്ന ഘടകം. ഈ മത്സരത്തിലും ജയത്തോടെ പോയിൻ്റ് ടേബിളിലെ ഒന്നാം സ്ഥാനം വീണ്ടെടുക്കാനാവും കോഹ്ലിയും സംഘവും ഇന്നിറങ്ങുക. മറുഭാഗത്ത് ഈ മത്സരത്തിൽ ജയം നേടി ടൂർണമെൻ്റിൽ മുന്നോട്ട് കുതിക്കുന്നതിനായുള്ള ഊർജ്ജം കണ്ടെത്താനാവും സഞ്ജുവും സംഘവും ശ്രമിക്കുന്നത്.