ആഞ്ഞടിച്ച് ധവാനും പന്തും; ടി20യിൽ ഇന്ത്യൻ ജയം സമ്പൂർണം

182 റൺസ് വിജയലക്ഷ്യവുമായി ബാറ്റുവീശിയ ഇന്ത്യ ഒരു ഘട്ടത്തിൽ രണ്ടിന് 45 എന്ന നിലയിലായിരുന്നു. നായകൻ രോഹിത് ശർമ(നാല്), കെ.എൽ രാഹുൽ(17) എന്നിവർ തുടക്കത്തിലേ പുറത്തായി. മൂന്നാം വിക്കറ്റിൽ ഒത്തുചേർന്ന ധവാനും പന്തും ചേർന്ന് ഇന്ത്യയെ അനായാസം ലക്ഷ്യത്തിലേക്ക് നയിക്കുകയായിരുന്നു. മൂന്നാം വിക്കറ്റിൽ ഇരുവരും ചേർന്ന് 78 പന്തിൽ 130 റൺസാണ് അടിച്ചെടുത്തത്. 62 പന്തിൽ പത്ത് ബൌണ്ടറികളും രണ്ട് സിക്സറും ഉൾപ്പടെയാണ് ധവാൻ 92 റൺസെടുത്തത്. 38 പന്ത് നേരിട്ട റിഷഭ് പന്ത് മൂന്ന് സിക്സറും അഞ്ച് ബൌണ്ടറികളും ഉൾപ്പടെയാണ് 58 റൺസെടുത്തത്. ലക്ഷ്യത്തിനരികിൽ പന്തും ധവാനും മടങ്ങിയെങ്കിലും ആശങ്കപ്പെടുത്താതെ മനിഷ് പാണ്ഡെയും ദിനേഷ് കാർത്തിക്കും ചേർന്ന് ഇന്ത്യയെ ലക്ഷ്യത്തിലെത്തിക്കുകയായിരുന്നു.