മന്ത്രിമാരായ പി രാജീവും ആർ ബിന്ദുവും ഗവർണറെ സന്ദർശിച്ച് ഹരാരിയുടെ പുസ്തകങ്ങൾ സമ്മാനിച്ചു

ഭാരതാംബവിവാദത്തില്‍ തുടങ്ങി കേരള സര്‍വകലാശാലയിലെ ഏറ്റുമുട്ടല്‍വരെയുള്ള പ്രശ്‌നങ്ങള്‍ നിലനില്‍ക്കെയാണ് മുഖ്യമന്ത്രിയും ഗവര്‍ണറുംകൂടിക്കാഴ്ച നടത്തിയത്. ഇതിന് പിന്നാലെയാണ് ഉന്നതവിദ്യാഭ്യാസ വകുപ്പ് മന്ത്രി ആർ ബിന്ദുവും വ്യവസായമന്ത്രി പി രാജീവും ഗവർണറെ കണ്ടത്. സർക്കാരും ഗവർണറും തമ്മിൽ നിലനിൽക്കുന്ന ഭിന്നതയ്ക്ക് ഇതോടെ താൽക്കാലികമായെങ്കിലും വിരാമമാകും.

ഇസ്രായേലി ചരിത്രകാരനും സർവകലാശാല ചരിത്ര അധ്യാപകനുമാണ് യുവാൽ നോവാ ഹരാരി. അദ്ദേഹത്തിന്റെ Sapiens: A Brief History of Humankind എന്ന പുസ്തകം ലോകമാകമാനം വലിയ വിൽപ്പന നേടിയിരുന്നു. ഹരാരിയുടെ പുസ്തകങ്ങളുടെ കോപ്പികൾ ലോകമെമ്പാടുമായി 65 ഭാഷകളിലായി 40 ദശലക്ഷത്തിലധികം വിറ്റഴിഞ്ഞിട്ടുണ്ട്. അവയിൽ 'സാപ്പിയൻസ്: മനുഷ്യരാശിയുടെ ഒരു ഹ്രസ്വ ചരിത്രം' (Sapiens: A Brief History of Humankind) മാത്രം 23 ദശലക്ഷത്തിലധികം കോപ്പികൾ വിറ്റുപോയിട്ടുണ്ട്. മലയാളത്തിലും ഈ പുസ്തകത്തിനു മികച്ച സ്വീകാര്യത ലഭിച്ചു.