Kerala Bypolls | ഉപതെരഞ്ഞെടുപ്പിന് പറ്റിയ സമയമല്ലെന്ന് സംസ്ഥാനം; തെരഞ്ഞെടുപ്പ് പ്രഖ്യാപിക്കും മുന്നേ കേന്ദ്ര തെരഞ്ഞെടുപ്പ് കമ്മീഷന് ചീഫ് സെക്രട്ടറിയുടെ കത്ത്

കേന്ദ്ര തെരഞ്ഞെടുപ്പ് കമ്മീഷൻ ഉപതെരഞ്ഞെടുപ്പ് പ്രഖ്യാപിക്കുന്നതിന് മുന്നേയാണ് സംസ്ഥാനം കത്ത് നൽകിയത്. തെരഞ്ഞെടുപ്പ് പ്രഖ്യാപിച്ചത് സെപ്തംബർ നാലിനാണ്. എന്നാൽ, ചീഫ് സെക്രട്ടറി കത്തയച്ചത് ഓഗസ്റ്റ് 21നും. ഇതോടെ ഉപതെരഞ്ഞെടുപ്പ് നടത്തുന്നതിനോട് സംസ്ഥാന സർക്കാരിന് യോജിപ്പില്ലെന്ന് കൂടുതൽ വ്യക്തമായി.

തെരഞ്ഞെടുപ്പ് നടത്താനുള്ള ബുദ്ധിമുട്ടായി സംസ്ഥാനം ചൂണ്ടിക്കാട്ടുന്ന കാര്യങ്ങൾ ഇവയാണ്. നിലവിലെ നിയമസഭയുടെ കാലാവധി അവസാനിക്കാൻ മാസങ്ങൾ മാത്രമാണ് ശേഷിക്കുന്നത്. പുതിയ അംഗത്തിന് കുറച്ചു മാസമേ ലഭിക്കൂ. സാമൂഹ്യ അകലം പാലിച്ചുള്ള തെരഞ്ഞെടുപ്പ് രണ്ടു മണ്ഡലങ്ങളിലും  എളുപ്പമല്ല.

കാലാവസ്ഥയും പ്രതികൂലമാണെന്നും ചീഫ് സെക്രട്ടറി ചൂണ്ടിക്കാട്ടി. സംസ്ഥാനത്ത് മൺസൂൺ അവസാനിച്ചിട്ടില്ല. കുട്ടനാട് പ്രളയഭീഷണി ഉള്ള പ്രദേശവുമാണ്. കോവിഡിനെ തുടർന്ന് മാറ്റിവച്ച പരീക്ഷകളും വരും മാസങ്ങളിൽ നടക്കേണ്ടതുണ്ട്. പൊലീസ്, റവന്യൂ, ആരോഗ്യ,തദ്ദേശ ഭരണ ഉദ്യോഗസ്ഥരും കോവിഡ് ജോലിയുടെ തിരക്കിലാണ്. ഭീമമായ സാമ്പത്തിക ചെലവും പെരുമാറ്റച്ചട്ടം വന്നാൽ വികസനക്ഷേമ പദ്ധതികൾ തടസ്സപ്പെടുമെന്ന ആശങ്കയും ചീഫ് സെക്രട്ടറി പങ്കുവച്ചു.