Santosh Trophy | റാഷിദിന് വീടും സ്ഥലവും; സന്തോഷ് ട്രോഫി താരത്തിന് പെരുന്നാൾ സമ്മാനവുമായി ടി സിദ്ദിഖ്

ഫൈനൽ മത്സരത്തിന് ശേഷം പെരുന്നാൾ ദിനത്തിൽ വീട്ടിലെത്തിയ താരത്തെ കാണാനായി എംഎൽഎ എത്തിയതായിരുന്നു. അപ്പോഴാണ് റാഷിദിന് സ്വന്തമായി വീടോ സ്ഥലമോ ഇല്ലെന്നറിഞ്ഞത്. തുടർന്ന് റാഷിദിന്റെയും കുടുംബത്തിന്റെയുമൊപ്പം ഉണ്ടാകുമെന്ന ഉറപ്പ് എംഎൽഎ നൽകിയത്. കിരീടം നേടിയതിന്റെ സന്തോഷം താരത്തിന് മധുരം നൽകി പങ്കിട്ടതിന് ശേഷമാണ് എംഎൽഎ മടങ്ങിയത്. റാഷിദിനെ സന്ദർശിച്ചതും താരത്തിന് സ്ഥലവും വീടും നൽകുമെന്ന് ഉറപ്പ് നൽകിയതായും എംഎൽഎ ഫേസ്ബുക്കിലൂടെയാണ് അറിയിച്ചത്.

റാഷിദിന് പുറമെ കേരളത്തിന്റെ മറ്റൊരു താരമായ സഫ്നാദും കൽപ്പറ്റ മണ്ഡലത്തില്‍ നിന്നുളള താരമാണ്. സഫ്നാദിന്റെ ഗോളിലായിരുന്നു കേരളം ബംഗാളിനെ സമനിലയിൽ പിടിച്ചതും തുടർന്ന് കളി പെനാൽറ്റി ഷൂട്ടൗട്ടിലേക്ക് നീട്ടിയെടുത്തതും. കിരീടനേട്ടത്തിലൂടെ കേരളത്തിന്റെ അഭിമാനമുയർത്തിയ താരങ്ങൾക്ക് കൽപ്പറ്റയിൽ വലിയ സ്വീകരണം ഒരുക്കുമെന്നും അദ്ദേഹം കൂട്ടിച്ചേർത്തു.