പ്രമുഖ സിനിമാ-ടെലിവിഷൻ താരം സന്ദീപ് നഹർ വീടിനുള്ളിൽ മരിച്ച നിലയിൽ; ആത്മഹത്യയെന്ന് സൂചന

മുംബൈ: സിനിമ-സീരിയൽ താരം സന്ദീപ് നഹർ വീടിനുള്ളിൽ മരിച്ച നിലയിൽ. കഴിഞ്ഞ ദിവസമാണ് മുംബൈയിലെ വസതിയിൽ ഇദ്ദേഹത്തെ മരിച്ച നിലയിൽ കണ്ടെത്തിയത്. ആത്മഹത്യയാണെന്നാണ് പ്രാഥമിക നിഗമനം എങ്കിലും അന്വേഷണം നടത്തുമെന്ന് പൊലീസ് അറിയിച്ചു.

അന്തരിച്ച ബോളിവുഡ് താരം നായകനായെത്തിയ എം.എസ്.ധോണി എന്ന ചിത്രത്തിലൂടെയാണ് സന്ദീപ് ശ്രദ്ധിക്കപ്പെടുന്നത്. സുശാന്തിന്‍റെ സുഹൃത്തുക്കളിലൊരാളായി ആയിരുന്നു ചിത്രത്തിൽ നഹർ പ്രത്യക്ഷപ്പെട്ടത്. അക്ഷയ് കുമാറിനൊപ്പം കേസരി എന്ന ചിത്രത്തിലും ഇയാൾ ശ്രദ്ധേയ വേഷം കൈകാര്യം ചെയ്തിരുന്നു.

'സബര്‍ബൻ ഗൊരെഗാവിലെ ഫ്ലാറ്റിൽ അബോധാവസ്ഥയിൽ കണ്ടെത്തിയ സന്ദീപിനെ ഭാര്യ കാഞ്ചനും സുഹൃത്തുക്കളും ചേർന്നാണ് എസ് വി ആർ ആശുപത്രിയിലെത്തിച്ചത്. എന്നാൽ അപ്പോഴേക്കും മരണം സംഭവിച്ചിരുന്നു' ഒരു പൊലീസുകാരനെ ഉദ്ധരിച്ച് പിടിഐ റിപ്പോർട്ട് ചെയ്യുന്നു.

ആത്മഹത്യ ഉൾപ്പെടെ എല്ലാവശങ്ങളും അന്വേഷിക്കുമെന്നാണ് പൊലീസ് വ്യക്തമാക്കിയിരിക്കുന്നത്. താരത്തിന്‍റെ പോസ്റ്റുമോർട്ടം റിപ്പോർട്ട് പുറത്തുവന്നശേഷം മാത്രമാകും ഇക്കാര്യത്തിലെ തുടർ നടപടികൾ.

അതേസമയം മരണത്തിന് തൊട്ടുമുമ്പ് സുദീപ് ഫേസ്ബുക്കിൽ ഒരു വീഡിയോ പോസ്റ്റ് ചെയ്തിരുന്നു. അസംതൃപ്ത ദാമ്പത്യമാണ് ആത്മഹത്യയിലേക്ക് നയിച്ചതെന്ന സൂചന നൽകുന്നതാണ് പോസ്റ്റ്. ഇതിനൊപ്പം ചില ബന്ധുക്കളുടെ പേരുകളും താൻ നേരിടേണ്ടി വന്ന കഷ്ട്ടപ്പാടുകളും വിവരിക്കുന്നുണ്ട്.

(ആത്മഹത്യ ഒന്നിനും പരിഹാരമല്ല.. അതിജീവിക്കാൻ ശ്രമിക്കുക. മാനസികാരോഗ്യ വിദഗ്ധരുടെ സഹായം തേടുക.. Toll free helpline number: 1056, മറ്റ് ഹെൽപ് ലൈൻ നമ്പറുകൾ:  പ്രതീക്ഷ (കൊച്ചി) -048-42448830,  മൈത്രി (കൊച്ചി)- 0484-2540530, ആശ്ര (മുംബൈ)-022-27546669, സ്നേഹ (ചെന്നൈ) -044-24640050, സുമൈത്രി -(ഡല്‍ഹി)-  011-23389090,  കൂജ് (ഗോവ)- 0832- 2252525,  റോഷ്നി (ഹൈദരാബാദ്) -040-66202000)