"ഞാൻ ഒറ്റയ്ക്കല്ല"; വേദനയുടെ നാലുചുവരുകളിൽ നിന്ന് സരസുവിനെ ചേർത്തുപിടിച്ച് 'ഒപ്പം' മെഡിക്കൽ ക്യാമ്പ്

വിട്ടുമാറാത്ത ശ്വാസംമുട്ടലും ശരീരവേദനയും സരസുവിൻ്റെ ജീവിതത്തെ ഏറെ പ്രയാസകരമാക്കിയിരുന്നു. കൂട്ടിന് ആരുമില്ലാതെ ഒറ്റയ്ക്ക് താമസിക്കുന്ന ഇവർക്ക് ചികിത്സയും മരുന്നും പലപ്പോഴും ഒരു ചോദ്യചിഹ്നമായി. കഴിഞ്ഞ വർഷം കുന്നുകരയിൽ നടന്ന ക്യാമ്പിലെത്തിയതോടെയാണ് ഈ ദുരിതത്തിന് അറുതിയായത്. അന്ന് ലഭിച്ച കൃത്യമായ ചികിത്സാ നിർദ്ദേശങ്ങളും മരുന്നുകളും സരസുവിന് നൽകിയ ആശ്വാസം ചെറുതല്ല. ആ വിശ്വാസമാണ്, ചുവടുകൾ വയ്ക്കാൻ പ്രയാസപ്പെട്ടിട്ടും ഇത്തവണയും സരസുവിനെ ഒപ്പം മെഡിക്കൽ ക്യാമ്പിലെത്തിച്ചത്. മരുന്നിനപ്പുറം സ്നേഹത്തോടെയുള്ള പരിചരണവും തുടർചികിത്സയ്ക്കുള്ള ഉറപ്പും സരസുവിന് നൽകുന്നത് വലിയ ആത്മവിശ്വാസമാണ്. ശാരീരിക ബുദ്ധിമുട്ടുകൾക്കിടയിലും താൻ ഒറ്റയ്ക്കല്ലെന്ന ഉറപ്പോടെയാണ് സരസു ഇത്തവണ ക്യാമ്പിൽ നിന്ന് മടങ്ങിയത്.