വീടുവിട്ടിറങ്ങിയ 17കാരിയെ സഹായം വാഗ്ദാനം ചെയ്ത് തടങ്കലിലാക്കി ദിവസങ്ങളോളം കൂട്ടബലാത്സംഗത്തിനിരയാക്കി; ഒരാൾ അറസ്റ്റിൽ

കട്ടക്: മാതാപിതാക്കളോട് വഴക്കിട്ട് വീടുവിട്ടിറങ്ങിയ കൗമാരക്കാരിയെ സഹായം വാഗ്ദാനം  ചെയ്ത് തട്ടിക്കൊണ്ടു പോയി കൂട്ടബലാത്സംഗത്തിനിരയാക്കി. 

ഒഡീഷയിലെ കട്ടകിലാണ് ഞെട്ടിക്കുന്ന സംഭവം. സംഭവത്തിൽ ഒരു യുവാവ് അറസ്റ്റിലായിട്ടുണ്ട്. മറ്റൊരാൾക്കായി തിരച്ചിൽ നടക്കുന്നുണ്ടെന്നാണ് പൊലീസ് അറിയിച്ചിരിക്കുന്നത്.

കഴിഞ്ഞ മാസമാണ് മാതാപിതാക്കളുമായി വഴക്കിട്ട് തിർത്തോൾ സ്വദേശിയായ പെണ്‍കുട്ടി വീടു വിട്ടിറങ്ങിയത്. തിരികെ വീട്ടിലേക്ക് തന്നെ മടങ്ങാൻ ബസ് കാത്തു നിൽക്കുമ്പോഴാണ് സഹായം വാഗ്ദാനം ചെയ്ത് പ്രതിയായ യുവാവെത്തിയത്. 

ബൈക്കിൽ വീട്ടിൽ കൊണ്ടു ചെന്നാക്കാമെന്ന് പറഞ്ഞ യുവാവ് പെണ്‍കുട്ടിയെ അടുത്തുള്ള ഗ്രാമത്തിലെ ഒരു പൗൾട്രി ഫാമിലെത്തിക്കുകയായിരുന്നു. ഇവിടെ കുട്ടിയെ  തടവിലാക്കിയ ഇയാൾ സുഹൃത്തുമൊപ്പം ചേർന്ന് പീഡനത്തിനിരയാക്കുകയായിരുന്നു.

ഇരുപത്തിരണ്ട് ദിവസത്തോളമാണ് പെൺകുട്ടി ബലാത്സംഗത്തിനിരയായത്. പൗൾട്രി ഫാമിലെ നടപടികൾ കണ്ട് സംശയം തോന്നിയ നാട്ടുകാര്‍ പൊലീസിൽ വിവരം അറിയിച്ചു. തുടർന്ന് പൊലീസ് നടത്തിയ റെയ്ഡിലാണ് പെൺകുട്ടിയെ രക്ഷപ്പെടുത്തിയത്.

'സംഭവത്തിൽ ഒരാൾ അറസ്റ്റിലായിട്ടുണ്ട്. രക്ഷപ്പെട്ട ഇയാളുടെ സുഹൃത്തിനായ അന്വേഷണം നടക്കുന്നുണ്ട്' എന്നാണ് ഡെപ്യൂട്ടി കമ്മീഷണർ പ്രതീക് സിംഗ് അറിയിച്ചിരിക്കുന്നത്..

രക്ഷപ്പെടുത്തിയ പെൺകുട്ടിയെ ശിശുക്ഷേമ സമിതിക്ക് മുന്നിൽ ഹാജരാക്കി. ഇവിടെ നിന്നും ഒരു അഭയകേന്ദ്രത്തിലേക്ക് അയച്ചിരിക്കുകയാണ്.

പ്രതികള്‍ക്കെതിരെ പീഡനം, ബലാത്സംഗം അടക്കമുള്ള വിവിധ കുറ്റങ്ങൾ ചുമത്തിയാണ് പൊലീസ് കേസ് രജിസ്റ്റർ ചെയ്തിരിക്കുന്നത്..