അയോധ്യ പ്രാണപ്രതിഷ്ഠക്ക് മുന്നോടിയായി മെക്സിക്കോയിൽ ആദ്യ രാമക്ഷേത്രം തുറന്നു

അയോധ്യ ശ്രീരാമക്ഷേത്ര പ്രാണപ്രതിഷ്ഠാ (Ayodhya pran-pratishtha) ചടങ്ങിനൊരുങ്ങുമ്പോൾ വടക്കേ അമേരിക്കൻ രാജ്യമായ മെക്സിക്കോയിൽ ആദ്യത്തെ രാമക്ഷേത്രത്തിന്റെ പ്രതിഷ്ഠ ഞായറാഴ്ച നടത്തി. മെക്സിക്കോയിലെ ക്വെറെറ്റാരോ (Queretaro) നഗരത്തിലാണ് രാജ്യത്തെ ആദ്യ രാമക്ഷേത്രം ഭക്തർക്കായ് തുറന്നത്. വിഗ്രഹ പ്രതിഷ്ഠക്ക് ശേഷം പുരോഹിതന്റെയും മെക്സിക്കൻ പ്രതിനിധികളുടെയും നേതൃത്വത്തിൽ മേക്സിക്കോയിലെ ഹിന്ദു പ്രവാസി സമൂഹം ദേവ ഗീതങ്ങൾ ആലപിച്ചു. ക്ഷേത്രത്തിൽ പ്രതിഷ്ഠിച്ച വിഗ്രഹങ്ങൾ എല്ലാം ഇന്ത്യയിൽ നിന്ന് എത്തിച്ചവയാണ്. രാമക്ഷേത്രം നിലവിൽ വന്ന വിവരം മെക്സിക്കോയിലെ ഇന്ത്യൻ എംബസ്സിയാണ് ഔദ്യോഗിക എക്സ് ആക്കൗണ്ട് വഴി അറിയിച്ചത്. മെക്സിക്കോയിലെ തന്നെ ആദ്യത്തെ ഹനുമാൻ ക്ഷേത്രവും സ്ഥിതി ചെയ്യുന്നത് ക്വെറെറ്റാരോയിലാണ്.