മെഡിറ്ററേനിയൻ ഡയറ്റ്; ശീലിക്കാൻ എളുപ്പമുള്ള ഭക്ഷണക്രമം; ഗുണങ്ങൾ എന്തെല്ലാം?

മെഡിറ്ററേനിയൻ ഡയറ്റിൽപ്രധാനമായും ഉൾപ്പെടുന്നത് പഴങ്ങളും പച്ചക്കറികളും പോലുള്ള സസ്യാധിഷ്ഠിത ഭക്ഷണം ആണ്. അതൊടൊപ്പം ‌ധാന്യങ്ങൾ, ബീൻസ്, പരിപ്പ്, കടൽ വിഭവങ്ങൾ, ചിക്കൽ, ഒലിവ് എണ്ണയിൽ നിന്നുള്ള അപൂരിത കൊഴുപ്പ് എന്നിവയെല്ലാം ചേരുമ്പോൾ ഈ ഡയറ്റ് പൂർണമാകുന്നു.

മധ്യകാലഘട്ടത്തിലെ ഭക്ഷണ രീതികളുമായി ഈ ഡയറ്റിന് ബന്ധമുണ്ടെന്ന് ഇറാനിയൻ ജേണൽ ഓഫ് പബ്ലിക് ഹെൽത്തിൽ പ്രസിദ്ധീകരിച്ച “ദി മെഡിറ്ററേനിയൻ ഡയറ്റ്: എ ഹിസ്റ്ററി ഓഫ് ഹെൽത്ത്” എന്ന പ്രബന്ധത്തിൽ സൂചിപ്പിക്കുന്നു. പുരാതന റോമാക്കാരും ഗ്രീക്കുകാരും ഈ തരത്തിലുള്ള ഭക്ഷണക്രമമാണ് പിന്തുടർന്നിരുന്നത് എന്നും പഠനങ്ങൾ സൂചിപ്പിക്കുന്നു. ബ്രെഡ്, വൈൻ, എണ്ണ, പച്ചക്കറികൾ, ചെറിയ അളവിൽ ഇറച്ചി, കടൽ വിഭവങ്ങൾ എന്നിവയൊക്കെ അടങ്ങിയതായിരുന്നു അവരുടെ ഭക്ഷണം.

ഒരാളുടെ മെഡിക്കൽ ഹിസ്റ്ററി അടിസ്ഥാനമാക്കി ഈ ഡയറ്റ് കസ്റ്റമൈസ് ചെയ്യാമെന്ന് മുംബൈ ഭാട്ടിയ ഹോസ്പിറ്റലിലെ ഡയറ്റീഷ്യൻ സോയ സർവെ ഇന്ത്യൻ എക്സ്പ്രസിനോട് പറഞ്ഞു. ആരോഗ്യകരമായ അപൂരിത കൊഴുപ്പുകളുടെയും ഒമേഗ -3 ഫാറ്റി ആസിഡുകളുടെയും ഉപയോ​ഗം പ്രോത്സാഹിപ്പിക്കുന്ന മെഡിറ്ററേനിയൻ ‍‍‍‍‍ഡയറ്റ് ശരീരത്തിൽ ആരോഗ്യകരമായ കൊളസ്ട്രോളിന്റെ അളവ് നിലനിർത്തുന്നു എന്നും സോയ സർവെ പറഞ്ഞു.