കോഴിയാണോ കോഴിമുട്ടയാണോ നല്ലത്? പ്രോട്ടീനിന്റെയും പോഷകങ്ങളുടെയും കലവറയേത്?

ലോകമെമ്പാടുമുള്ള ഫിറ്റ്നസ് പ്രേമികളിൽ ചിക്കൻ വളരെ ജനപ്രിയമാണ്. കാരണം ഇത് പ്രോട്ടീന്റെ മികച്ച ഉറവിടമാണ്. യുഎസ് അഗ്രികൾച്ചർ ഡിപ്പാർട്ട്‌മെന്റിന്റെ (യു‌എസ്‌ഡി‌എ) കണക്കനുസരിച്ച് 100 ഗ്രാം ചിക്കനിൽ 143 കിലോ കലോറി ഊർജ്ജം അടങ്ങിയിട്ടുണ്ട്. 24.11 ഗ്രാം പ്രോട്ടീൻ, 2.68 ഗ്രാം കാർബോഹൈഡ്രേറ്റ്, 3.12 ഗ്രാം കൊഴുപ്പ് എന്നിവയും ചിക്കനിൽ അടങ്ങിയിട്ടുണ്ട്. ഇതുകൂടാതെ, ചിക്കനിൽ കാത്സ്യം, ഇരുമ്പ്, സോഡിയം, വൈറ്റമിൻ എ, വൈറ്റമിൻ സി എന്നിവയും അടങ്ങിയിട്ടുണ്ട്.

യു‌എസ്‌ഡി‌എയുടെ കണക്കനുസരിച്ച് 100 ഗ്രാം ഭാരം വരുന്ന ഒരു പുഴുങ്ങിയ മുട്ടയിൽ 155 കിലോ കലോറി ഊർജ്ജം, 12.58 ഗ്രാം പ്രോട്ടീൻ, 1.12 ഗ്രാം കാർബോഹൈഡ്രേറ്റ്, 10.61 ഗ്രാം കൊഴുപ്പ് എന്നിവ അടങ്ങിയിട്ടുണ്ട്. കൊഴുപ്പിന്റെ അളവ് കൂടുതലാണെന്ന് തോന്നുമെങ്കിലും സമീപകാല പഠനങ്ങൾ മുട്ടകളിൽ ശരീരത്തിന് ആവശ്യമായ നല്ല കൊളസ്ട്രോൾ ഉണ്ടെന്ന് തെളിയിച്ചിട്ടുണ്ട്. ഇത് രക്തത്തിലെ കൊളസ്ട്രോൾ വർദ്ധിപ്പിക്കില്ല. അതുകൊണ്ട് തന്നെ ഒരു മുട്ട മുഴുവനായും കഴിക്കുന്നത് ആരോഗ്യകരമാണെന്നാണ് വിദഗ്ധരുടെ അഭിപ്രായം.

ഇന്ത്യൻ ഡെർമറ്റോളജി ഓൺലൈൻ ജേണലിലെ (2019) ഒരു പഠന റിപ്പോർട്ട് അനുസരിച്ച് ഇന്ത്യൻ ഡയറ്റ് രീതി പ്രധാനമായും കാർബോഹൈഡ്രേറ്റ് അടിസ്ഥാനമാക്കിയുള്ളതാണ്. പ്രോട്ടീനിന്റെ കുറവ് രാജ്യത്തെ ആളുകളിൽ ഉയർന്ന തോതിലാണ്. മാരാസ്മസ്, എഡിമ, മസിൽ നഷ്ടം, സോറിയാസിസ്, പ്രമേഹം, ചർമ്മത്തിൻറെയും മുടിയുടെയും ആരോഗ്യം തുടങ്ങിയവ പ്രോട്ടീനിന്റെ കുറവ് മൂലമുണ്ടാകുന്ന ആരോഗ്യ പ്രശ്‌നങ്ങളാണ്. ഒരു കിലോഗ്രാം ശരീരഭാരത്തിന് 0.8 ഗ്രാം പ്രോട്ടീൻ ആവശ്യമാണ്. ഇതനുസരിച്ച് നിങ്ങളുടെ ഭാരം 50 കിലോഗ്രാം ആണെങ്കിൽ എല്ലാ ദിവസവും 40 ഗ്രാം പ്രോട്ടീൻ ആവശ്യമാണ്.