Rifa Mehnu | വ്ലോഗർ റിഫ മെഹ്നുവിന്‍റെ മരണത്തിൽ അന്വേഷണം വേണം; പരാതിയുമായി പിതാവ്

കോഴിക്കോട്: ദുബായിലെ (Dubai) താമസസ്ഥലത്ത് വ്ലോഗർ റിഫ മെഹ്നുവിനെ (21) മരിച്ച നിലയിൽ (Death) കണ്ടെത്തിയ സംഭവത്തിൽ അന്വേഷണം ആവശ്യപ്പെട്ട് പിതാവ് പൊലീസിന് പരാതി നൽകി. റിഫയുടെ പിതാവ് റാഷിദ് ആണ് കോഴിക്കോട് എസ്.പിക്ക് പരാതി നൽകിയത്. ദുബായിലെ താമസസ്ഥലത്താണ് റിഫയെ തൂങ്ങിമരിച്ച നിലയിൽ കണ്ടെത്തിയത്. ഇക്കഴിഞ്ഞ മാർച്ച് ഒന്നിനായിരുന്നു സംഭവം. ദുബായ് ജാഫിലിയെല ഫ്ലാറ്റിൽ ഭർത്താവിനും സുഹൃത്തുക്കൾക്കുമൊപ്പമാണ് റിഫ താമസിച്ചുവന്നത്. സുഹൃത്തുക്കൾക്കൊപ്പം പുറത്തുപോയി തിരിച്ചെത്തിയ ഭർത്താവാണ് റിഫയെ മരിച്ച നിലയിൽ ആദ്യം കണ്ടെത്തിയത്. കിടപ്പുമുറിയിൽ തൂങ്ങിമരിച്ച നിലയിലായിരുന്നു മൃതദേഹം. ഇവർക്ക് രണ്ടു വയസുള്ള ഒരു മകനുണ്ട്.