Budget 2021 Live Updates: എഴുപത്തിയഞ്ചു വയസ്സിനു മേല്‍ പ്രായമുള്ളവര്‍ ഇനി മുതൽ ആദായ നികുതി റിട്ടേണ്‍ സമര്‍പ്പിക്കേണ്ട

ന്യൂ​ഡ​ല്‍​ഹി: രണ്ടാം മോദി സർക്കാരിന്‍റെ മൂന്നാമത് ബജറ്റ് കേന്ദ്ര ധനകാര്യ മന്ത്രി നിർമലാ സീതാരാമൻ പാർലമെന്റിൽ അവതരിപ്പിക്കുന്നു. ആരോഗ്യ മേഖലയ്ക്ക് വലിയ പരിഗണന നൽകുന്നതാണ് ഇത്തവണത്തെ കേന്ദ്ര ബജറ്റ്. 64180 കോടിയുടെ ആത്മ നിർഭർ ആരോഗ്യ യോജന പദ്ധതിയും ധനമന്ത്രി ബജറ്റിൽ പ്രഖ്യാപിച്ചു. രാജ്യ തലസ്ഥാനത്ത് കര്‍ഷക സമരവും സംഘര്‍ഷ സാധ്യതയും തുടരുന്നതിനിടെയാണ് ധനമന്ത്രി നിർമ്മല സീതാരാമൻ ഇന്ന് ബജറ്റ് അവതരിപ്പിക്കുന്നത്. കോവിഡ് പ്രതിസന്ധി സൃഷ്ടിച്ചതിന് ശേഷമുളള ആദ്യ ബജറ്റ് കൂടിയാണിത്. രാവിലെ 10.15 ന് കേന്ദ്ര മന്ത്രിസഭ യോഗം ചേർന്ന് ബജറ്റിന് അനുമതി നൽകി. 11മണിക്കാണ് ധനമന്ത്രി നിർമലാ സീതാരാമൻ ബജറ്റ് അവതരിപ്പിച്ചു തുടങ്ങിയത്. പെട്ടി മാറ്റി, തുണിയിൽ പൊതിഞ്ഞ ഫയൽക്കെട്ടുമായി കീഴ് വഴക്കങ്ങൾ മാറ്റിയ ധനമന്ത്രി ഇത്തവണ പേപ്പർ രഹിത ബജറ്റാണ് അവതരിപ്പിക്കുനത് എന്ന പ്രത്യേകതയുമുണ്ട്. പൂർണമായും കോവിഡ് മാനദണ്ഡങ്ങൾ പാലിച്ചാണ് ബജറ്റ് അവതരണം. ബജറ്റ് അവതരണത്തിന് മുന്നോടിയായി പ്രധാനമന്ത്രിയുടെ അധ്യക്ഷതയിൽ സർവ്വകക്ഷി യോഗം ചേർത്തിരുന്നു. കോവിഡ് പ്രതിസന്ധികളെ മറികടക്കാനുള്ള പദ്ധതികൾക്ക് ആകും ഇത്തവണ ബജറ്റിൽ ഊന്നൽ നൽകുക. നികുതി ഘടനയിൽ മാറ്റവും സാമ്പത്തിക പുനരുജ്ജീവനവും ആണ് ബജറ്റിലെ പ്രതീക്ഷകൾ. ആത്മനിർഭർ ഭാരതിന്റെ തുടർ പദ്ധതികളും ബജറ്റിൽ ഉൾപ്പെടും.