മേയിൽ വൈഫൈ ആപ്പ് സേവനം നിർത്തി വെക്കാനൊരുങ്ങി ഗൂഗിൾ; ഇനിമുതല്‍ ഗൂഗിൾ ഹോം ഉപയോഗിക്കാൻ നിർദ്ദേശം

സ്മാർട്ട് റോട്ടറുകൾ കൺട്രോൾ ചെയ്യാൻ ഉപയോഗിക്കുന്ന ഗൂഗിൾ വൈഫൈ ആപ്പ് നീക്കം ചെയ്യാൻ ഒരുങ്ങുകയാണ് ഗൂഗിൾ. ഇനിമുതൽ ഈ നിയന്ത്രണങ്ങൾ ഗൂഗിൾ ഹോം ആപ്ലിക്കേഷനിലേക്ക് മാറ്റാനാണ് ഈ ടെക് കമ്പനി പ്ലാൻ ചെയ്യുന്നത്. ഗൂഗിൾ വൈഫൈ, ഓൺഹബ് റോട്ടറുകൾ കോൺഫിഗർ ചെയ്യാനും, കൺട്രോൾ ചെയ്യാനും കഴിയുന്ന ഈ ആപ്പ് വഴി ഉപയോക്താക്കൾക്ക് വൈഫൈ ഓഫ് ചെയ്യുക, ഓൺ ചെയ്യുക, സ്പീഡ് നിയന്ത്രിക്കുക, വൈഫൈ പാസ് വേഡ് നിയന്ത്രിക്കുക തുടങ്ങിയ കാര്യങ്ങളാണ് സാധിച്ചിരുന്നത്. ഭാവിയിൽ ഇത്തരം സെറ്റിംഗ്സ് ഉപയോഗങ്ങൾക്കായി ഇനി ഗൂഗിൾ ഹോമിനെ അവലംബിക്കേണ്ടി വരും ഉപയോക്താക്കൾക്ക്. ദി വെർജിൽ വന്ന പുതിയ റിപ്പോർട്ട് അനുസരിച്ച് മെയ് 25 മുതൽ ഈ പ്രവർത്തനങ്ങൾ അവസാനിക്കും.

ഗൂഗിൾ വൈഫൈ ഉപയോഗിക്കുന്ന ആളുകൾക്ക് മേൽപറഞ്ഞ തിയതി മുതൽ ഈ ആപ്പ് ഉപയോഗിച്ച് റോട്ടറുകൾ നിയന്ത്രിക്കാൻ സാധിക്കുകയില്ല എന്നു മാത്രമല്ല ആപ്പിൽ നെറ്റ് വർക്ക് സ്റ്റാറ്റസ് പോലും കാണിക്കുകയില്ല. ഗൂഗിൾ പ്ലേ സ്റ്റോറിൽ നിന്നും ആപ്പിൾ ആപ്പ് സ്റ്റോറിൽ നിന്നും ഈ ആപ്ലിക്കേഷൻ ഉടൻ തന്നെ നീക്കം ചെയ്യപ്പെടും എന്നും റിപ്പോർട്ട് പറയുന്നു.