Puthuppally By-Election Result 2023: ചാണ്ടി ഉമ്മൻ ഇനി പുതുപ്പള്ളിയെ നയിക്കും; ഭൂരിപക്ഷം 37,719
- Published by:Anuraj GR
- news18-malayalam
Last Updated:
പുതുപ്പള്ളിയിലെ എട്ട് പഞ്ചായത്തുകളിലും ചാണ്ടി ഉമ്മന് തന്നെയായിരുന്നു ലീഡ്. മീനടം പഞ്ചായത്തിലെ പുതുവയൽ 153-ാം ബൂത്തില് മാത്രമാണ് ജെയ്കിന് ലീഡ് ചെയ്യാന് കഴിഞ്ഞത്
കോട്ടയം: പുതുപ്പള്ളിയില് യുഡിഎഫ് സ്ഥാനാര്ത്ഥി ചാണ്ടി ഉമ്മന് ഉജ്ജ്വല വിജയം. 37,719 വോട്ടിന്റെ ഭൂരിപക്ഷത്തില് ഇടതുമുന്നണിയിലെ ജെയ്ക്ക് സി തോമസിനെയാണ് ചാണ്ടി ഉമ്മൻ തോൽപ്പിച്ചത്. വോട്ടെണ്ണൽ പൂർത്തിയായി ഔദ്യോഗികഫലം പുറത്തുവന്നപ്പോൾ ചാണ്ടി ഉമ്മന് 80144 വോട്ടും ജെയ്ക്ക് സി തോമസിന് 42425 വോട്ടും ലഭിച്ചു. ബിജെപി സ്ഥാനാർഥി ലിജിൻ ലാൽ 6558 വോട്ട് നേടി. മണ്ഡലത്തിന്റെ ചരിത്രത്തിലെ ഏറ്റവും വലിയ ഭൂരിപക്ഷമാണ് ചാണ്ടി ഉമ്മൻ നേടിയത്. യുഡിഎഫിന്റെ 41 എം എൽ എ മാരിൽ ഏറ്റവും വലിയ ഭൂരിപക്ഷം ചാണ്ടി ഉമ്മനാണ്. തെക്കൻ കേരളത്തിലെ ഏറ്റവും വലിയ ഭൂരിപക്ഷവും ഇനി ചാണ്ടി ഉമ്മന്റെ പേരിലാണ്.
പുതുപ്പള്ളിയിലെ എട്ട് പഞ്ചായത്തുകളിലും ചാണ്ടി ഉമ്മന് തന്നെയായിരുന്നു ലീഡ്. മീനടം പഞ്ചായത്തിലെ പുതുവയൽ 153-ാം ബൂത്തില് മാത്രമാണ് ജെയ്കിന് ലീഡ് ചെയ്യാന് കഴിഞ്ഞത്. അവിടെ 15 വോട്ട് ലീഡാണ് ജെയ്ക്കിന് ലഭിച്ചത്. കഴിഞ്ഞ തെരഞ്ഞെടുപ്പിൽ ജെയ്ക്കിനൊപ്പം നിന്ന മണർകാട്, പാമ്പാടി പഞ്ചായത്തുകളിൽ മികച്ച മുന്നേറ്റമാണ് ചാണ്ടി ഉമ്മൻ നടത്തിയത്.
ചാണ്ടി ഉമ്മന് ഏറ്റവും കൂടുതല് ലീഡ് ലഭിച്ചത് പുതുപ്പള്ളി പഞ്ചായത്തിലാണ്. അയര്ക്കുന്നം, അകലക്കുന്നം, വാകത്താനം പഞ്ചായത്തുകളിലെല്ലാം ചാണ്ടി ഉമ്മന്റെ ഭൂരിപക്ഷം 5000ന് മുകളിലെത്തി. വോട്ടെണ്ണലിന്റെ തുടക്കം മുതൽക്കേ വലിയ മുന്നേറ്റമാണ് ചാണ്ടി ഉമ്മൻ നടത്തിയത്. പോസ്റ്റൽ സർവീസ് വോട്ടുകളിൽ തുടങ്ങിയ മുന്നേറ്റം അവസാനം വരെ നിലനിർത്താൻ അദ്ദേഹത്തിന് സാധിച്ചു. വോട്ടെണ്ണൽ രണ്ട് റൌണ്ട് പിന്നിട്ടപ്പോൾ തന്നെ കഴിഞ്ഞ തവണത്തെ ഉമ്മൻചാണ്ടിയുടെ ഭൂരിപക്ഷം ചാണ്ടി ഉമ്മൻ മറികടന്നു. വോട്ടെണ്ണൽ പകുതി പിന്നിട്ടപ്പോൾ പുതുപ്പള്ളിയിലെ ഉമ്മൻചാണ്ടിയുടെ റെക്കോർഡ് ഭൂരിപക്ഷവും ചാണ്ടി ഉമ്മൻ മറികടന്നു.
advertisement
പുതുപ്പള്ളിയിൽ അപ്പയുടെ പതിമൂന്നാം വിജയമാണെന്ന് ചാണ്ടി ഉമ്മൻ പ്രതികരിച്ചു. ഉപതെരഞ്ഞെടുപ്പ് വിജയത്തിനുശേഷം സംസാരിക്കുകയായിരുന്നു അദ്ദേഹം. ഉമ്മൻചാണ്ടിയോടുള്ള പുതുപ്പള്ളിക്കാരുടെ നിറഞ്ഞ സ്നേഹത്തിന് വലിയ നന്ദിയുണ്ടെന്നും ചാണ്ടി ഉമ്മൻ പറഞ്ഞു. പിതാവിനെ പോലെ താനും പുതുപ്പള്ളഇയുടെ കയ്യെത്തും ദൂരത്തുണ്ടാകുമെന്ന് ചാണ്ടി ഉമ്മൻ പറഞ്ഞു. ആരോപണങ്ങളെല്ലാം പുതുപ്പള്ളി തള്ളിക്കളഞ്ഞു. ഭരണവിരുദ്ധവികാരത്തിന്റെ പ്രതിഫലനം തെരഞ്ഞെടുപ്പിൽ കണ്ടതായും ചാണ്ടി ഉമ്മൻ പറഞ്ഞു.
advertisement
അതേസമയം പുതുപ്പള്ളിയിലെ ജനവിധി സ്വാഗതം ചെയയ്യുന്നുവെന്ന് ഇടത് സ്ഥാനാർഥി ജെയ്ക്ക് സി തോമസ് പറഞ്ഞു. പുതുപ്പള്ളിയുടെ പുതിയ എംഎൽഎയ്ക്ക് ഭാവുകങ്ങൾ അറിയിക്കുന്നതായും ചാണ്ടി ഉമ്മൻ പറഞ്ഞു.
Also Read- Puthuppally By-Election Result 2023 | ‘പുതുപ്പള്ളിയിലേത് അപ്പയുടെ 13-ാം വിജയം’: ചാണ്ടി ഉമ്മൻ
പുതുപ്പള്ളി തെരഞ്ഞെടുപ്പ് ഫലം സർക്കാരിന്റെ വിലയിരുത്തലല്ലെന്ന് സിപിഎം സംസ്ഥാന സെക്രട്ടറി എം വി ഗോവിന്ദൻ പ്രതികരിച്ചു. വോട്ട് കുറഞ്ഞത് പരിശോധിക്കുമെന്നും അദ്ദേഹം പറഞ്ഞു. യുഡിഎപ് വിജയം അംഗീകരിക്കുന്നുവെന്നും പുതുപ്പള്ളി വിധിയുടെ അടിസ്ഥാനം സഹതാപമാണെന്നും എം വി ഗോവിന്ദൻ പറഞ്ഞു.
advertisement
പുതുപ്പള്ളിയിലെ ജനവിധി എൽഡിഎഫിനേറ്റ ഏറ്റവും വലിയ തിരിച്ചടിയാണെന്ന് കെ സുധാകരൻ പറഞ്ഞു. യുഡിഎഫിനോടും ഉമ്മൻചാണ്ടിയോടും ആഭിമുഖ്യം പുലർത്തുന്നവരാണ് തങ്ങൾക്ക് വോട്ട് ചെയ്തതെന്ന് അദ്ദേഹം പറഞ്ഞു.
പുതുപ്പള്ളി ഉപതെരഞ്ഞെടുപ്പിൽ വിജയിച്ച ചാണ്ടി ഉമ്മനെ അഭിനന്ദിക്കുന്നതായി ബിജെപി സംസ്ഥാന അധ്യക്ഷൻ കെ സുരേന്ദ്രൻ പറഞ്ഞു. യുഡിഎഫ് വിജയത്തിന് പ്രധാനഘടകമായത് സഹതാപ തരംഗമാണ്. ഭരണവിരുദ്ധ വികാരവും പുതുപ്പള്ളിയിൽ പ്രതിഫലിച്ചതായി സുരേന്ദ്രൻ പറഞ്ഞു.
ഏറ്റവും പുതിയ വാർത്തകൾ, വിഡിയോകൾ, വിദഗ്ദാഭിപ്രായങ്ങൾ, രാഷ്ട്രീയം, ക്രൈം, തുടങ്ങി എല്ലാം ഇവിടെയുണ്ട്. ഏറ്റവും പുതിയ കേരളവാർത്തകൾക്കായി News18 മലയാളത്തിനൊപ്പം വരൂ
Location :
Kottayam,Kottayam,Kerala
First Published :
September 08, 2023 4:34 PM IST
മലയാളം വാർത്തകൾ/ വാർത്ത/Kerala/
Puthuppally By-Election Result 2023: ചാണ്ടി ഉമ്മൻ ഇനി പുതുപ്പള്ളിയെ നയിക്കും; ഭൂരിപക്ഷം 37,719