സ്വർണം മാറ്റി മുക്കുപണ്ടം വച്ചു; നെടുങ്കണ്ടത്ത് വീട്ടിൽ നിന്നും കള്ളൻ കവർന്നത് 23 പവൻ

നെടുങ്കണ്ടം: വീടിനുള്ളിൽ കയറിയ കള്ളൻ ബാഗിൽ മുക്കുപണ്ടം വച്ചശേഷം സ്വർണാഭരണങ്ങൾ മോഷ്ടിച്ചു. ബാലഗ്രാം പാലമൂട്ടിൽ പി.കെ. റെജിയുടെ വീട്ടിലെ അലമാരയിൽ നിന്നാണ് 23 പവൻ സ്വർണാഭരണം മോഷണം പോയത്. മോഷണം അറിയാതിരിക്കാനാണ് ഇതു ചെയ്തതെന്നാണ് പ്രഥമിക നിഗമനം.

മകളുടെ വിവാഹ ആവശ്യത്തിനായി സൂക്ഷിച്ചിരുന്ന 23 പവനാണ് മോഷ്ടിക്കപ്പെട്ടത്. റെജിയുടെ ഭാര്യ ഹൃദയസംബദ്ധമായ അസുഖത്തെത്തുടർന്ന് കോട്ടയത്തെ സ്വകാര്യ ആശുപത്രിയിൽ ചികിത്സയ്ക്കു പോയിരുന്ന സമയത്താണ് മോഷണം നടന്നത്.

ഈ മാസം 2, 8 തീയതികളിലാണ് വീട് പൂട്ടിയ ശേഷം റെജി ആശുപത്രിയിൽ കുടുംബസമേതം പോയത്. ഇന്നലെ അലമാര തുറന്നു പരിശോധിച്ചപ്പോഴാണ് സ്വർണാഭരണങ്ങൾ മോഷണം പോയെന്നറിഞ്ഞത്.

വീടിന്റെ മുൻവാതിലോ അടുക്കളവാതിലോ തുറന്ന് ആരും അകത്തു കയറിയതായി കാണുന്നില്ല. ആശുപത്രിയിൽ പോയ സമയത്ത് കിടപ്പുമുറയിലെ കിടക്കയുടെ അടിയിലാണ് അലമാരയുടെ താക്കോൽ സൂക്ഷിച്ചത്. ഇതെടുത്ത് അലമാര തുറന്നാണ് മോഷണം നടത്തിയത്.

വീട്ടിൽ നിന്നും അസ്വാഭാവികമായ ഒരു വിരലടയാളം കണ്ടെത്തിയിട്ടുണ്ട്. കമ്പംമെട്ട് സിഐ ജി.സുനിൽകുമാർ, നെടുങ്കണ്ടം എസ്ഐ റസാഖ് എന്നിവരടങ്ങിയ സംഘം സ്ഥലത്ത് പരിശോധന നടത്തി. നിർണായകമായ വിവരങ്ങൾ പൊലീസിനു ലഭിച്ചതായാണു സൂചന.

ആറു മാസത്തിനിടെ റെജിയുടെ വീട്ടിൽ രണ്ടാം തവണയാണ് മോഷണം. നേരത്തെ 14 കിലോഗ്രാം ഉണക്ക ഏലക്കാ മോഷണം പോയിരുന്നു. 10 വർഷം മുൻപ് വീടിന്റെ ഒരു സ്പെയർ താക്കോലും നഷ്ടപ്പെട്ടിരുന്നു.