പരിസ്ഥിതിയെ സംരക്ഷിക്കാം, ജീവൻ രക്ഷിക്കാം; തിങ്ക്- ഹ്രസ്വചിത്രം ശ്രദ്ധേയമാകുന്നു

അബുദാബി: ലോക പരിസ്ഥിതി ദിനത്തോട് അനുബന്ധിച്ചു യു എ ഇ പ്രവാസി മലയാളികളുടെ കൂട്ടായ്മ ഒരുക്കിയ ഹ്രസ്വചിത്രം Think യൂട്യൂബിൽ ശ്രദ്ധ നേടുന്നു. പട്ടാമ്പി സ്വദേശി യായ മഹേഷ് പട്ടാമ്പിയാണ് ക്യാമറയും സംവിധാനവും നിർവഹിച്ചിരിക്കുന്നത്. പ്രധാന വേഷത്തിൽ ബേബി കാർത്തിക മഹേഷും, മറ്റു കഥാപാത്രങ്ങളായി ഷാർജ പ്രവാസികളായ ഹംസ ഫൈസൽ, നൗഷാദ് ഓച്ചിറ, സിന്ധു കുമാർ, തുടങ്ങിയവരും അഭിനയിച്ചിരിക്കുന്നു. എഡിറ്റിംഗ്, വൈശാഖ് ബാലയാണ് നിർവഹിച്ചിരിക്കുന്നത്.

'പ്രകൃതി മനോഹരിയാണ്, നമ്മുടെ അമ്മയാണ്, നാമടങ്ങുന്ന ആ പ്രകൃതിയുടെ മക്കൾ തന്നെയാണ് ഈ അമ്മയുടെ ഭീഷണിയും. എന്തൊക്കെ നിയമം വന്നാലും വലിച്ചെറിയുന്ന സ്വഭാവം നമ്മളെ വിട്ടു പോകാറില്ല. ഈ വലിച്ചു എറിയുന്ന പ്ലാസ്റ്റികുകൾ പ്രകൃതിക്കും ജീവജാലകങ്ങൾക്കും ഭീഷണിയാണ്. ഈ സന്ദേശം ഒരു കൊച്ചു കുട്ടിയുടെ ഓർമ്മപ്പെടുത്തലിലൂടെയാണ് ഈ കൊച്ചു ഹ്രസ്വ ചിത്രം'- ചിത്രം ഒരുക്കിയ മഹേഷ് പട്ടാമ്പി പറഞ്ഞു.


ജൂൺ 5-നാണ് ലോക പരിസ്ഥിതിദിനം ആചരിക്കുന്നത്. പരിസ്ഥിതി സംരക്ഷണത്തിന്റെ പ്രാധാന്യത്തെക്കുറിച്ച് ജനങ്ങളെ ബോധവൽക്കരിക്കുക എന്നതാണ് ലോകമെമ്പാടും പരിസ്ഥിതിദിനം ആചരിക്കുന്നതിലൂടെ ലക്ഷ്യമിടുന്നത്. ഭൂമിയുടെ സംരക്ഷണത്തിനും അഭിവൃദ്ധിയ്ക്കുമായി സജീവമായ നടപടികൾ കൈക്കൊള്ളാൻ ജനങ്ങളെയും സർക്കാരുകളെയും സംഘടനകളെയും പ്രോത്സാഹിപ്പിക്കുന്നതിനായി 1974 മുതൽ നമ്മൾ ലോക പരിസ്ഥിതിദിനം ആചരിച്ചു വരുന്നുണ്ട്.

Also Read- ലോക പരിസ്ഥിതി ദിനം 2021: ഈ വർഷത്തെ ആതിഥേയ രാജ്യം പാകിസ്ഥാൻ; പരിസ്ഥിതി ദിനത്തിന്റെ ചരിത്രം അറിയാം

ഈ വർഷം പരിസ്ഥിതിദിനത്തിന്റെ ഔദ്യോഗിക പ്രമേയമായി സ്വീകരിച്ചിരിക്കുന്ന വിഷയം 'ആവാസവ്യവസ്ഥയുടെ പുനഃസ്ഥാപനം' എന്നതാണ്. ഓരോ വർഷവും ഓരോ രാജ്യമാണ് പരിസ്ഥിതി ദിനത്തിന്റെ ഔദ്യോഗിക ആഘോഷങ്ങൾ സംഘടിപ്പിക്കാറുള്ളത്. ഇത്തവണ പാകിസ്ഥാനാണ് പരിസ്ഥിതി ദിനാഘോഷങ്ങളുടെ ആതിഥേയത്വം വഹിക്കുന്നത്. എന്നാൽ, കോവിഡ് മഹാമാരിയുടെ വ്യാപനം കണക്കിലെടുത്ത് പരിസ്ഥിതിദിനം വിർച്വൽ ആയി ആഘോഷിക്കാനാണ് ഈ വർഷം തീരുമാനിച്ചിട്ടുള്ളത്. ഈ ദിനത്തെക്കുറിച്ചുള്ള അവബോധം സൃഷ്ടിക്കുന്നതിന്റെ ഭാഗമായി വെബിനാറുകളും സമൂഹ മാധ്യമങ്ങളിൽ വിവിധങ്ങളായ മത്സരങ്ങളും സംഘടിപ്പിക്കുന്നുണ്ട്.