യുകെയില്‍ 85 ശരിഅത്ത് കോടതികള്‍; പശ്ചാത്യലോകത്തെ ഇസ്ലാമിക നിയമ തലസ്ഥാനമോ ബ്രിട്ടന്‍?

യുകെയില്‍ 85ഓളം ശരിഅത്ത് കോടതികൾ പ്രവര്‍ത്തിക്കുന്നതായി റിപ്പോര്‍ട്ട്. പാശ്ചാത്യലോകത്തെ ഇസ്ലാമിക നിയമങ്ങളുടെ തലസ്ഥാനമായി ബ്രിട്ടന്‍ ഉയര്‍ന്നുവരുന്നതായി യുകെയിലെ ചില മാധ്യമങ്ങൾ റിപ്പോര്‍ട്ടു ചെയ്യുന്നു. ഈ മതസംവിധാനത്തിന് വലിയ സ്വാധീനമാണ് ഉള്ളത്. യൂറോപ്പില്‍ നിന്നും വടക്കേ അമേരിക്കയില്‍ നിന്നുമുള്ള മുസ്ലീങ്ങള്‍ വിവാഹത്തിനും മറ്റ് കുടുംബപരമായ കാര്യങ്ങളിലും വിധികള്‍ തേടി യുകെയിലാണ് എത്തുന്നതെന്ന് യുകെ ദിനപത്രമായ ടൈംസിനെ ഉദ്ധരിച്ച് ഇന്ത്യ ടുഡെ റിപ്പോര്‍ട്ട് ചെയ്യുന്നു. ഒരു സമാന്തര നിയമവ്യവസ്ഥയായി ഇത് ഉയര്‍ന്നുവരുന്നതില്‍ യുകെയിലെ നാഷണല്‍ സെക്യുലര്‍ സൊസൈറ്റി ആശങ്ക പ്രകടിപ്പിക്കുന്നതായും റിപ്പോര്‍ട്ടില്‍ പറയുന്നു. 1982ലാണ് യുകെയിലെ ആദ്യത്തെ ശരിഅത്ത് കൗണ്‍സില്‍ സ്ഥാപിതമായത്.