നൂറിലധികം തട്ടിപ്പ് കേസിലെ പ്രതി; പൊലീസിന്റെ തീരാതലവേദന; ഒടുവിൽ തട്ടിപ്പു വീരൻ പിടിയിൽ

വ്യാപാര സ്ഥാപനങ്ങളിൽ നിന്നും പണം തട്ടി പിടികൂടിയ പ്രതി സമാനമായ നൂറിലധികം കേസുകളിൽ ഉൾപ്പെട്ടിട്ടുള്ളയാളാണെന്ന് തുടർ പരിശോധനയിലാണ് അന്വേഷണ സംഘം കണ്ടെത്തിയത്. തെക്കൻ ജില്ലകളിലെല്ലാം ഇയാൾക്കെതിരെ കേസുകൾ ഉണ്ട്. ഇയാൾ പിടിയിലായതിന് പിന്നാലെ എല്ലാ ജില്ലകളിൽ നിന്നും പ്രതിയെ കസ്റ്റഡിയിൽ കിട്ടുന്നതിനായി കൊല്ലം റൂറൽ പോലീസിനെ ബന്ധപ്പെട്ടുകൊണ്ടിരിക്കുകയാണ്.

സത്രീകൾ ജീവനക്കാരായുള്ള സ്ഥാപനങ്ങളിലാണ് പ്രധാന തട്ടിപ്പ്. കടയിൽ കയറി ഉടമയെ ഫോൺ ചെയ്യുന്ന പോലെ അഭിനയിക്കും. ഉടമ ചോദിച്ചതു പ്രകാരം എന്നു തോന്നിപ്പിച്ച് കളക്ഷൻ എത്രയെന്ന് അന്വേഷിക്കും.

രാവിലെ മുതൽ KL 33 G 3425 എന്ന ഹോണ്ട മോട്ടോർസൈക്കിളിൽ കറങ്ങി നടന്ന് തട്ടിപ്പ് നടത്തിയ ശേഷം വൈകുന്നേരത്തോടെ വീടണയുന്ന സ്വഭാവക്കാരനാണ്.  കൊല്ലം റൂറൽ ജില്ലയിലെ കേസുകൾക്ക് പുറമേ സിനിമയിൽ അഭിനയിപ്പിക്കാമെന്നു വാഗ്ദാനം നടത്തി പീഡിപ്പിക്കാൻ ശ്രമിച്ച കുറ്റത്തിന് ആലപ്പുഴ സൗത്ത് സ്റ്റേഷനിലും വ്യാപാരസ്ഥാപനങ്ങളിൽ മോഷണത്തിനും തട്ടിപ്പിനും തോപ്പുംപടി സ്റ്റേഷനിലും ഇയാൾക്കെതിരെ കേസുകളുണ്ട്.

തോപ്പുംപടിയിലുള്ള തടമില്ലിൽ തടി വാങ്ങാനെന്ന വ്യാജേന എത്തി ഒരു ലക്ഷത്തി തൊണ്ണൂറായിരം രൂപ മോഷ്ടിച്ചു. പശ്ചിമകൊച്ചി, പള്ളുരുത്തി, മട്ടാഞ്ചേരി, ഫോർട്ട്കൊച്ചി, എന്നിവിടങ്ങളിൽ സമാനമായ കേസുകൾ നിലവിലുണ്ട്.

കൊല്ലം റൂറൽ ജില്ലാ പോലീസ് മേധാവിയുടെ നേതൃത്വത്തിൽ രൂപീകരിച്ച പ്രത്യേക അന്വേഷണ സംഘം വിദഗ്ദമായാണ് പ്രതിയെ പിടി കൂടിയത്. ലോക്ക്ഡൗൺ കാലത്തും കൊല്ലം റൂറൽ പോലീസിന് മറ്റൊരു കേസിൽ കൂടി മികവ് തെളിയിക്കാനായി.