Prabhas Salaar | 'യുദ്ധത്തിനായി നിങ്ങള്‍ സൈന്യത്തെ കൊണ്ടു വന്നു, ഞാന്‍ അവനെ കൊണ്ടുവന്നു'; പ്രഭാസിന് പിറന്നാള്‍ ആശംസയുമായി പൃഥ്വിരാജ്

ബാഹുബലി എന്ന ഒറ്റ സിനിമയിലൂടെ ഇന്ത്യയൊട്ടാകെ ആരാധകരെ സൃഷ്ടിച്ച തെലുങ്ക് സൂപ്പര്‍ താരം പ്രഭാസിന് പിറന്നാള്‍ ആശംസകളുമായി സിനിമാലോകം.

താരത്തിന്‍റെ 44-ാം പിറന്നാള്‍ ദിനത്തില്‍ പടുകൂറ്റന്‍ കട്ടൗട്ടുകൾ സ്ഥാപിച്ച് പാട്ടും ഡാൻസുമായി ആഘോഷ തിമിർപ്പിലാണ് ആരാധകർ.

പ്രഭാസ് ശ്രീരാമനനായെത്തിയ ആദിപുരുഷിന് ലഭിച്ച സമ്മിശ്ര പ്രതികരണം ഉണ്ടാക്കിയ ക്ഷീണം തീർക്കാൻ താരത്തിന്റെ പുതിയ സിനിമയായ സലാറിന് കഴിയുമെന്നാണ് ആരാധകരുടെ പ്രതീക്ഷ

കെജിഎഫ് ഒരുക്കിയ പ്രശാന്ത് നീലിന്റെ സംവിധാനത്തിൽ വലിയ ബജറ്റിൽ ഒരുക്കിയ സലാർ ഒരു ആക്ഷന്‍ ത്രില്ലർ ചിത്രം ആയിരിക്കും. 

മലയാളികളുടെ സ്വന്തം പൃഥ്വിരാജ് സുകുമാരനും സലാറിൽ പ്രഭാസിനൊപ്പം ഒരു പ്രധാന വേഷത്തിലെത്തുന്നു. പിറന്നാൾ ദിനത്തിൽ പ്രഭാസിന് ആശംസകൾ നേരാനും പൃഥ്വി മറന്നില്ല. 

'അവിശ്വസനീയമായ വ്യക്തിത്വമുള്ള ഈ മനുഷ്യന് എന്‍റെ പിറന്നാൾ ആശംസകൾ, എന്റെ സലാറിനായി ഡിസംബർ 22 വരെ കാത്തിരിക്കാന്‍ വയ്യ'. പൃഥ്വി കുറിച്ചു

ചിത്രത്തിൽ വരദരാജ മന്നാർ എന്ന കഥാപാത്രത്തെയാണ് പൃഥ്വിരാജ് അവതരിപ്പിക്കുന്നത്. 'യുദ്ധത്തിനായി നിങ്ങൾ സൈന്യത്തെ കൊണ്ടുവന്നു, ഞാൻ അവനെ കൊണ്ടുവന്നു' എന്നൊരു ഡയലോഗും ആശംസകൾക്കൊപ്പം താരം പങ്കുവെച്ചു. 

ഇരുവരും തമ്മിലുള്ള കോമ്പിനേഷന്‍ രംഗങ്ങള്‍ തിയേറ്ററുകളില്‍ പ്രേക്ഷകരില്‍ ആവേശം നിറക്കുമെന്ന് ഉറപ്പായി കഴിഞ്ഞു. 

പ്രായം 44 കഴിഞ്ഞിട്ടും ഇന്ത്യൻ സിനിമയിലെ തന്നെ മോസ്റ്റ് എലിജിബിൽ ബാച്ചിലർ താരം ഇപ്പോഴും പ്രഭാസ് തന്നെയാണ്. ഒരോ സിനിമ വരുമ്പോഴും വിവാഹക്കാര്യം ചര്‍ച്ചയാകാറുണ്ടെങ്കിലും താരം ഇതുവരെ ഇതിനോട് മനസ് തുറന്നിട്ടില്ല.