മണാലിയിൽ ടൂർ പോയ ശിഖർ ധവാൻ എച്ച്ഐവി ടെസ്റ്റ് ചെയ്തത് എന്തുകൊണ്ട്?

ന്യൂഡൽഹി: ഇന്ത്യൻ ക്രിക്കറ്റിലെ കരുത്തനായ ഓപ്പണറാണ് ശിഖർ ധവാൻ. ആക്രമണാത്മക ബാറ്റിങ് ശൈലിയിലൂടെ എതിർ ബോളർമാർക്കുമേൽ ആധിപത്യം സ്ഥാപിക്കുന്ന രീതിയാണ് ധവാന്‍റേത്. ഇപ്പോഴിതാ ചെറുപ്പത്തിൽ നടന്ന ഒരു സംഭവം വെളിപ്പെടുത്തിയിരിക്കുകയാണ് ശിഖർ ധവാൻ. 14-15 വയസുള്ളപ്പോൾ മണാലിയിൽ ടൂർ പോയതിന് പിന്നാലെ എച്ച്ഐവി പരിശോധന നടത്തേണ്ടിവന്ന സാഹചര്യമാണ് താരം വിവരിക്കുന്നത്.

ശരീരത്തിൽ ധാരാളം ടാറ്റൂ ചെയ്തിട്ടുള്ളയാളാണ് ധവാൻ. കുട്ടിക്കാലത്ത് മണാലിയിൽ ടൂർ പോയപ്പോഴാണ് ധവാൻ ആദ്യമായി ടാറ്റൂ ചെയ്തത്. ശരീരത്തിന്‍റെ പിൻഭാഗത്ത് ഒരു തേളിന്‍റെ ചിത്രമാണ് ധവാൻ ടാറ്റൂ ചെയ്തത്.

വീട്ടുകാരെ അറിയിക്കാതെയായിരുന്നു ധവാൻ ടാറ്റൂ ചെയ്തത്. അതുകൊണ്ടുതന്നെ മണാലിയിൽ നിന്ന് മടങ്ങിയെത്തിയശേഷം നാല് മാസത്തോളം വീട്ടുകാർ കാണാതെ ടാറ്റൂ ഒളിപ്പിച്ചായിരുന്നു ധവാന്‍ നടന്നത്. എന്നാൽ ഒടുവിൽ അച്ഛൻ ഇത് കണ്ടുപിടിച്ചതോടെ നല്ല അടിയും കിട്ടി.

അതിനിടെയാണ് തന്‍റെ ശരീരത്തിൽ ടാറ്റു ചെയ്ത സൂചി മറ്റുള്ളവരിലും ഉപയോഗിച്ചിട്ടുണ്ടാകാമെന്ന സംശയം ധവാന് ഉടലെടുത്തത്. ഇതോടെ തനിക്ക് ഭയമായി തുടങ്ങി. തനിക്ക് എയ്ഡ്സ് വരുമോയെന്ന് ഭയപ്പെടുകയും ചെയ്തതായി ധവാൻ. പറഞ്ഞു.

അങ്ങനെയാണ് ധവാൻ എച്ച്ഐവി പരിശോധനയ്ക്ക് പോയത്. ഏറെ ടെൻഷനോടെയാണ് സ്കൂളിന് സമീപത്തെ ലാബിൽ പോയി പരിശോധന നടത്തിയത്. ഫലം വന്നപ്പോൾ നെഗറ്റീവായിരുന്നു. അപ്പോഴാണ് ധവാന് ശ്വാസം നേരെ വീണത്.

ആ സംഭവമൊക്കെ കഴിഞ്ഞ് ക്രിക്കറ്റിൽ താരമായി മാറിയതോടെ ശരീരത്തിൽ കൂടുതൽ സ്ഥലങ്ങളിൽ ധവാൻ ടാറ്റു ചെയ്യാൻ തുടങ്ങി. ആദ്യത്തെ ടാറ്റുവിൽ കൂടുതൽ ഡിസൈനുകൾ ചേർത്തു.

കൂടാതെ കൈയിൽ ശിവന്‍റെയും അർജുനന്‍റെയും ടാറ്റൂ ചെയ്തു.

 ഐപിഎല്ലിൽ പഞ്ചാബ് കിങ്സിന്‍റെ ക്യാപ്റ്റനാണ് ധവാൻ. ഇത്തവണ ഐപിഎല്ലിൽ കരുത്തുറ്റ പ്രകടനം പുറത്തെടുക്കുമെന്നും ധവാൻ പറയുന്നു.