'സ്ത്രീകളുടെ അന്തസിനേക്കുറിച്ച് ക്ലാസെടുത്തിരുന്ന ആളാണോ ഇത്'; 'അനിമലി'നെ അഭിനന്ദിച്ച് പോസ്റ്റിട്ടതിനു പിന്നാലെ തൃഷയ്ക്ക് രൂക്ഷവിമർശനം

സോഷ്യൽ മീഡിയ താരങ്ങൾ‌ പങ്കുവയ്ക്കുന്ന പല പോസ്റ്റുകളും ഏറെ വിവാദങ്ങൾക്കും ട്രോളുകള്‍ക്കും വഴിയൊരുക്കുന്നത് പതിവാണ്. ഇപ്പോഴിതാ അത്തരത്തിലുള്ള ട്രോളുകള്‍ക്ക് വഴിയൊരുക്കിയിരിക്കുകയാണ് നടി തൃഷ.

രൺബീർ കപൂർ നായകനായ അനിമൽ എന്ന ചിത്രത്തെ പ്രശംസിച്ച് പോസ്റ്റിട്ടതിനു പിന്നാലെയാണ് താരത്തിനെ തേടി വിമർശനങ്ങൾ എത്തിയത്. സം​ഗതി വിവാദമായതോടെ അവർ പിന്നീട് പോസ്റ്റ് പിൻവലിച്ചു.

'അനിമല്‍' സിനിമയെ പ്രശംസിച്ചായിരുന്നു നടി തൃഷയുടെ പോസ്റ്റ്. ഒറ്റ വാക്ക്–കള്‍ട്ട് എന്നാണ് രണ്‍ബീര്‍ കപൂര്‍ നായകനായ സിനിമയെ കുറിച്ച് തന്റെ ഇന്‍സ്റ്റഗ്രാം സ്റ്റോറിയില്‍ തൃഷ കുറിച്ചത്. ഇതിനു പിന്നാലെ ആരാധകരുടെ പ്രതികരണം രൂക്ഷമായതോടെ താരം ഇന്‍സ്റ്റാ സ്റ്റോറി പിന്‍വലിച്ചു.

പക്ഷേ ഇതിന്റെ സ്‌ക്രീന്‍ഷോട്ടുകളാണ് ഇപ്പോള്‍ വൈറലായിരിക്കുന്നത്. ടോക്‌സിക്കായിട്ടുള്ള പുരുഷന്മാരെ നടി ഹീറോയായി കാണിക്കുകയാണെന്നും, അത്തരം കാര്യത്തെ നടി പിന്തുണയ്ക്കുന്നുവെന്നും ആരാധകര്‍ ആരോപിച്ചു.

സ്ത്രീകളുടെ അന്തസിനേക്കുറിച്ച് ക്ലാസെടുത്തിരുന്ന ആളാണോ ഇങ്ങനെ പറയുന്നത് എന്നാണ് പലരും ചോദിക്കുന്നത്. മന്‍സൂര്‍ അലി ഖാന്റെ പരാമര്‍ശവും, തൃഷയുടെ പിന്തുണയും ഒരുപോലെ കാണാവുന്നതാണെന്നും ചിലര്‍ ട്വീറ്റ് ചെയ്തിട്ടുണ്ട്.

അടുത്തിടെ നടന്‍ മന്‍സൂര്‍ അലി ഖാന്റെ വിവാദ പരാമര്‍ശത്തിനെതിരെ ശക്തമായ നിലപാടാണ് തൃഷ സ്വീകരിച്ചത്. അന്ന് അത്തരമൊരു നിലപാട് സ്വീകരിച്ച വ്യക്തിക്ക് ഇപ്പോള്‍ എങ്ങനെ അനിമലിനെ പിന്തുണയ്ക്കാന്‍ സാധിക്കുന്നു എന്നാണ് ആരാധകരുടെ ചോദ്യം.