കോവിഡ് കേസുകളിൽ വർദ്ധന; കുട്ടികളെ എങ്ങനെ സുരക്ഷിതരാക്കാം? എടുക്കേണ്ട മുൻകരുതലുകൾ എന്തൊക്കെ?

ഇന്ത്യയിൽ വീണ്ടും കൊറോണ വൈറസ് കേസുകൾ വർദ്ധിച്ചുകൊണ്ടിരിക്കുകയാണ്. ആരോഗ്യ കുടുംബക്ഷേമ മന്ത്രാലയത്തിന്റെ കണക്കനുസരിച്ച് കഴിഞ്ഞ 24 മണിക്കൂറിനുള്ളിൽ ഇന്ത്യയിൽ 10,000 കേസുകളാണ് റിപ്പോർട്ട് ചെയ്തിരിക്കുന്നത്. പ്രതിവാര പോസിറ്റിവിറ്റി നിരക്കും വർദ്ധിച്ചു.

രോഗബാധിതരായവരിൽ കുട്ടികളും ഉൾപ്പെടുന്നുണ്ട്. പല കുട്ടികൾക്കും കോവിഡ് -19 പ്രതിരോധ കുത്തിവയ്പ് എടുത്തിട്ടില്ല, ഇത് വൈറസ് ബാധിക്കാനുള്ള സാധ്യത വർദ്ധിപ്പിക്കുന്നു. കോവിഡ് ബാധിക്കുന്ന കുട്ടികളിലെ ആരോഗ്യ പ്രശ്‌നങ്ങളെക്കുറിച്ച് ജനങ്ങൾ ബോധവാന്മാരാകുകയും സുരക്ഷിതരായിരിക്കാൻ മതിയായ മുൻകരുതലുകൾ എടുക്കുകയും ചെയ്യേണ്ടത് ഏറെ പ്രധാനമാണ്.

Also read-Arcturus | ഇന്ത്യയിൽ കോവിഡ് കേസുകൾ വർധിക്കാൻ കാരണം പുതിയ ‘ആർക്‌ടറസ്’ വകഭേദം

കുട്ടികൾക്ക് കൊറോണ വൈറസ് ബാധിക്കാനുള്ള സാധ്യത കുറയ്ക്കാൻ സഹായിക്കുന്ന ചില ടിപ്പുകളാണ് താഴെ പറയുന്നത്.

• കോവിഡ് ബാധിതരായ, അല്ലെങ്കിൽ അണുബാധയുടെ ലക്ഷണങ്ങൾ കാണിക്കുന്ന കുടുംബാംഗങ്ങളിൽ നിന്ന് അവരെ അകറ്റി നിർത്തുക. പനി, ചുമ, ക്ഷീണം, ശ്വാസതടസം, ശരീരവേദന, തൊണ്ടവേദന, മൂക്കൊലിപ്പ്, തലവേദന എന്നിവ കൊറോണ വൈറസിന്റെ ചില ലക്ഷണങ്ങളാണെന്ന് സെന്റർസ് ഫോർ ഡിസീസ് കൺട്രോൾ ആൻഡ് പ്രിവൻഷൻ പറയുന്നു. ഈ ലക്ഷണങ്ങൾ കണ്ടാൽ സൂക്ഷിക്കണം
• മാസ്ക് ധരിക്കുക: സ്‌കൂളിലെ മറ്റ് വിദ്യാർത്ഥികളുമായും അധ്യാപകരുമായും ഇടപഴകുമ്പോൾ കുട്ടികൾ അവരുടെ മൂക്കും വായും ശരിയായി മൂടുന്നുവെന്ന് ഉറപ്പാക്കുക. പൊതുസ്ഥലത്തും മാസ്ക് ധരിക്കുക.
• കുട്ടികൾ അവരുടെ പ്ലേറ്റുകളോ ഗ്ലാസുകളോ കപ്പുകളോ മറ്റു സാധനങ്ങളോ മറ്റുള്ളവരുമായി പങ്കിടുന്നില്ലെന്ന് ഉറപ്പാക്കുക. ഇതുവഴി അണുബാധയുടെ വ്യാപനം കുറയ്ക്കാനാകും. വൃത്തിയാക്കേണ്ട പാത്രങ്ങൾ ഡിഷ്‍ വാഷറിൽ ഇടുക. അല്ലെങ്കിൽ അവ ചൂടുള്ള വെള്ളത്തിലോ, സോപ്പ് വെള്ളത്തിൽ കഴുകുക.
• കുട്ടികൾ ഇടയ്ക്കിടെ കൈകൾ അണുവിമുക്തമാക്കുന്നുണ്ടെന്ന് ഉറപ്പാക്കുക.

ക്യാൻസർ, ഹൃദ്രോ​ഗം, വൃക്ക രോ​ഗങ്ങൾ, കരൾ രോഗങ്ങൾ, പൊണ്ണത്തടി, പ്രമേഹം, ആസ്ത്മ, വിട്ടുമാറാത്ത ശ്വാസകോശ സംബന്ധമായ അസുഖങ്ങൾ തുടങ്ങിയ ഗുരുതരമായ രോഗങ്ങളുള്ള കുട്ടികൾക്ക് കോവിഡ് -19 ബാധിച്ചാൽ അപക‍ട സാധ്യത കൂടുമെന്ന് യൂനിസെഫ് പറയുന്നു. രോഗപ്രതിരോധ ശേഷി കുറഞ്ഞ കുട്ടികളെയും കൊറോണ വൈറസ് ബാധിക്കാനുള്ള സാധ്യത കൂടുതലാണ്. ഇവർ പതിവായി പരിശോധനയ്ക്ക് വിധേയരാകുകയും നല്ല ഭക്ഷണം കഴിക്കുകയും കൊറോണ വൈറസ് വരാനുള്ള സാധ്യത കുറയ്ക്കുന്നതിനാവശ്യമായ മറ്റ് മുൻകരുതലുകൾ പാലിക്കുകയും വേണം.

എപ്പോഴാണ് നിങ്ങളുടെ കുട്ടിയെ കോവിഡ്-19 പരിശോധനയ്ക്ക് വിധേയരാക്കേണ്ടത്?

നിങ്ങളുടെ കുട്ടി കോവിഡ് -19 ന്റെ ലക്ഷണങ്ങൾ കാണിക്കാൻ തുടങ്ങിയാൽ ഉടൻ തന്നെ നിങ്ങൾ വൈദ്യസഹായം തേടണം. കോവിഡ് പോസിറ്റീവ് ആയ കുടുംബാംഗങ്ങളുമായി കുട്ടി സമ്പർക്കം പുലർത്തിയിട്ടുണ്ടെങ്കിലോ, മൂന്ന് ദിവസത്തിലധികം നീണ്ടുനിൽക്കുന്ന പനി ഉണ്ടെങ്കിലോ, കോവിഡ് -19 ന്റെ മറ്റ് ലക്ഷണങ്ങൾ ഉണ്ടെങ്കിലോ ഉറപ്പായും നിങ്ങൾ ഡോക്ടറെ സമീപിക്കണം.