നിലമ്പൂർ തേക്കിന് റെക്കോഡ് വില; ഘനമീറ്ററിന് 5.55 ലക്ഷം രൂപ

കഴിഞ്ഞ ദിവസം വനം വകുപ്പിൻ്റെ കരുളായി നെടുങ്കയം ടിമ്പർ സെയിൽസ് ഡിപ്പോയിൽ നടന്ന ഇ-ലേലത്തിലാണ് തേക്ക് തടി ചരിത്രത്തിലെ ഏറ്റവും ഉയർന്ന വിലയ്ക്ക് പോയത്.

തിരുവനന്തപുരം വൃന്ദാവൻ ടിമ്പേഴ്സ് ഉടമ ഡോ. അജീഷാണ് ഈ തടി സ്വന്തമാക്കിയത്. 1909 ൽ ബ്രിട്ടീഷുകാർ നട്ടുപിടിപ്പിച്ചതും നെടുങ്കയം ഡിപ്പോ പരിസരത്ത് നിന്നിരുന്നതുമായ തേക്ക് തടിയാണിത്. 3. 214 ഘനമീറ്ററുള്ള ഈ തേക്ക് തടിക്ക് 274 സെൻ്റമീറ്റർ മധ്യവണ്ണവും 6.8 മീറ്റർ നീളവും ഉണ്ട് . ബി, കയറ്റുമതി ഇനത്തിൽപ്പെട്ട തേക്ക് തടിക്ക്, ഘനമീറ്ററിന് 5 ലക്ഷത്തി 55000 രൂപ പ്രകാരമാണ് വില ലഭിച്ചത്.  27 ശതമാനം നികുതി കൂടി ഉൾപ്പെടുത്തിയാണ് 22 ലക്ഷം രൂപ.

നിലമ്പൂരിൻ്റെ തേക്ക് ലേലത്തിൽ ചരിത്ര വിലയാണിത്. പാലക്കാട് ടിമ്പർ സെയിൽ ഡി എഫ് ഒ വിമലാണ് ലേലത്തിന് നേതൃത്വം നൽകിയത്, ഈ തടി സ്വന്തമാക്കാൻ നിലമ്പൂരിലെ പ്രമുഖ വ്യാപാരികൾ ഉൾപ്പെടെ നിരവധിപേർ ലേലത്തിൽ പങ്കെടുത്തിരുന്നു.