എഐ അസിസ്റ്റന്റ് ടൂളുമായി മൈക്രോസോഫ്റ്റ്; 'സെക്യൂരിറ്റി കോപൈലറ്റ്' പുറത്തിറക്കി; പ്രത്യേകതകളറിയാം

തടസങ്ങളില്ലാതെ പ്രവർത്തിക്കാനാകും വിധമാണ് സെക്യൂരിറ്റി കോപൈലറ്റ് രൂപകൽപന ചെയ്തിരിക്കുന്നതെന്നും എന്താണ് സംഭവിക്കുന്നതെന്ന് വേ​ഗത്തിൽ തിരിച്ചറിയാനും മെഷീൻ വേഗതയിൽ കൂടുതൽ വിവരവങ്ങൾ ശേഖരിക്കാനും കാര്യക്ഷമമായ തീരുമാനങ്ങൾ എടുക്കാനും പുതിയ ടൂൾ സഹായിക്കുമെന്ന് കമ്പനി ബ്ലോഗ് പോസ്റ്റിൽ കുറിച്ചു. ഡാറ്റ സംഗ്രഹിക്കുക, അപകടസാധ്യതകൾ പരിശോധിക്കുക, തുടങ്ങിയ ചുമതലകൾ നിർവഹിക്കുന്നതിന് ജീവനക്കാരെ ഈ എഐ സഹായിക്കും. സൈബർ ആക്രമണകാരികൾ, അവരുടെ തന്ത്രങ്ങൾ, സാങ്കേതികതകൾ, നടപടിക്രമങ്ങൾ എന്നിവയെക്കുറിച്ചുള്ള ഏറ്റവും പുതിയ അറിവോടെയാണ് സുരക്ഷാ മേഖലയിലെ ടീമുകൾ പ്രവർത്തിക്കുന്നതെന്ന് ഉറപ്പാക്കാൻ സെക്യൂരിറ്റി കോപൈലറ്റ് തുടർച്ചയായി പഠിക്കുകയും അതിന്റെ സേവനം മെച്ചപ്പെടുത്തുകയും ചെയ്യും.

മൈക്രോസോഫ്റ്റിന്റെ സേർച്ച് എഞ്ചിൻ പ്ലാറ്റ്ഫോമായ ബിംഗിൽ ഓപ്പൺ എഐ ആയ ചാറ്റ് ജിപിടിയുടെ (ChatGPT) സേവനം അടുത്തിടെ അവതരിപ്പിച്ചിരുന്നു. ബിം​ഗിന്റെ അപ്ഡേറ്റഡ് വേ‍ർഷനും മൈക്രോസോഫ്റ്റ് ലോഞ്ച് ചെയ്തിരുന്നു ആദ്യം, തിരഞ്ഞെടുത്ത ഡെസ്‌ക്‌ടോപ്പ് ഉപയോക്താക്കൾക്ക് മാത്രമാണ് പുതിയ സേവനം ലഭ്യമായത്. ‌ ചാറ്റ് ജിപിടിയുടെ നാലാം പതിപ്പാണ് ബിം​ഗിൽ ഉപയോഗിക്കുന്നത്. തൽക്കാലത്തേക്ക് മുൻകൂട്ടി നിശ്ചയിച്ചിട്ടുള്ള ചോദ്യങ്ങളോട് മാത്രമേ ബിം​ഗിലെ ചാറ്റ് ജിപിടി പ്രതികരിക്കൂ. പ്രിവ്യൂ ഘട്ടത്തിനു ശേഷം ഉപയോക്താക്കൾക്ക് കൂടുതൽ വിപുലമായ സേവനങ്ങൾ ലഭ്യമാകും.