ഭിന്നശേഷിക്കാരനായ ആരാധകനെ കൈയിലെടുത്ത് വിജയ്; തരംഗം തീർത്ത് ചിത്രങ്ങൾ

ദക്ഷിണേന്ത്യൻ സിനിമയിലെ ഏറ്റവുമധികം ആരാധകരുളള നടൻ ഇളയദളപതി വിജയ് (Ilayathalapathy Vijay) മാസത്തിൽ ഒരിക്കൽ ആരാധകരുമായുളള ഫോട്ടോഷൂട്ട് നടത്തി ശ്രദ്ധയാകാര്‍ഷിക്കാറുണ്ട്. കഴിഞ്ഞ മാസം ആരാധകരുമായി കൂടിക്കാഴ്ച നടത്തിയതിനു പിന്നാലെ ഡിസംബറിലും ഫാൻ മീറ്റ് സംഘടിപ്പിക്കുകയായിരുന്നു. സംസ്ഥാനത്തിന്റെ വിവിധ ഭാഗങ്ങളിൽ നിന്നുള്ള തന്റെ ഫാൻസ് ക്ലബ് അംഗങ്ങൾക്കായി ബാച്ചുകളായി സമയം അനുവദിച്ചിരുന്ന അദ്ദേഹം കഴിഞ്ഞ ദിവസം അരിയല്ലൂരും പേരാമ്പ്രയും ഉൾപ്പെടെ മൂന്ന് ജില്ലകളിലുള്ള ആരാധകന്മാര്‍ക്ക് വേണ്ടി ചിലവഴിച്ചു

ഇതോടെ ആരാധകർക്കൊപ്പം വിജയ് നിൽക്കുന്ന നിരവധി ചിത്രങ്ങളാണ് സോഷ്യൽ മീഡിയയിൽ വൈറലാകുന്നത്. ഭിന്നശേഷിക്കാരനായ തന്റെ ഒരു ആരാധകനെ വിജയ് കയ്യിലെടുത്തു നിൽക്കുന്ന ചിത്രങ്ങൾ ആരുടെയും മനസ്സിൽ തൊടുന്നതാണ്. വിജയ് മക്കൾ ഇയക്കം (വിഎംഐ) നേതാവ് ബസ്സി ആനന്ദാണ് ചിത്രങ്ങൾ പങ്കുവച്ചത്. ചിത്രങ്ങൾ തൽക്ഷണം തന്നെ വൈറലായി

മീറ്റിംഗിനിടെ നടക്കാൻ കഴിയാത്ത ഒരു ഭിന്നശേഷിക്കാരനായ ആരാധകൻ തന്റെ പ്രിയ താരത്തോടൊപ്പം ഫോട്ടോയെടുക്കാൻ ആഗ്രഹിക്കുകയും. വിജയ് അതിനു സമ്മതിക്കുകയും മാത്രമല്ല, ആ സ്‌നാപ്പ് എടുക്കാൻ ആരാധകനെ നടൻ തന്റെ കൈയിലെടുത്തു

പൊങ്കലിനോട് അനുബന്ധിച്ച് പുതിയ ചിത്രമായ ‘വാരിസ്’ റിലീസ് ചെയ്യുന്നതിനു മുന്നോടിയായി ആരാധകരെ സജീവമാക്കുന്നതിനായാണ് പരിപാടി സംഘടിപ്പിച്ചതെന്നാണ് വിവരം

അനിരുദ്ധിന്റെ സംഗീതത്തിൽ സെവൻ സ്‌ക്രീൻ സ്റ്റുഡിയോസ് നിർമ്മിച്ച് ലോകേഷ് കനകരാജ് സംവിധാനം ചെയ്യുന്ന 'ദലപതി 67' എന്ന അടുത്ത ചിത്രത്തിന്റെ ഷൂട്ടിംഗ് ജനുവരി മുതൽ ആരംഭിക്കും.

ചിത്രത്തിൽ തൃഷ, സഞ്ജയ് ദത്ത്, അർജുൻ, മൻസൂർ അലി ഖാൻ, ജിവിഎം, മിഷ്‌കിൻ, കമൽഹാസൻ എന്നിവർ പ്രത്യേക വേഷങ്ങൾ ചെയ്യും