ഇനി പ്രൊഫൈൽ ഫോട്ടോയുടെ സ്ക്രീൻഷോട്ട് എടുക്കാൻ സാധിക്കില്ല; പുതിയ ഫീച്ചറുമായി വാട്സ്ആപ്പ്

ഫീച്ചർ നിലവിൽ വരുന്നതോടെ കോൺടാക്ട് ലിസ്റ്റിലെ ആരുടെയും പ്രൊഫൈൽ ചിത്രങ്ങൾ സ്ക്രീൻഷോട്ട് എടുക്കാൻ സാധിക്കില്ല. അടുത്തിടെ പ്രൊഫൈൽ ചിത്രങ്ങൾ സ്ക്രീൻഷോട്ട് എടുക്കാൻ ശ്രമിച്ചവർക്ക് സ്ക്രീൻഷോട്ടിൽ പ്രൊഫൈൽ ചിത്രത്തിന് പകരം ഇരുണ്ട നിറം മാത്രം ലഭിച്ചതോടെയാണ് പുതിയ ഫീച്ചർ ചർച്ചയാകുന്നത്. ബീറ്റ വേർഷനിൽ ലഭ്യമായ അപ്ഡേറ്റ് അനുസരിച്ച് സ്ക്രീൻഷോട്ട് എടുക്കാൻ ശ്രമിക്കുമ്പോൾ “ ആപ്പിന്റെ പുതിയ നിയന്ത്രണങ്ങൾ കാരണം സ്ക്രീൻഷോട്ട് എടുക്കാൻ സാധിക്കില്ല” എന്ന തരത്തിൽ ഒരു സന്ദേശമാണ് വാട്സ്ആപ്പ് നൽകുന്നത്. എന്നാലിത് ഒരു ഓപ്‌ഷനായി നൽകാൻ ഉദ്ദേശിക്കുന്നില്ലെന്ന് വാട്സ്ആപ്പ് അധികൃതർ വ്യക്തമാക്കി. അങ്ങനെ ചെയ്താൽ പലരും അത് ഓഫ്‌ ചെയ്യാൻ സാധ്യതയുണ്ടെന്നും അതൊരിക്കലും കമ്പനി വാഗ്ദാനം ചെയ്യുന്ന ഉപഭോക്തൃ വിവര സംരക്ഷണമാകില്ലെന്നും അധികൃതർ ചൂണ്ടിക്കാട്ടി.

ഉടൻ തന്നെ ഫീച്ചർ എല്ലാ ആൻഡ്രോയ്ഡ് ഫോണുകളിലും ലഭ്യമാകുമെന്നാണ് കരുതുന്നത്. ഐ ഫോണുകളിൽ ഫീച്ചർ അവതരിപ്പിക്കുന്നതിനെക്കുറിച്ചുള്ള വിവരങ്ങൾ ഒന്നും നിലവിൽ ലഭ്യമല്ല. പ്രൊഫൈൽ പിക്ച്ചർ ഗാർഡ് എന്ന പേരിൽ ഫേസ്ബുക്കിൽ ഈ സംവിധാനം നിലവിലുണ്ട്. ഏതായാലും സ്ക്രീൻഷോട്ട് ബ്ലോക്ക് ചെയ്യുന്ന ഫീച്ചർ വരുന്നതോടെ സിഗ്നൽ, ടെലഗ്രാം തുടങ്ങിയ സമാന ആപ്പുകളിൽ മേധാവിത്വം വാട്സ്ആപ്പിന് ലഭിക്കും.