Omicron | ഒമിക്രോണിനെ നേരിടാൻ സംസ്ഥാനത്ത് നിയന്ത്രണം; രാത്രികാല കർഫ്യു തുടങ്ങി; അറിയേണ്ടതെല്ലാം
- Published by:Anuraj GR
- news18-malayalam
Last Updated:
രാത്രി പത്ത് മണി മുതൽ രാവിലെ അഞ്ച് മണി വരെയാണ് കർഫ്യു. ജനുവരി രണ്ട് വരെയാണ് രാത്രികാല കർഫ്യു ഏർപ്പെടുത്തിയിരിക്കുന്നത്
തിരുവനന്തപുരം: ഒമിക്രോൺ (Omicron) വ്യാപനത്തിന്റെ പശ്ചാത്തലത്തിൽ സംസ്ഥാനത്ത് രാത്രികാല കർഫ്യു (Night Curfew) വ്യാഴാഴ്ച മുതൽ നിലവിൽ വരുന്നു. രാത്രി പത്ത് മണി മുതൽ രാവിലെ അഞ്ച് മണി വരെയാണ് കർഫ്യു. ജനുവരി രണ്ട് വരെയാണ് രാത്രികാല കർഫ്യു ഏർപ്പെടുത്തിയിരിക്കുന്നത്. ആരാധനാലയങ്ങളിൽ ഉൾപ്പടെ രാത്രി പത്തു മണിക്ക് ശേഷം ഒരു കൂടിച്ചേരലും അനുവദിക്കില്ലെന്ന് സർക്കാർ വ്യക്തമാക്കിയിട്ടുണ്ട്. രാത്രി പത്ത് മുതൽ മത-സാമൂഹ്യ-രാഷ്ട്രീയപരമായ കൂടിച്ചേരലുകൾ അടക്കം ആൾക്കൂട്ട പരിപാടികളൊന്നും പാടില്ലെന്നാണ് സർക്കാർ നിർദ്ദേശിച്ചിരിക്കുന്നത്.
പുതുവത്സരാഘോഷങ്ങൾ ഡിസംബർ 31ന് രാത്രി 10ന് ശേഷം അനുവദിക്കുന്നതല്ല. ബാറുകൾ, ക്ലബ്ബുകൾ, ഹോട്ടലുകൾ, റസ്റ്റോറന്റുകൾ, ഭക്ഷണശാലകൾ തുടങ്ങിയവയിലെ സീറ്റിങ് കപ്പാസിറ്റി അമ്പത് ശതമാനമായി തുടരുന്നതാണ് . പുതുവത്സരാഘോഷത്തോടനുബന്ധിച്ച് വലിയ ആൾക്കൂട്ടങ്ങൾ ഉണ്ടാകാൻ സാധ്യതയുളള ബീച്ചുകൾ, ഷോപ്പിംഗ് മാളുകൾ, പബ്ലിക് പാർക്കുകൾ, തുടങ്ങിയ പ്രദേശങ്ങളിൽ ജില്ലാ കളക്ടർമാർ മതിയായ അളവിൽ പോലീസ് ഉദ്യോഗസ്ഥരുടെ പിന്തുണയോടെ സെക്ടറൽ മജിസ്ട്രേറ്റുകളെ വിന്യസിക്കും. കൂടുതൽ പോലീസിനെ നിയന്ത്രണ പ്രവർത്തനങ്ങൾക്കായി വിന്യസിക്കും. അതേസമയം ശിവഗിരി-ശബരിമല തീർഥാർകരുടെ യാത്രയെ നിയന്ത്രണത്തിൽ നിന്ന് ഒഴിവാക്കിയിട്ടുണ്ട്.
advertisement
കരുതല് പ്രധാനമെന്ന് മന്ത്രി വീണാ ജോര്ജ്
സംസ്ഥാനത്ത് ഒമിക്രോണ് (Omicron) കേസുകള് കൂടി വരുന്ന സാഹചര്യത്തില് പുതുവര്ഷാഘോഷങ്ങള് (New Year) കരുതലോടെ വേണമെന്ന് ആരോഗ്യ വകുപ്പ് മന്ത്രി വീണാ ജോര്ജ് (Veena George). സംസ്ഥാനത്ത് പുതുവര്ഷത്തോടനുബന്ധിച്ച് രാത്രി നിയന്ത്രണങ്ങള് ഏര്പ്പെടുത്തിയിട്ടുണ്ട്. ഇതുകൂടാതെ കടകള്, ഷോപ്പിംഗ് മാളുകള്, ഹോട്ടലുകള്, ആരാധനാലയങ്ങള് എന്നിവിടങ്ങളില് പോകുന്നവരും ജാഗ്രത പുലര്ത്തണം. സംസ്ഥാനത്ത് ഇതുവരെ 63 പേര്ക്കാണ് ഒമിക്രോണ് സ്ഥിരീകരിച്ചത്. എറണാകുളം 25, തിരുവനന്തപുരം 18, പത്തനംതിട്ട 5, തൃശൂര് 5, ആലപ്പുഴ 4, കണ്ണൂര് 2, കൊല്ലം 1, കോട്ടയം 1, മലപ്പുറം 1, കോഴിക്കോട് 1 എന്നിങ്ങനെയാണ് ജില്ലകളില് ഒമിക്രോണ് (Omicron) സ്ഥിരീകരിച്ചത്. ഹൈ റിസ്ക് രാജ്യങ്ങളില് നിന്നും വന്ന 30 പേര്ക്കും ലോ റിസ്ക് രാജ്യങ്ങളില് നിന്നും വന്ന 25 പേര്ക്കും ഒമിക്രോണ് ബാധിച്ചു. 8 പേര്ക്കാണ് സമ്പര്ക്കത്തിലൂടെ രോഗം ബാധിച്ചത്. അതിനാല് തന്നെ അതീവ ജാഗ്രത പാലിക്കണമെന്നും മന്ത്രി അഭ്യര്ത്ഥിച്ചു.
advertisement
ഗുരുതരാവസ്ഥ കുറവാണെങ്കിലും ചുരുങ്ങിയ ദിവസങ്ങള് കൊണ്ട് വളരെ വേഗത്തില് പടര്ന്നു പിടിക്കുന്ന കോവിഡിന്റെ ജനിതക വകഭേദമാണ് ഒമിക്രോണ്. വ്യാപനം വളരെ കൂടുതലായതിനാല് സംസ്ഥാനത്തെ സംബന്ധിച്ച് അത് വളരെ നിര്ണായകമാണ്. വയോജനങ്ങളും അനുബന്ധ രോഗങ്ങളുള്ളവരും ഇവിടെ കൂടുതലുള്ളതിനാല് ഗുരുതര രോഗികളും മരണങ്ങളും കൂടുവാന് സാധ്യതയുണ്ട്. ഒമിക്രോണ് പ്രതിരോധത്തില് കോവിഡ് വാക്സിനേഷന് വളരെ പ്രധാനമാണ്. വാക്സിനെടുത്തവര്ക്ക് ഗുരുതരാവസ്ഥ കുറവാണ്. എങ്കിലും വളരെ ശ്രദ്ധിച്ചില്ലെങ്കില് വാക്സിന് എടുത്തവര്ക്ക് കോവിഡ് വരുന്ന ബ്രേക്ക് ത്രൂ ഇന്ഫെക്ഷനും കോവിഡ് വന്നവര്ക്ക് വീണ്ടും വരുന്ന റീ ഇന്ഫെക്ഷനും മറ്റ് വകഭേദങ്ങളെക്കാള് കൂടുതലുണ്ടാകാന് സാധ്യതയുണ്ട്. അതിനാല് തന്നെ സ്വയം പ്രതിരോധം ഏറെ പ്രധാനമാണ്.
advertisement
Also Read- ഭീതിയായി ഒമിക്രോണ് വ്യാപനം; വാക്സിന് പ്രതിരോധ ശേഷി ഒമിക്രോണ് മറികടക്കുമെന്ന് വിദഗ്ധ സമിതി
ആരില് നിന്നും രോഗം പകരാമെന്ന ഒരു പൊതുബോധം എല്ലാവര്ക്കും ഉണ്ടായിരിക്കണം. മാസ്ക്, വായൂ സഞ്ചാരമുള്ള മുറി, വാക്സിനേഷന് എന്നിവ ഒമിക്രോണ് പ്രതിരോധത്തില് വളരെ പ്രധാനമാണ്. എന് 95 മാസ്ക് ഒമിക്രോണിനെതിരെ ഫലപ്രദമായ പ്രതിരോധമൊരുക്കുന്നു. പൊതുയിടങ്ങളില് എവിടെ പോകുമ്പോഴും എന് 95 മാസ്ക് ഉപയോഗിക്കുന്നതാണ് ഏറ്റവും നല്ലത്. വായും മൂക്കും മൂടത്തക്ക വിധം മാസ്ക് ധരിക്കണം. മാസ്ക് താഴിത്തി സംസാരിക്കരുത്. അകലം പാലിക്കാതെയിരുന്ന് ഭക്ഷണം കഴിക്കരുത്.
advertisement
വായൂ സഞ്ചാരമുള്ള മുറികള്ക്ക് പ്രാധാന്യം നല്കണം. ഓഫീസുകള്, തൊഴിലിടങ്ങള്, സ്കൂളുകള്, മാര്ക്കറ്റുകള്, കടകള്, പൊതുഗതാഗതം എന്നിവിടങ്ങളിലെല്ലാം വായൂ സഞ്ചാരം ഉറപ്പാക്കണം. അടച്ചിട്ട ഇടങ്ങളിലാണ് കോവിഡ് വേഗത്തില് പകരുന്നത്. ഒമിക്രോണ് സാധ്യതയുള്ളതിനാല് ഇത് വളരെ വേഗത്തില് പടരാന് സാധ്യതയുണ്ട്. ഇടയ്ക്കിടയ്ക്ക് കൈകള് സാനിറ്റൈസര് ഉപയോഗിച്ചോ സോപ്പുപയോഗിച്ചോ വൃത്തിയാക്കണം. കടകളില് പോകുന്നവര് സാമൂഹിക അകലം പാലിക്കണം. ആള്ക്കൂട്ടത്തില് പോകാതിരിക്കാന് പ്രത്യേകം ശ്രദ്ധിക്കണം.
Click here to add News18 as your preferred news source on Google. ഏറ്റവും പുതിയ വാർത്തകൾ, വിഡിയോകൾ, വിദഗ്ദാഭിപ്രായങ്ങൾ, രാഷ്ട്രീയം, ക്രൈം, തുടങ്ങി എല്ലാം ഇവിടെയുണ്ട്. ഏറ്റവും പുതിയ കേരളവാർത്തകൾക്കായി News18 മലയാളത്തിനൊപ്പം വരൂ
Location :
First Published :
Dec 31, 2021 7:04 AM IST
മലയാളം വാർത്തകൾ/ വാർത്ത/Kerala/
Omicron | ഒമിക്രോണിനെ നേരിടാൻ സംസ്ഥാനത്ത് നിയന്ത്രണം; രാത്രികാല കർഫ്യു തുടങ്ങി; അറിയേണ്ടതെല്ലാം
