ബ്ലാസ്റ്റേഴ്സിനെ ഇനി നെലോ വിംഗാദ കളി പഠിപ്പിക്കും

കൊച്ചി: ഇന്ത്യൻ സൂപ്പർ ലീഗിൽ കേരളത്തിന്‍റെ ക്ലബായ കേരള ബ്ലാസ്റ്റേഴ്സിന്‍റെ പരിശീലകനായി മുൻ പോർച്ചുഗൽ താരം നെലോ വിംഗാദ എത്തും. കേരള ബ്ലാസ്റ്റേഴ്സ് ആരാധകരുടെ ഔദ്യോഗിക ഫേസ്ബുക്ക് പേജിലൂടെ അറിയിച്ചതാണ് ഇക്കാര്യം. വിഖ്യാത ഇംഗ്ലീഷ് താരം ഡേവിഡ് ജെയിംസ് സ്ഥാനമൊഴിഞ്ഞതോടെയാണ് പുതിയ പരിശീലകനെ ബ്ലാസ്റ്റേഴ്സ് നിയമിച്ചത്. നെലോ വിംഗാദയെ സംബന്ധിച്ച് ഐ.എസ്.എൽ പുതിയ കളരിയല്ല. 2016 സീസണിൽ നോർത്ത് ഈസ്റ്റ് യുണൈറ്റഡിനെ പരിശീലിപ്പിച്ചത് ഇദ്ദേഹമായിരുന്നു. പോർച്ചുഗൽ അണ്ടർ-20 ടീം, സൌദി അറേബ്യ, ഈജിപ്ത്, ജോർദാൻ, ഇറാൻ, മലേഷ്യ ദേശീയ ടീമുകളെയും വിംഗാദ പരിശീലിപ്പിച്ചിട്ടുണ്ട്. നെലോ വിംഗാദ പരിശീലിപ്പിച്ച പോർച്ചുഗൽ ടീം 1995-ൽ നടന്ന അണ്ടർ-20 ലോകകപ്പിൽ മൂന്നാം സ്ഥാനം നേടിയിരുന്നു.