'എന്നെ ചെന്നൈ സൂപ്പര്‍ കിങ്‌സില്‍ എടുക്കുമോ?' ധോണിയോട് യോഗി ബാബു; മാസ് മറുപടിയുമായി 'ക്യാപ്റ്റന്‍ കൂള്‍'

ക്രിക്കറ്റ് ഐക്കണും ചെന്നൈ സൂപ്പർ കിങ്‌സ് നായകനുമായ എംഎസ് ധോണി സിനിമ രംഗത്തും ചുവടുറപ്പിച്ചു. ഇതിന്റെ ഭാഗമായി ധോണി എന്റർടെയിൻമെന്റ് പ്രൈവറ്റ് ലിമിറ്റഡിന്റെ ബാനറിൽ ധോണിയും ഭാര്യ സാക്ഷിയും ചേർന്ന് നിർമ്മിക്കുന്ന ചിത്രം ‘ലെറ്റ്‌സ് ഗെറ്റ് മാരീഡ്’അഥവ 'എൽജിഎം'ന്റെ ഓഡിയോ ലോഞ്ച് ചെന്നൈയിൽ നടന്നു. ഇതിനിടെ നടന്ന രസകരമായ സംഭവമാണ് ഇപ്പോൾ‌ വൈറലായിരിക്കുന്നത്.

സിനിമയുടെ പ്രൊമോഷൻ പരിപാടിക്കിടെയാണ് നടൻ യോഗി ബാബുവിന്റെ വൈറലായ ചോദ്യം. ഇതിനു ധോണി നൽകിയ മറുപടിയും വൈറലായി. ചെന്നൈ സൂപ്പർ കിങ്സിൽ തന്നെയും കളിപ്പിക്കണമെന്നായിരുന്നു യോഗി ബാബുവിന്റെ ആവശ്യം.

അമ്പാട്ടി റായിഡു വിരമിച്ചു. അതിനാല്‍ നിങ്ങള്‍ക്ക് സിഎസ്‌കെയില്‍ ഒരു സ്ഥാനമുണ്ട്. ഞാന്‍ മാനേജുമെന്റമായി സംസാരിക്കാം. പക്ഷെ നിങ്ങള്‍ സിനിമയുടെ തിരക്കിലാണ്. നിങ്ങള്‍ സ്ഥിരമായി കളിക്കണമെന്നാണ് ആഗ്രഹം. അവര്‍ വളരെ വേഗത്തില്‍ പന്തെറിയുകയും നിങ്ങളെ പരിക്കേല്‍പ്പിക്കുകയും ചെയ്യും'- ധോണി ട്വിറ്ററിൽ പറഞ്ഞു.

ചിത്രത്തിന്റെ ഓഡിയോ ലോഞ്ചിനായി എത്തിയപ്പോള്‍ ധോണിക്കും ഭാര്യയ്ക്കും ചെന്നൈ എയര്‍പോര്‍ട്ടില്‍ ആവേശകരമായ സ്വീകരണമാണ് ലഭിച്ചത്.

തിങ്കളാഴ്ച ലീലാ പാലസില്‍ വച്ചായിരുന്നു ചിത്രത്തിന്റെ ഓഡിയോ ലോഞ്ച്. ഹരീഷ് കല്യാണും ഇവാനയും പ്രധാന കഥാപാത്രങ്ങളെ അവതരിപ്പിക്കുന്ന ഒരു ഫാമിലി എന്റര്‍ടെയ്നറാണ് 'എല്‍ജിഎം'.