പീഡനത്തിനിരയായ 12 വയസുകാരി ഗുരുതരാവസ്ഥയിൽ; പലതവണ കുത്തേറ്റതായി കണ്ടെത്തൽ

ന്യൂഡൽഹി: ഡൽഹിയിൽ പ്രായപൂർത്തിയാകാത്ത പെൺകുട്ടിയെ പീഡിപ്പിച്ച ശേഷം കൊലപ്പെടുത്താൻ ശ്രമം. ഗുരുതരമായ പരിക്കേറ്റ 12കാരിയെ ഗുരുതരാവസ്ഥയിൽ എയിംസിൽ പ്രവേശിപ്പിച്ചിരിക്കുകയാണ്. പെൺകുട്ടിയുടെ നില ഗുരുതരമായി തുടരുന്നു.

ഡൽഹിയിലെ പശ്ചിമ വിഹാറിൽ ചൊവ്വാഴ്ചയാണ് സംഭവം ഉണ്ടായത്. പീഡനത്തിനിരയായ പെൺകുട്ടിയെ കുത്തിക്കൊലപ്പെടുത്താൻ ശ്രമിക്കുകയായിരുന്നു. മുർച്ചയേറിയ ആയുധം കൊണ്ട് പെൺകുട്ടിക്ക് പലതവണ കുത്തേറ്റതായും കണ്ടെത്തി.

സംഭവവുമായി ബന്ധപ്പെട്ട് പീഡനത്തിനും കൊലപാതക ശ്രമത്തിനും കേസെടുത്തു. പോക്സോ വകുപ്പുകൾ പ്രകാരവും കേസ് രജിസ്റ്റർ ചെയ്തിട്ടുള്ളതായി പൊലീസ് വൃത്തങ്ങൾ അറിയിച്ചു.

വീടിനുള്ളിൽ വെച്ചാണ് പെൺകുട്ടി ആക്രമിക്കപ്പെട്ടത്. പെൺകുട്ടിയുടെ അച്ഛനും അമ്മയും സഹോദരിയും അടുത്തുളള വസ്ത്ര നിർമാണ ഫാക്ടറിയിൽ ജോലി നോക്കുകയാണ്. ഇവർ ജോലിക്കു പോയിരുന്ന സമയത്താണ് പെൺകുട്ടി പീഡനത്തിന് ഇരയായത്.

ഫാക്ടറിയിൽ ജോലി ചെയ്യുന്നവരടക്കം നിരവധി പേർ താമസിക്കുന്ന കെട്ടിടത്തിലെ ഒറ്റ മുറിയിലാണ് പെൺകുട്ടിയും കുടുംബവും താമസിച്ചിരുന്നത്. ഇവിടെയുള്ളവരെ പൊലീസ് ചോദ്യം ചെയ്തു. സമീപത്തെ സിസിടിവി ദൃശ്യങ്ങളും പൊലീസ് പരിശോധിച്ച് വരികയാണ്.

ഗുരുതരമായി പരിക്കേറ്റ് രക്തത്തിൽ കുളിച്ച നിലയിൽ പെൺകുട്ടി ഇവർ താമസിക്കുന്ന മുറിക്ക് പുറത്തേക്ക് വരുന്നത് കണ്ട സമീപവാസികൾ ഇക്കാരൃം പൊലീസിൽ അറിയിക്കുകയായിരുന്നു.

ആദ്യം സമീപത്തെ സർക്കാർ ആശുപത്രിയിലാണ് എത്തിച്ചത്. എന്നാൽ പരിക്ക് ഗുരുതരമായതിനെ തുടർന്ന് എയിംസിലേക്ക് കൊണ്ടുപോകാൻ നിർദേശിക്കുകയായിരുന്നു.

പെൺകുട്ടിയെ ക്രൂരമായി പീഡനത്തിനിരയാക്കിയ ശേഷം സംഭവം പുറത്തു പറയാതിരിക്കാനാണ് അക്രമി കൊലപ്പെടുത്താൻ ശ്രമിച്ചതെന്നാണ് പൊലീസ് പറയുന്നത്.

പെൺകുട്ടിക്ക് സുപരിചിതനായ ആളാണ് അക്രമിയെന്നും പൊലീസ് സംശയിക്കുന്നുണ്ട്.സംഭവവുമായി ബന്ധപ്പെട്ട് ആരെയും ഇതുവരെ അറസ്റ്റ് ചെയ്തിട്ടില്ല. അന്വേഷണം പുരോഗമിക്കുകയാണ്.