തെരുവുനായ്ക്കൾ കടിച്ചുകൊന്ന നിഹാലിന്റെ കുടുംബത്തിന് സംസ്ഥാന സർക്കാർ 10 ലക്ഷം നൽകും
- Published by:Arun krishna
- news18-malayalam
Last Updated:
മുഖ്യമന്ത്രിയുടെ ദുരിതാശ്വാസ നിധിയില് നിന്നാണ് തുക അനുവദിച്ചത്
തിരുവനന്തപുരം: തെരുവു നായ്ക്കളുടെ ആക്രമണത്തെത്തുടര്ന്ന് മരിച്ച കണ്ണൂര് മുഴപ്പിലങ്ങാട്ടെ നിഹാല് എന്ന കുട്ടിയുടെ കുടുംബത്തിന് മുഖ്യമന്ത്രിയുടെ ദുരിതാശ്വാസ നിധിയില് നിന്ന് 10 ലക്ഷം രൂപ അനുവദിക്കാന് തീരുമാനിച്ചു. ഈ മാസം 11നാണ് നിഹാല് തെരുവുനായ ആക്രമണത്തില് മരിച്ചത്.
ചികിത്സാസഹായം
മലപ്പുറം ഏറനാട് താലൂക്കില് അറയിലകത്ത് വീട്ടില് ഹാറൂണിന്റെ മകന് ഷഹീന് ചികിത്സക്കായി മരുന്ന് വാങ്ങിയ ഇനത്തില് ചെലവായ 67,069 രൂപ മുഖ്യമന്ത്രിയുടെ ദുരിതാശ്വാസ നിധിയില് നിന്ന് റീ ഇംബേഴ്സ് ചെയ്ത് നല്കും. Systemic onset Juvenile Idiopathic Arthritis Disease എന്ന സന്ധിവാത രോഗം ബാധിച്ച് ചികിത്സയില് കഴിയുന്ന ഷഹീന്റെ തുടര് ചികിത്സ സംബന്ധിച്ച നടപടികള് സ്വീകരിക്കുവാന് ആരോഗ്യ കുടുംബക്ഷേമ വകുപ്പിനെ ചുമതലപ്പെടുത്തി.
നെല്ല് സംഭരണം – ശിപാര്ശകള് സമര്പ്പിക്കാന് മന്ത്രിസഭാ ഉപസമിതി
നെല്ല് സംഭരണം സംബന്ധിച്ച വിഷയങ്ങള് പരിഗണിച്ച് ആവശ്യമായ തീരുമാനങ്ങളെടുക്കുകയോ ശിപാര്ശകള് സമര്പ്പിക്കുകയോ ചെയ്യുന്നതിന് മന്ത്രിസഭാ ഉപസമിതിയെ ചുമതലപ്പെടുത്തും. ധനകാര്യം, ഭക്ഷ്യ-പൊതുവിതരണം, കൃഷി, സഹകരണം, വൈദ്യുതി വകുപ്പ് മന്ത്രിമാര് അടങ്ങുന്നതാണ് ഉപസമിതി.
advertisement
സര്ട്ടിഫിക്കറ്റുകള് സ്വയം സാക്ഷ്യപ്പെടുത്താമെന്ന ഉത്തരവില് ഭേദഗതി
വിവിധ സര്ക്കാര് സേവനങ്ങള് ലഭ്യമാകുന്നതിനായി രേഖകള്/ സര്ട്ടിഫിക്കറ്റുകള് സ്വയം സാക്ഷ്യപ്പെടുത്താമെന്ന ഉത്തരവില് ഭേദഗതി. ഗസറ്റഡ് ഉദ്യോഗസ്ഥന്/ നോട്ടറി സാക്ഷ്യപ്പെടുത്തണം എന്ന രീതി ഒഴിവാക്കി രേഖകളുടെ സര്ട്ടിഫിക്കറ്റുകളുടെ പകര്പ്പുകള് സ്വയം സാക്ഷ്യപ്പെടുത്താന് 7.10.21ലെ ഉത്തരവ് പ്രകാരം അനുമതി നല്കിയിരുന്നു. അതില് ഏതെങ്കിലും നിയമത്തില്, നിശ്ചയിക്കപ്പെട്ട ഉദ്യോഗസ്ഥന് സാക്ഷ്യപ്പെടുത്തണമെന്ന് പ്രത്യേകം നിഷ്കര്ഷിച്ചിട്ടുള്ളവ ഒഴികെയാണ് സ്വയം സാക്ഷ്യപ്പെടുത്താനാവുക എന്നാണ് ഭേദഗതി.
രണ്ടാമത്തെ ഐടി കെട്ടിടം
കോഴിക്കോട് സൈബര് പാര്ക്കില് 184 കോടി രൂപ ചെലവില് രണ്ടാമത്തെ ഐടി കെട്ടിടം നിര്മ്മിക്കുന്നതിന് അനുമതി നല്കി. ഇതില് 100 കോടി രൂപ കിഫ്ബി ഫണ്ടില് നിന്നാണ്. പദ്ധതിയുടെ എസ്.പി.വി.യായി കേരള സ്റ്റേറ്റ് ഇന്ഫര്മേഷന് ടെക്നോളജി ഇന്ഫ്രാസ്ട്രക്ചര് ലിമിറ്റഡ് (കെ.എസ്.ഐ.ടി.ഐ.എല്)നെ നിയോഗിക്കാനും തീരുമാനിച്ചു.
advertisement
ക്രിമിനല് നടപടി സംഹിതയില് ഭേദഗതി
ഒന്നാം ക്ലാസ് മജിസ്ട്രേറ്റ്മാരുടെ ശിക്ഷാവിധിക്കെതിരായ അപ്പീല് കേള്ക്കാന് അസിസ്റ്റന്റ് സെഷന്സ് ജഡ്ജിമാര്ക്കും ചീഫ് ജുഡീഷയല് മജിസ്ട്രേറ്റ്മാര്ക്കും അനുമതി നല്കും. ഇതിന് ക്രിമിനല് നടപടി സംഹിതയിലെ 381-ാം വകുപ്പ് ഭേദഗതി ചെയ്യും. ഹൈക്കോടതി രജിസ്ട്രാറുടെ നിര്ദ്ദേശമനുസരിച്ചാണ് തീരുമാനം. ഇതു സംബന്ധിച്ച കരട് ബില്ലും ധനകാര്യ മെമ്മോറാണ്ടവും അംഗീകരിച്ചു.
ഓഫീസ് സമുച്ചയം
ഉന്നത വിദ്യാഭ്യസ കൗണ്സിലിന് ഓഫീസ് സമുച്ചയം നിര്മ്മിക്കുന്നതിന് അനുമതി. കേരള ശാസ്ത്ര സാങ്കേതിക മ്യൂസിയത്തിന്റെ കൈവശമുള്ള 4 ഏക്കര് 73 സെന്റ് ഭൂമിയില് നിന്നും 48.8 സെന്റ് സ്ഥലം വ്യവസ്ഥകളോടെ പാട്ടത്തിന് നല്കും.
Click here to add News18 as your preferred news source on Google. ഏറ്റവും പുതിയ വാർത്തകൾ, വിഡിയോകൾ, വിദഗ്ദാഭിപ്രായങ്ങൾ, രാഷ്ട്രീയം, ക്രൈം, തുടങ്ങി എല്ലാം ഇവിടെയുണ്ട്. ഏറ്റവും പുതിയ കേരളവാർത്തകൾക്കായി News18 മലയാളത്തിനൊപ്പം വരൂ
Location :
Thiruvananthapuram,Thiruvananthapuram,Kerala
First Published :
Jun 27, 2023 6:24 PM IST
മലയാളം വാർത്തകൾ/ വാർത്ത/Kerala/
തെരുവുനായ്ക്കൾ കടിച്ചുകൊന്ന നിഹാലിന്റെ കുടുംബത്തിന് സംസ്ഥാന സർക്കാർ 10 ലക്ഷം നൽകും
